અમદાવાદ / ઠંડીનું આગમન થતાં જ મેગા સિટી અમદાવાદમાં વધ્યા આ બીમારીના કેસ, તબીબોએ આપી ચેતવણી

અમદાવાદ શહેરમાં તાપમાનનો પારો ગગડતાં જ શરદી અને લાંબા સમય સુધી રહેતી સૂકી ઉધરસના કેસમાં વધારો નોંધાઈ રહ્યો છે. શહેરનાં વિવિધ દવાખાનાંઓમાં સારવાર માટે આવતા દર્દીઓમાં ગળામાં દુખાવો, શરદી અને હળવા તાવની ફરિયાદો વધી છે, બીજી તરફ મોટી હોસ્પિટલોના જણાવ્યા અનુસાર ડેન્ગ્યુ અને ઈન્ફ્લુએન્ઝા (ફ્લૂ)ના કેસમાં ઘટાડો જોવા મળ્યો છે.

હવામાનમાં આવેલા આ ફેરફારની અસર લોકોના સ્વાસ્થ્ય પર પણ જોવા મળી રહી છે. શહેરના તબીબ ડો. પ્રજ્ઞેશ વછરાજાનીએ જણાવ્યું છે કે બદલાતા હવામાનના કારણે સૂકી ઉધરસના દર્દીઓની સંખ્યામાં વધારો થયો છે. દર્દીઓ ગળામાં દુખાવો, શરદી અને હળવા તાવની ફરિયાદ સાથે આવી રહ્યા છે, જોકે સામાન્ય રીતે આ તકલીફો ગંભીર હોતી નથી અને લક્ષણો આધારિત સારવારથી નિયંત્રિત કરી શકાય છે.

જોકે તબીબોએ ચેતવણી આપી છે કે આગામી બે અઠવાડિયાં સુધી શ્વસનતંત્રને લગતી બીમારીઓના કેસ સતત જોવા મળી શકે છે. દિવાળીના તહેવારો નજીક આવતાં ઘરની સાફસફાઈની પ્રવૃત્તિઓમાં વધારો થાય છે, જેના કારણે કેટલાક લોકોમાં એલર્જીક પ્રતિક્રિયા થઈ શકે છે. આ ઉપરાંત શહેરના કેટલાક વિસ્તારોમાં એર ક્વોલિટી ઈન્ડેક્સ (એક્યૂઆઈ)નું નીચું સ્તર પણ અગાઉથી શ્વસનતંત્રની તકલીફ ધરાવતા લોકોની સમસ્યામાં વધારો કરી શકે છે.

આરોગ્ય નિષ્ણાતો જણાવે છે કે હાલમાં ડેન્ગ્યુના બહુ ઓછા દર્દીઓને સારવારની જરૂર પડી રહી છે, તેમાં પણ મોટા ભાગના દર્દીઓ ગંભીર લક્ષણો ધરાવતા હોવાથી તબીબી દેખરેખ હેઠળ રાખવા પડે છે. એક મહિના પહેલાંની સરખામણીમાં ડેન્ગ્યુના કેસમાં નોંધપાત્ર ઘટાડો થયો છે.

તહેવારોમાં સારવારની સુવિધા જળવાઈ રહે તે માટે હોસ્પિટલો સજ્જ

તહેવારોના દિવસોમાં દર્દીઓની સંખ્યામાં વધારો થવાની શક્યતાને ધ્યાનમાં રાખીને શહેરની હોસ્પિટલો દ્વારા પણ જરૂરી વ્યવસ્થાઓ કરવામાં આવી છે. અમદાવાદ હોસ્પિટલ્સ એન્ડ નર્સિંગ હોમ્સ એસોસિયેશન (આહના)ના પ્રમુખ ડો. ભરત ગઢવીએ જણાવ્યું છે કે અમારી સભ્ય હોસ્પિટલ પાસે અવિરત સારવાર ચાલુ રાખવા માટે પૂરતો સ્ટાફ અને જરૂરી સંસાધનો ઉપલબ્ધ છે. અગાઉનાં વર્ષોના અનુભવના આધારે તહેવારોના સમયગાળા દરમિયાન દાઝી જવાના બનાવો, શ્વસનતંત્રને લગતી બીમારીઓ અને પડી જવાથી થતી ઈજાઓના કેસમાં વધારો જોવા મળે છે. આ સ્થિતિને ધ્યાનમાં રાખીને હોસ્પિટલો ઈમર્જન્સી (કટોકટીની પરિસ્થિતિ)માં નિષ્ણાત તબીબોની ઉપલબ્ધતા સુનિશ્ચિત કરવા પ્રયાસ કરી રહી છે.

આ પણ વાંચોઃ ગુજરાતમાં ગરમીનો પારો ઓક્ટોબરમાં રહ્યો સૌથી ઊંચો, જાણો કેટલાં ડિગ્રી નોંધાયું

બીજી તરફ અમદાવાદ મેડિકલ એસોસિયેશનનો ‘ડોક્ટર ઓન કોલ’ કાર્યક્રમ પણ દિવાળી દરમિયાન કાર્યરત રહેશે. આ કાર્યક્રમ હેઠળ સામાન્ય રીતે ૧૦૦થી વધુ ફોન આવે છે, જેમાં નિષ્ણાત તબીબો દર્દીઓને માર્ગદર્શન આપવા ઉપરાંત જરૂરિયાત મુજબ યોગ્ય આરોગ્યસેવા કેન્દ્ર સુધી પહોંચવાની સલાહ આપે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ