સૌથી અનોખું / અમદાવાદમાં ખુલ્યું ભારતનું સૌથી પહેલું ઈમર્સિવ મ્યુઝિયમ, જે કરાવશે તમને એક અલગ જ દુનિયાનો અહેસાસ, જાણો ખાસિયતો

અમદાવાદીઓને એક નવું નજરાણું મળવા જઈ રહ્યું છે, એ પણ એટલું ખાસ કે જે ભારતમાં સૌથી પહેલું છે. અમદાવાદમાં આવી ગયું છે, સ્પેક્ટ્રા - ભારતનું સૌથી પહેલું ઈમર્સિવ અને મલ્ટી સેન્સરી મ્યુઝિયમ. આ મ્યુઝિયમ એટલા માટે ખાસ છે, કારણ કે અત્યાર સુધી આવું મ્યુઝિયમ માત્ર સિંગાપોર, દુબઈ અને યુકેમાં જ છે. ભારતનું સૌથી પહેલું મલ્ટી સેન્સરી મ્યુઝિયમ અમદાવાદમાં ઓપન થયું છે.

આ મ્યુઝિયમની દીવાલો તમારા સ્પર્શને સમજે છે, રિએક્ટ કરે છે, તમારી હાજરીથી અહીંની દીવાલોનો રંગ બદલાય છે અને તમારો અવાજ સાંભળતા જ આ મ્યુઝિયમના એલિમેન્ટ્સ સામે રિએક્ટ પણ કરે છે.

અમદાવાદના હેબતપુર રોડ પર 60,000 ચોરસ ફૂટ વિસ્તારમાં બનેલું સ્પેક્ટ્રા માત્ર જોવા જેવી જગ્યા નથી, પરંતુ અનુભવવાની અને અનુભૂતિઓથી ભરપૂર દુનિયા છે.

Spectraના ડિરેક્ટર હર્ષલ બ્રહ્મભટ્ટના કહેવા પ્રમાણે આ આખા મ્યુઝિયમના પાયામાં એક સવાલ છે. આમ તો મ્યુઝિયમો વારસા સાચવવા અને કલા માટે હોય છે, પરંતુ જો મ્યુઝિયમ ઈન્દ્રિયો એટલે કે અનુભૂતિઓ માટે બનાવવામાં આવે તો? આ એક સવાલના જવાબમાં સ્પેક્ટ્રાનો જન્મ થયો.

10 જ મહિનામાં મ્યુઝિયમ કર્યું તૈયાર

આમ તો માત્ર 10 જ મહિનામાં તૈયાર થનારા આ મ્યુઝિયમ માટે હર્ષલભાઈએ ત્રણ વર્ષ સુધી યુકે, સિંગાપોર અને દુબઈમાં રિસર્ચ કર્યું હતું. તેમણે પોતે વિવિધ મલ્ટી-સેન્સરી જગ્યા અનુભવ્યા બાદ અમદાવાદમાં આ મ્યુઝિયમ ફક્ત 10 મહિનામાં તૈયાર કર્યું છે. અને જ્યારે આ મ્યુઝિયમના ટ્રાયલ દરમિયાન બાળકો અને વડીલોના ચહેરા પર જે આનંદ આવ્યો, તેનાથી સંતોષ અનુભવાયો.

હર્ષલભાઈ એક ખાસ કિસ્સો યાદ કરતા કહે છે કે,' 70 વર્ષના એક દાદી પણ “Pool of Balls”માં બાળપણનો આનંદ માણતા જોવા મળ્યા હતા' સ્પેક્ટ્રા વિશે વાત કરીએ તો આ મ્યુઝિયમમાં ટોટલ 8 રૂમ છે, જે દરેક રૂમની પોતાની USP છે, પોતાનો અલગ અનુભવ છે. આ આઠ રૂમના નામ કોર્ટેક્સ, ક્રોનિકલ, સાગા, લૉરેલ, કેલેસ્ટિયલ, વોર્ટેક્સ, ગ્લિમર અને લ્યુમ છે. દરેક રૂમની પોતાની ખાસિયત છે.

આ પણ વાંચોઃ જળ વ્યવસ્થાપન ક્ષેત્રે ગુજરાતનો ડંકો, સમગ્ર દેશમાં બીજા નંબરનું સ્થાન પ્રાપ્ત કરી એવોર્ડ જીત્યો

અમદાવાદમાં બનેલું સ્પેક્ટ્રા મ્યુઝિયમ એક નવા પ્રકારના મનોરંજન અને ક્રિએટિવિટીને નવેસરથી ડિફાઈન કરે છે. આ મ્યુઝિયમના ડિરેક્ટર સહિતની ટીમનો ઉદ્દેશ્ય અમદાવાદને આખા વિશ્વમાં સંસ્કૃતિના કેન્દ્ર તરીકે રજૂ કરવાનો છે. એક એવું સ્થળ, જે લોકોમાં ક્યુરિયોસિટી જનરેટ કરે.

અમદાવાદીઓનું આ નવું નજરાણું 22 નવેમ્બર, 2025થી દરેક નાગરિકો માટે ખુલવાનું છે, જ્યાંની એન્ટ્રી ફી ₹1800 + GST રાખવામાં આવી છે

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ