અમદાવાદ / હવે કોચિંગ, લાઈબ્રેરી અને ટ્યૂશન ક્લાસીસમાં ફાયર સેફ્ટીનું મેગા ઓડિટ

લખનઉના કોચિંગ સેન્ટરમાં લાગેલી ભીષણ આગમાં 15 લોકોનાં કરુણ મોત બાદ સમગ્ર દેશમાં ફાયર સેફ્ટી અંગે ગંભીર ચિંતા ઊભી થઈ છે. આ દુર્ઘટનાએ માત્ર ઉત્તરપ્રદેશ જ નહીં, પરંતુ દેશભરની શૈક્ષણિક સંસ્થાઓમાં સુરક્ષા વ્યવસ્થાની હકીકત સામે લાવી છે. આ ઘટનાની ગુંજ અમદાવાદ સુધી પહોંચી છે અને હવે અમદાવાદ ફાયર એન્ડ ઇમર્જન્સી સર્વિસ (AFES) દ્વારા શહેરવ્યાપી "ફાયર સેફ અમદાવાદ" અભિયાન શરૂ કરવામાં આવ્યું છે. આ અભિયાન હેઠળ કોચિંગ ક્લાસ, ટ્યૂશન ક્લાસીસ, લાઇબ્રેરી, સ્ટડી સેન્ટર તેમજ મિશ્ર ઉપયોગ ધરાવતાં બિલ્ડિંગોમાં સઘન ચકાસણી હાથ ધરવામાં આવી રહી છે.

વિદ્યાર્થીઓની સુરક્ષા સાથે કોઈપણ પ્રકારની બેદરકારી નહીં

ફાયર વિભાગના અધિકારીઓએ સ્પષ્ટ કર્યું છે કે વિદ્યાર્થીઓની સુરક્ષા સાથે કોઈપણ પ્રકારની બેદરકારી સહન કરવામાં આવશે નહીં. જ્યાં પણ ફાયર સેફ્ટીના નિયમોનું ઉલ્લંઘન જોવા મળશે ત્યાં નોટિસથી લઈને બિલ્ડિંગ બંધ કરવાની કાર્યવાહી સુધીનાં કડક પગલાં લેવામાં આવશે. વિશેષ અભિયાન અંતર્ગત શહેરના ઉત્તર-પશ્ચિમ ઝોન સહિત વિવિધ ઝોનમાં અલગ-અલગ ટીમો બનાવીને શૈક્ષણિક સંસ્થાઓની મુલાકાત લેવામાં આવી રહી છે. ટીમો ફાયર સેફ્ટીનાં સાધનો, ઇમર્જન્સી એક્ઝિટ, ઇલેક્ટ્રિકલ સેફ્ટી, ફાયર એનઓસી, ઇવેક્યુએશન પ્લાન અને બિલ્ડિંગના કાયદાકીય દસ્તાવેજોની ચકાસણી કરી રહી છે.

હાઈ રિસ્ક કેટેગરીમાં મૂકીને તાત્કાલિક કાર્યવાહી

ફાયર વિભાગના જણાવ્યા મુજબ છેલ્લા કેટલાક વર્ષોમાં અનેક ટ્યૂશન ક્લાસીસ રહેણાક મકાનો, બેઝમેન્ટ અને કોમર્શિયલ બિલ્ડિંગોમાં શરૂ થયા છે. ઘણી જગ્યાએ વિદ્યાર્થીઓની સંખ્યા ક્ષમતા કરતાં વધુ છે, જ્યારે ઇમર્જન્સી એક્ઝિટ, ફાયર એક્સ્ટિંગ્વિશર અને એલાર્મ સિસ્ટમ જેવી મૂળભૂત વ્યવસ્થાનો પણ અભાવ જોવા મળે છે. આવી સ્થિતિ આગ જેવી દુર્ઘટના સમયે જીવલેણ સાબિત થઈ શકે છે. ફાયર ચીફ ઓફિસર અમિત ડોંગરેએ જણાવ્યું છે કે માત્ર દસ્તાવેજોની તપાસ નહીં પરંતુ વાસ્તવિક ફાયર સેફ્ટી વ્યવસ્થા કાર્યરત છે કે નહીં તેની પણ સ્થળ પર ચકાસણી કરવામાં આવશે. જો ફાયર પંપ બંધ હશે, એક્ઝિટ લોક હશે અથવા બેઝમેન્ટમાં ગેરકાયદે ક્લાસીસ ચાલતા હશે તો તેને હાઈ રિસ્ક કેટેગરીમાં મૂકીને તાત્કાલિક કાર્યવાહી કરવામાં આવશે.

શું છે ફાયર સેફ અમદાવાદ અભિયાન?

• શહેરના તમામ કોચિંગ ક્લાસીસનો સર્વે
• લાઇબ્રેરી અને રીડિંગરૂમનું ફાયર ઓડિટ
• ટ્યૂશન ક્લાસીસમાં કાયદાકીય પાલનની ચકાસણી
• ગેરકાયદે ઓક્યુપન્સી શોધવા ખાસ અભિયાન
• વિદ્યાર્થીઓ માટે સુરક્ષિત વાતાવરણ ઊભું કરવાનો પ્રયાસ

કયાં સ્થળો રહેશે ફાયર વિભાગના નિશાના પર?

પહેલી પ્રાથમિકતા

• ટ્યૂશન ક્લાસીસ
• કોચિંગ સેન્ટર
• સ્પર્ધાત્મક પરીક્ષાનાં ઇન્સ્ટિટ્યૂટ
• સ્પોકન ઇંગ્લિશ ક્લાસીસ
• કમ્પ્યૂટર ટ્રેનિંગ સેન્ટર
• લાઇબ્રેરી
• રીડિંગરૂમ
• સ્ટડી સેન્ટર

બીજી પ્રાથમિકતા

• કોમર્શિયલ સાથે ટ્યૂશન
• ઓફિસ સાથે લાઇબ્રેરી
• રહેણાકમાં ચાલતા ક્લાસીસ
• દુકાન ઉપર શિક્ષણ એકમ
• બેઝમેન્ટમાં લાઇબ્રેરી

ત્રીજી પ્રાથમિકતા

• પીજી હોસ્ટેલ
• વિદ્યાર્થી આવાસ
• નાનાં શૈક્ષણિક મકાનો
• મલ્ટી ટેનન્ટ બિલ્ડિંગ

ત્રણ ટીમ કરશે કાર્યવાહી

ટીમ-A : ફાયર સેફ્ટી ઓડિટ

• ફાયર સિસ્ટમનું નિરીક્ષણ
• દસ્તાવેજોની ચકાસણી
• જોખમનું મૂલ્યાંકન

ટીમ-B : સર્વેલન્સ

• વિદ્યાર્થીઓની સંખ્યા અંગે તપાસ
• ગેરકાયદે ઉપયોગ શોધવો
• બેઝમેન્ટનું નિરીક્ષણ

ટીમ-C : કાનૂની કાર્યવાહી

• નોટિસ આપવી
• શો-કોઝની કાર્યવાહી
• ઉલ્લંઘનનો રેકોર્ડ
• કાયદાકીય કાર્યવાહી માટે ભલામણ

50 મુદ્દાના ફાયર સેફ્ટી ચેકલિસ્ટમાં શું તપાસાશે?

માર્ગ અને બહાર નીકળવાની વ્યવસ્થા

• બે એક્ઝિટ છે?
• દરવાજા બહાર તરફ ખૂલે છે?
• એક્ઝિટ અવરોધમુક્ત છે?
• ઇમર્જન્સી સાઇન કાર્યરત છે?

ઇલેક્ટ્રિકલ સેફ્ટી

• લૂઝ વાયરિંગ નથી?
• MCB અને ELCB છે?
• ઓવરલોડિંગ નથી?
• અર્થિંગ યોગ્ય છે?

ફાયર પ્રોટેક્શન

• ફાયર એક્સ્ટિંગ્વિશર છે?
• રિફિલિંગ સમયસર થયું છે?
• હાઇડ્રન્ટ અને પંપ કાર્યરત છે?
• એલાર્મ અને સ્પ્રિન્કલર ચાલે છે?

લાઇફ સેફ્ટી

• ઇમર્જન્સી લાઇટ
• ફાયર ડ્રિલ
• ફર્સ્ટ એઇડ કિટ
• ઇવેક્યુએશન પ્લાન
• સ્ટાફ ટ્રેનિંગ

દસ્તાવેજો

• ફાયર એનઓસી
• ફાયર ઓડિટ
• ઇલેક્ટ્રિકલ ઓડિટ
• ઓક્યુપન્સી મંજૂરી
• AMC રેકોર્ડ

આ ભૂલો મળી તો તરત કાર્યવાહી

• એક્ઝિટ લોક હશે
• માત્ર એક જ સીડી હશે
• ફાયર એક્સ્ટિંગ્વિશર નહીં હોય
• ફાયર એનઓસી નહીં હોય
• બેઝમેન્ટમાં ક્લાસીસ ચાલતા હશે
• ગેરકાયદે ઉપયોગ બદલાયો હશે
• ઇલેક્ટ્રિકલ ઓવરલોડ
• સીડીમાં અવરોધ
• ફાયર પંપ બંધ
• ક્ષમતા કરતાં વધુ વિદ્યાર્થીઓ
• ત્રણ કેટેગરીમાં કાર્યવાહી થશે

કેટેગરી-A : નાની ખામી

• એડ્વાઇઝરી નોટિસ
• સાત દિવસમાં સુધારો

કેટેગરી-B : મોટી ખામી

• શો-કોઝ નોટિસ
• 48 કલાકમાં પાલન

કેટેગરી-C : જોખમી બિલ્ડિંગ

• તાત્કાલિક રિપોર્ટ
• બંધ કરવાની ભલામણ
• ફાયર એનઓસી સસ્પેન્ડ કરવાની ભલામણ
• કાયદાકીય કાર્યવાહી

માત્ર તપાસ નહીં, જાગૃતિ પણ

ફાયર વિભાગ વિદ્યાર્થીઓને આગ સમયે કેવી રીતે બહાર નીકળવું, ગભરાટ ટાળવો અને ઇમર્જન્સીમાં શું કરવું તેની તાલીમ આપશે. શિક્ષકોને ફાયર વોર્ડન તરીકે તૈયાર કરવામાં આવશે, જ્યારે બિલ્ડિંગ માલિકોને કાયદાકીય જવાબદારી અંગે માહિતગાર કરવામાં આવશે.

અભિયાનનું લક્ષ્ય

• શહેરના તમામ ટ્યૂશન ક્લાસીસનો સર્વે
• તમામ લાઇબ્રેરીનું ફાયર ઓડિટ
• જોખમી બિલ્ડિંગોની ઓળખ
• ગેરકાયદે ઓક્યુપન્સી શોધવી
• ફાયર સેફ્ટીમાં સુધારો
• વિદ્યાર્થીઓના જીવનની સુરક્ષા
• આગની દુર્ઘટના અટકાવવી
• મજબૂત અમલીકરણ વ્યવસ્થા
• જનજાગૃતિ વધારવી

આ પણ વાંચો : જેતપર ખેડૂત આંદોલનઃ વળતર સહિત ખેડૂતોની છે 6 માંગ, પ્રાંત અધિકારીને લેખિતમાં રજુઆત કરાઈ

અમદાવાદ ફાયર વિભાગનું આ અભિયાન માત્ર તપાસ પૂરતું મર્યાદિત નથી, પરંતુ ભવિષ્યમાં કોઈ પણ દુર્ઘટના ન સર્જાય અને વિદ્યાર્થીઓને સુરક્ષિત વાતાવરણ મળી રહે તે માટેનું મહત્વપૂર્ણ પગલું માનવામાં આવી રહ્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ