એક્શન / IT રિટર્ન ફાઈલ ન કરનારા ચેતી જજો: ડેટાના આધારે લોકોને ફટકારાઇ પેનલ્ટીની નોટિસ, માંગ્યા ખુલાસા

• રિટર્ન ફાઇલ ન કરાનારા ITની રડારમાં
• 4 વર્ષના ડેટાના આધારે પેનલ્ટીની નોટિસ
• મોટા આર્થિક વ્યવહાર છતા રિટર્ન ન ભર્યા

Notice Of Income Tax Department: ગુજરાતમાં ઈન્કમ ટેક્સ રિટર્ન ફાઈલ ન કરનારાઓ ITની રડારમાં છે. 31 માર્ચ પહેલા રિમાઈન્ડર મોકલવા છતાં રિટર્ન ફાઈલ ન કરનારા લોકોને 4 વર્ષના ડેટાના આધારે પેનલ્ટીની નોટિસ ફટકારવામાં આવી છે. મોટા-મોટા આર્થિક વ્યવહાર કરવા છતાં ટેક્સ કે રિર્ટન નહીં ભરનારાઓને આવકવેરા વિભાગે પેનલ્ટીની નોટિસ ફટકારી છે. આવકવેરા વિભાગે રજિસ્ટ્રાર ઓફિસમાંથી મિલકતના ખરીદ વેચાણની વિગતો મેળવી હતી.

31 માર્ચ પહેલા મોકલ્યા હતા રિમાઈન્ડર
આવકવેરા વિભાગ દ્વારા રજિસ્ટ્રાર ઓફિસમાંથી કરદાતા દ્વારા કરવામાં આવેલા રોકાણો અથવા મિલકતની ખરીદ વેચાણની માહિતી મેળવવામાં આવી હતી. મોટા પ્રમાણમાં જમીન કે મિલકત ખરીદનાર, બેન્ક એફડી, શેરબજારમાં રોકાણ કરનારાઓને માહિતીના આધારે આવકવેરા વિભાગ દ્વારા ગત 31 માર્ચ પહેલા ફાઈલ કરવા અને ટેક્સ ભરવા માટે રિમાઈન્ડર મોકલ્યા હતા. તો કેટલાકને નોટિસ પણ મોકલવામાં આવી હતી. 

માહિતી છુપાવનારાઓ સામે કાર્યવાહી
જેમાંથી કેટલાક લોકોએ રિટર્ન ફાઈલ કર્યા પરંતુ મોટા આર્થિક વ્યવહારની માહિતી છુપાવી હતી. ત્યારે હવે મોટા-મોટા આર્થિક વ્યવહારની માહિતી છુપાવનારા અને અસંતોષકારક જવાબ આપનારાઓ સામે આવકવેરા વિભાગે બાંયો ચડાવી છે.

પેનલ્ટીની નોટિસ ફટકારી
આવકવેરા વિભાગે છેલ્લા ચાર વર્ષના ડેટાના આધારે રિટર્ન ફાઈલ નહીં કરનારાઓ અને અસંતોષકારક જવાબ આપનારાઓને પેનલ્ટીની નોટિસ ફટકારી છે. રાજ્યમાં મોટા પ્રમાણમાં આવી નોટિસ ઈશ્યૂ થઈ છે.