લોકસભા ચૂંટણી 2024 / ક્ષત્રિય સમાજમાં ભભૂકેલો આક્રોશ ક્યારે થશે શાંત, આજે યોજાનારા વિશાળ સંમેલનમાં નવી રણનીતી અંગે કરાશે ચર્ચા

પાટણની રાજપૂત છાત્રાલય ખાતે ગત રોજ યોજાયેલ પ્રેસ કોન્ફરન્સમાં પાટણમાં આજે યોજાનાર ક્ષત્રિય અસ્મિતાનાં સંમેલન વિશે જાણકારી આપવામાં આવી હતી.  આજે ઉત્તર ગુજરાતનાં પાટણ, બનાસકાંઠા અને મહેસાણા જીલ્લાનાં ક્ષત્રિય આગેવાનો સહિત સમાજનાં લોકો સંમેલનમાં ઉપસ્થિત રહેશે.  આ સંમેલનમાં રૂપાલાની ઉમેદવારી રદ્દ કરવાની માંગ સાથે ક્ષત્રિય અસ્મિતા સંમેલન યોજાશે.  આજે સાંજે 4 વાગ્યે ક્ષત્રિય અસ્મિતિ સંમેલન યોજાશે. 

ક્ષત્રિય સમાજ બધાને સાથે લઈ ચાલવાનો છેઃ કરણસિંહ ચાવડા
ગત રોજ કરવામાં આવેલ પ્રેસ કોન્ફરન્સમાં કરણસિંહ ચાવડાએ નિવેદન આપ્યું હતું કે, ક્ષત્રિય સમાજ બધાને સાથે લઈને ચાલવાનો છે. આજે યોજાનાર સંમેલનમાં અન્ય સમાજો પણ ઉપસ્થિત રહેશે. તેમજ આજે બધા ઉમટી પડો અને આપણી એકતાનાં દર્શન કરાવો. 

કરણી સેનાનાં પ્રમુખ સાથે અસભ્ય વર્તન કરતા ક્ષત્રિય સમાજમાં રોષ
અત્રે ઉલ્લેખનીય છે કે ગત રોજ ક્ષત્રિય સમાજ દ્વારા ગાંધીનગર ભાજપ કાર્યાલય કમલમનો ઘેરાવો કરવાની જાહેરાત કરવામાં આવી હતી. જેને પગલે પોલીસ દ્વારા કરણી સેનાનાં પ્રમુખ રાજશેખાવતની અમદાવાદ એરપોર્ટ પરથી અટકાયત કરી તેઓને ક્રાઈમ બ્રાન્ચ ખાતે લઈ જવામાં આવ્યા હતા. ત્યારે કરણી સેનાનાં અધ્યક્ષ રાજ શેખાવતની પોલીસ દ્વારા અટકાયત સમયે તેઓ સાથે અસભ્ય વર્તન કરતા ક્ષત્રિય સમાજમાં ભારે રોષની લાગણી જોવા મળી હતી. 

વધુ વાંચોઃ કાર્યકર્તા સંવાદ કાર્યક્રમમાં સોમનાથના MLAની ગેરહાજરી આંખે ઉડીને વળગી, હીરાભાઈ જોટવાએ કહ્યું 'કોંગ્રેસમાં કોઇ કકળાટ નથી'

પરષોત્તમ રૂપાલા VS પરેશ ધાનાણી
છેલ્લા ઘણા સમયથી રાજકોટ બેઠક પરથી પરેશ ધાનાણીનાં નામની ચાલી રહેલી અટકળોનો અંત આવ્યો છે. ત્યારે રાજકોટ બેઠકથી ચૂંટણી લડવા માટે કોંગ્રેસ નેતા પરેશ ધાનાણીએ તૈયારીઓ દર્શાવતા રાજકોટ બેઠક પર ચૂંટણી જંગ જામ્યો છે. ચૂંટણી લડવા મનાવવા ગયેલા કોંગ્રેસ નેતાઓની માંગ ધાનાણીએ સ્વીકારી હતી. રાજકોટમાં ભાજપનાં પરશોત્તમ રૂપાલા સામે પરેશ ધાનાણી ચૂંટણી લડશે. રાજકોટમાં કડવા પાટીદાર સામે લેઉવા પાટીદારનો જંગ જામશે. 

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો