- મહેસાણા નજીકથી નકલી જીરું બનાવતી ફેક્ટરી પકડાઇ
- 2700 કિલો નકલી જીરાનો જથ્થો જપ્ત કર્યો
- ગાંધીનગરની ફૂડ ટીમ દ્વારા કાર્યવાહી
મહેસાણામાં ફરી એકવાર નકલી જીરું બનાવતી ફેક્ટરી ઝડપાતા ચકચાર જાગી છે. મકતુપુર-સુણોક રોડ ઉપરથી નકલી જીરૂ બનાવવાની ફેક્ટરી ધમધમતી હતી. જ્યાં તપાસ હાથ ધરી ફેકટરીમાંથી નકલી જીરુંનો જથ્થો પકડાયો હતો. વધુમાં નકલી જીરું બનાવવા માટે વપરાતા પદાર્થ પણ પકડાયા હતા. જેને લઈને બ્રાઉન પાવડર 350 કીલો, ઝીણી વરીયાળી 630 કીલો સહિત 2700 કિલો નકલી જીરાના જથ્થો જપ્ત કરાયો હતો.
બ્રાઉન પાઉડર અને ગોળની રસી ભેગી કરતા હતા
ખોરાક અને ઔષધ નિયમન તંત્ર કમિશનર ડો. એચ. જી કોશિયાએ જણાવ્યું હતું કે ગાંધીનગરની ફૂડ ટીમ દ્વારા ઊંઝા ખાતે રૂ.૨.૧૪ લાખથી વધુની કિંમતનો ૩,૬૮૦ કિ.ગ્રામ. બનાવટી જીરુંનો જથ્થો જપ્ત કરવામાં આવ્યો છે. રાજ્યના નાગરિકોની જીવનજરૂરી ખાદ્ય ચીજવસ્તુઓ શુદ્ધ અને ગુણવત્તાયુક્ત મળી રહે તે માટે રાજ્ય સરકાર સતત કટીબદ્ધ છે. રાજ્યમાં ખાદ્યચીજોના નમુનાનું પરીક્ષણ કરી ભેળસેળ કરતાં તત્વો સામે કાયદાકીય કાર્યવાહી કરવામાં આવશે.કોશિયાએ કહ્યું હતું કે, ગાંધીનગરની ફૂડ ટીમ દ્વારા બનાવટી જીરું અંગે ઊંઝામાં આકસ્મિક તપાસ કરવામાં આવી હતી. જેમાં કૌભાંડ આચરનાર વેપારી પટેલ મહેન્દ્રભાઈ મફતલાલ, મકતુપુર- સુણોક રોડ, મુ-મકતુપુર, ઊંઝાની પ્રાથમિક તપાસ દરમિયાન સ્થળ ઉપર બનાવટી જીરાનું ઉત્પાદન થતું જોવા મળ્યું હતું. આ પેઢીમાં સઘન તપાસ હાથ ધરતા ઝીણી વરિયાળીમાં બ્રાઉન પાઉડર અને ગોળની રસી ભેગી કરી બનાવટી જીરું બનાવતા હોવાનું જાણવા મળ્યું હતું, જે જીરામાં ભેળસેળ કર્યાનું પ્રાથમિક દ્રષ્ટીએ જોવા મળ્યું છે.
ગોળની રસી સહિતનો જથ્થો જપ્ત કરાયો
તપાસ દરમિયાન સ્થળ પર “ગોળની રસી”નો ૧૦૦ લીટર જથ્થો, “બ્રાઉન પાઉડર” નો ૩૫૦ કિલોગ્રામ જથ્થો, ઝીણી વરીયાળીનો ૬૩૦ કિલોગ્રામ જથ્થો અને બનાવટી જીરાનો ૨૭૦૦ કિલોગ્રામ જથ્થો ટીમ દ્વારા સ્થળ પર જ હાજર સ્ટોકમાં પકડી પાડવામાં આવ્યો છે. તેમણે કહ્યું હતું કે, સ્થળ પરથી જીરું- ૧, ગોળની રસી (એડલટ્રન્ટ) -૧, બ્રાઉન પાઉડર (એડલટ્રન્ટ) – ૧ અને ઝીણી વરિયાળી (એડલટ્રન્ટ) -૦૧ મળીને કુલ- ૪ કાયદેસરના નમૂનાઓ લઇ પૃથ્થકરણ માટે લેબોરેટરીમાં મોકલી આપ્યા છે. ગોળની રસીના જથ્થાનો સ્થળ પર જ વેપારી દ્વારા સ્વેચ્છાએ નાશ કરવામાં આવ્યો હતો અને બાકીનું બનાવટી જીરું, બ્રાઉન પાઉડર અને ઝીણી વરિયાળીનો કુલ ૩,૬૮૦ કિલોગ્રામનો જથ્થો કે જેની કિંમત રૂ. ૨,૧૪,૧૫૦નો જથ્થો જપ્ત કરવામાં આવ્યો છે.
જીરુંમાં ભેળસેળ કેમ?
- લોકોની પહેલી પસંદ છે ઊંઝાનું જીરું
- ઊંઝાના જીરાની લોકોમાં ખુબ માગ છે
- બનાવટી જીરુંથી જીરુંના ઉંચા ભાવ મેળવવાનો શોર્ટકટ
- જીરું કરતા વરિયાળી સસ્તી હોય છે
- વરિયાળીની સાઇઝ અને જીરુંની સાઇઝ એક સરખી હોવાથી ભેળસેળમાં આસાની
- વરિયાળી પર પ્રોસેસ કરીને જીરું જેવું બનાવી લેવાય છે
- ઊંઝાની જાણીતી બ્રાન્ડના નામે પણ વેચાય છે બનાવટી જીરું
- અસલી જીરું સાથે પણ નકલી ભેળસેળ કરી દેતા હોય છે
- લોકોનો જીરુંનો ઉપયોગ થોડો હોવાથી ઝડપથી ભેળસેળની જાણ નથી થતી
