- UKમાં રહેતા ફઈ સાથે જામનગરમાં રહેતા બે ભત્રીજાએ કરી ઠગાઈ
- બંને ભત્રીજાએ મહિલાનું બેન્ક એકાઉન્ટ કર્યું ખાલી
- ઉપાડી લીધેલા નાણાને કેનેડાના બેન્ક એકાઉન્ટમાં કર્યા ટ્રાન્સફર
સગાસંબંધીઓ ઉપર પણ વિશ્વાસ કરતા પહેલા સો વખત વિચાર કરવો પડે તેવો કિસ્સો જામનગરમાંથી સામે આવ્યો છે. જેમાં જામનગરમાં રહેતા બે ભાઈઓએ પોતાના જ ફઈ સાથે ઠગાઈ કરી NRI ફઈના બેન્ક એકાઉન્ટમાંથી બનાવટી સહીના આધારે 5.71 કરોડની ઉચાપત કરી હોવાનું બહાર આવ્યું છે. જેને લઈને UKમાં રહેતા મહિલા જામનગર સીટી એ ડિવિઝન પોલીસ મથકે ફરિયાદ નોંધાવતા પોલીસે કાર્યવાહી હાથ ધરી છે.
બનાવટી સહી કરી બેંક ખાતામાંથી 5.71 કરોડ ઉપાડી લીધા
જામનગર દિગ્વિજય પ્લોટ શેરી નંબર ૪૯ ના ના રહેવાસી, અને હાલ યુ.કે. (યુનાઇટેડ કિંગડમ)માં સ્થાયી થયેલા દિવ્યાબેન વિપુલભાઈ વોરા (ઉ.વ.૬૭) કે જેઓએ તાજેતરમાં ભારત (જામનગર) આવ્યા પછી જામનગરના સીટી એ. ડિવિઝન પોલીસમાં મથકનો સંપર્ક સાધ્યો હતો, અને પોતાના જ બે ભત્રીજાઓ જામનગરમાં ખોડીયાર કોલોની નજીક વૃંદાવન સોસાયટી શેરી નંબર -૨ માં રહેતા કુણાલ વિનોદ શાહ અને કેયુર વિનોદ શાહ સામે રૂપિયા 57102346 ની છેતરપિંડી કર્યા ની ફરિયાદ પોલીસમાં નોંધાવી છે.
વાંચવા જેવું : ભરૂચ: 'સાહેબ મારી સાથે દગો થયો, આર્ય પટેલ આદિલ નીકળ્યો', વિધર્મીની મહોબ્બતનો અસલી ચહેરો સામે આવતા હડકંપ
બેંક ખાતામાં જમા કરાવવા માટે બંને ભત્રીજાઓની મદદ લીધી
પોલીસ ફરિયાદમાં જાણાવાયા અનુસાર ફરિયાદી દિવ્યાબેન વોરા કે જેઓએ પોતાના બે ભત્રીજાઓ કુણાલ શાહ અને કેયુર શાહ પર વિશ્વાસ અને ભરોસો મૂક્યો હતો, અને ૨૦૧૮માં પોતાની રોકડ રકમને ભારતમાં રાખવા માટે અને પોતાના બેંક ખાતામાં જમા કરાવવા માટે બંને ભત્રીજાઓની મદદ લીધી હતી, અને બેંક ખાતુ ખોલાવ્યું હતું. તે દરમિયાન બંને ભત્રીજાઓએ દિવ્યાબેનના પુત્ર નું નામ રાખવાના બદલે જોઈન્ટ એકાઉન્ટમાં પોતાનું નામ રાખીને જે તે વખતે જ છેતરપિંડી કરવાનો પ્લાન ઘડી કાઢ્યો હતો, ત્યારબાદ દિવ્યાબેન દ્વારા પોતાના ખાતામાં અંદાજે ૧૧ કરોડ જેટલી રકમ ભારતીય બેંકના ખાતામાં જમા કરાવી હતી, જે પૈકી કટકે કટકે પ,૭૧,૦૨,૩૪૬ ની રકમ બંને ભાઈઓએ છેતરપિંડી પૂર્વક બનાવટી સહી કરીને ઉપાડી લીધી હતી. જે રકમને કુણાલ શાહ કે જે કેનેડામાં રહે છે, અને ત્યાં કન્ટ્રક્શનનું કામ કરે છે, જેમાં રોકાણ કરવા માટે ડોલરના સ્વરૂપમાં ટ્રાન્સફર કરાવી લીધી હતી.
રિમાન્ડ પર લેવા કાર્યવાહી
દિવ્યાબેન ભારત આવ્યા ત્યારે તેઓના ખાતામાંથી આટલી રકમ ઉપડી ગઈ હોવાનું ધ્યાનમાં આવતાં મામલો પોલીસમાં લઈ જવાયો હતો. જેથી સીટી એ. ડિવિઝનના પોલીસ ઇન્સ્પેક્ટર એન.એ. ચાવડાએ દિવ્યાબેન વોરા ની ફરિયાદ ના આધારે તેના બે ભત્રીજાઓ કુણાલ વિનોદરાય શાહ અને કેયુર વિનોદરાય શાહ સામે આઇપીસી કલમ ૪૦૬,૪૨૦,૪૬૫,૪૬૭,૪૭૧ અને ૧૧૪ મુજબ ગુનો નોંધ્યો છે, અને બંને ભાઈઓની અટકાયત કરી લઈ રિમાન્ડ પર લેવા કાર્યવાહી હાથ ધરી છે.
