વિશ્વ / યુક્રેને રંગ બતાવ્યો! ભારત પર એકસ્ટ્રા ટેરિફ મુદ્દે ટ્રમ્પની પીઠ થાબડી, કારણ જાણી ખીજ ચડશે

યુક્રેનના રાષ્ટ્રપતિ વોલોડીમીર ઝેલેન્સકીએ અમેરિકાના ભારત પર 50 ટકા ટેરિફ લાદવાના નિર્ણયને યોગ્ય ઠેરવ્યો છે. ઝેલેન્સકીએ સ્પષ્ટ કર્યું કે રશિયા સાથે વેપાર કરતા દેશો પર કડક પ્રતિબંધો જરૂરી છે, કેમ કે રશિયા પોતાના તેલ અને ગેસના વેપારથી જ યુદ્ધ માટે નાણાં ભેગા કરી રહ્યો છે. તેમની દલીલ હતી કે જો અમેરિકા એવા દેશો સામે પગલાં લઈ રહ્યું છે, જે રશિયાની મદદ કરે છે, તો તેમાં કોઈ ખોટ નથી.

એક ઈન્ટરવ્યુમાં ઝેલેન્સકીને પૂછવામાં આવ્યું કે SCO સમિટમાં ભારત, ચીન અને રશિયા સાથે જોવા મળ્યા હતા, ત્યારે શું અમેરિકાનો ભારત પર ટેરિફ લાદવાનો નિર્ણય ઉલટો સાબિત થયો છે? આ પ્રશ્નના જવાબમાં ઝેલેન્સકીએ કહ્યું કે “ટ્રમ્પ જાણે છે કે પુતિનને કેવી રીતે રોકવું.” તેમની દલીલ હતી કે પુતિનનું સૌથી મોટું હથિયાર તેલ અને ગેસ છે, જેને વેચીને તે પોતાની સૈનિક શક્તિ જાળવી રાખે છે. આ શક્તિ પર નિયંત્રણ લાવવું જ જરૂરી છે.

500થી વધુ ડ્રોન

તાજેતરમાં જ, 3 સપ્ટેમ્બરના રોજ રશિયાએ યુક્રેન પર રાતોરાત 500થી વધુ ડ્રોન અને બે ડઝન મિસાઇલો છોડ્યા હતા. ઝેલેન્સકીએ જણાવ્યું હતું કે આ હુમલાનું મુખ્ય લક્ષ્ય નાગરિક માળખાકીય સુવિધાઓ, ખાસ કરીને ઉર્જા પ્રોજેક્ટ્સ હતા. રશિયા શિયાળાની મોસમ પહેલા યુક્રેનને ઉર્જા સંકટમાં ધકેલવાની નીતિ અપનાવી રહ્યું છે. યુક્રેનિયન વાયુસેનાના જણાવ્યા મુજબ આ હુમલાઓમાં મુખ્યત્વે પશ્ચિમ અને મધ્ય યુક્રેન નિશાન બન્યા અને ઓછામાં ઓછા પાંચ લોકો ઘાયલ થયા. ઝેલેન્સકીએ અગાઉ પણ અમેરિકાના ભૂતપૂર્વ રાષ્ટ્રપતિ ડોનાલ્ડ ટ્રમ્પના યુદ્ધવિરામના પ્રયાસો સ્વીકાર્યા હતા અને રશિયન રાષ્ટ્રપતિ વ્લાદિમીર પુતિન સાથે શાંતિ વાટાઘાટો કરવાની તૈયારીઓ દર્શાવી હતી, પરંતુ ક્રેમલિને તેનો વિરોધ કર્યો હતો.

SCO સમિટ દરમિયાન મળ્યા

આ વચ્ચે રશિયન રાષ્ટ્રપતિ પુતિન તાજેતરમાં ચીનના નેતા શી જિનપિંગ, ઉત્તર કોરિયાના નેતા કિમ જોંગ ઉન અને ભારતના વડાપ્રધાન નરેન્દ્ર મોદીને SCO સમિટ દરમિયાન મળ્યા હતા. અમેરિકાનું માનવું છે કે આ દેશો રશિયાના યુદ્ધ પ્રયાસોને મજબૂત કરી રહ્યા છે. અમેરિકા મુજબ, ઉત્તર કોરિયા રશિયાને દારૂગોળો મોકલે છે, જ્યારે ચીન અને ભારત રશિયાનું તેલ ખરીદી રહ્યા છે, જે પરોક્ષ રીતે રશિયાના યુદ્ધ અર્થતંત્રને મજબૂત બનાવે છે.

આ પણ વાંચો : અમેરિકામાં ગુજરાતી મહિલાએ કર્યું ગજબનું, હાથ જોડીને માફી માગવી પડી, વીડિયો વાયરલ

ઝેલેન્સકીએ ટેલિગ્રામ પર એક સંદેશમાં જણાવ્યું હતું કે “પુતિન પોતાની અભેદ્યતા દર્શાવી રહ્યો છે. માત્ર પૂરતા દબાણનો અભાવ, ખાસ કરીને યુદ્ધ અર્થતંત્ર પર, રશિયાને આક્રમકતા ચાલુ રાખવા પ્રોત્સાહિત કરે છે.” તેથી જ તેમણે રશિયા સામે વધુ કડક પ્રતિબંધો લાદવાની હાકલ કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ