National / જાપાનમાં મહિલા સાથે છેડતીના આરોપમાં ભારતીય ખેલાડીની અટકાયત, દેશ પરત મોકલાયો!

જે ખેલાડી ભારત માટે મેડલ જીતવાનું સપનું લઈને જાપાન પહોંચ્યા હતા, તેમને એકપણ સ્પર્ધામાં ભાગ લીધા વિના જ સ્વદેશ પરત ફરવું પડ્યું છે. ભારતીય પેરા-સ્વિમિંગ જગતમાં એક ગંભીર ઘટના સામે આવી છે. જાણીતા પેરા-સ્વિમર મોહમ્મદ શમ્સ આલમ શેખ પર જાપાનની એક હોટલમાં મહિલા કર્મચારી સાથે જાતીય સતામણી અને છેડતી કરવાનો આરોપ લાગ્યો છે. આ મામલે ફરિયાદ નોંધાયા બાદ જાપાની પોલીસે તેમની અટકાયત કરી હતી. એટલું જ નહીં, આ ઘટનાને પગલે હવે તેમની રમતગમતની કારકિર્દી પર પણ મોટું સંકટ ઊભું થયું છે. પેરાલિમ્પિક કમિટી ઓફ ઈન્ડિયા (PCI) તેમના પર આજીવન પ્રતિબંધ મૂકવા અંગે વિચારણા કરી રહી છે.

મળતી માહિતી મુજબ, આ કથિત ઘટના સોમવારે જાપાનની તે હોટલમાં બની હતી, જ્યાં ભારતીય પેરા-સ્વિમિંગ ટીમ રોકાઈ હતી. ભારતીય ટીમના એક સૂત્રના જણાવ્યા અનુસાર, ઘટના સમયે મોહમ્મદ શમ્સ આલમ શેખના રૂમમાં એક મહિલા હાઉસકીપિંગ કર્મચારી કામ કરી રહી હતી. આ દરમિયાન મહિલા કર્મચારી સાથે કથિત રીતે જાતીય સતામણી અને છેડતીની ઘટના બની હોવાનો આરોપ છે. ત્યારબાદ મહિલા કર્મચારીની ફરિયાદ સ્થાનિક આયોજન સમિતિ અને ભારતીય ટીમના અધિકારીઓ સુધી પહોંચી હતી. આયોજન સમિતિએ પણ ભારતીય અધિકારીઓને આ મામલાની જાણ કરી હતી.

તાત્કાલિક કાર્યવાહી કરીને મોહમ્મદ શમ્સ આલમ શેખની અટકાયત કરી

મહિલા કર્મચારીની ફરિયાદ બાદ જાપાની પોલીસે તાત્કાલિક કાર્યવાહી કરીને મોહમ્મદ શમ્સ આલમ શેખની અટકાયત કરી હતી. ત્યારબાદ મંગળવારે તેમને ભારત પરત મોકલી દેવામાં આવ્યા હતા. શેખ જાપાનમાં યોજાનારી એશિયન પેરા ગેમ્સમાં ભારતનું પ્રતિનિધિત્વ કરવા પહોંચ્યા હતા. જોકે, આ આરોપો સામે આવ્યા બાદ તેઓ એકપણ ઇવેન્ટમાં ભાગ લઈ શક્યા નહોતા. આમ, મેડલ જીતવાની આશા સાથે જાપાન પહોંચેલા આ ખેલાડીને સ્પર્ધા શરૂ થાય તે પહેલાં જ પરત ફરવું પડ્યું હતું.

પેરાલિમ્પિક કમિટી ઓફ ઈન્ડિયા (PCI) ગંભીરતાથી લઈ રહી

આ સમગ્ર મામલાને પેરાલિમ્પિક કમિટી ઓફ ઈન્ડિયા (PCI) ગંભીરતાથી લઈ રહી છે. અહેવાલો અનુસાર, કમિટી મોહમ્મદ શમ્સ આલમ શેખ સામે કડક શિસ્તભંગનાં પગલાં લેવાનું વિચારી રહી છે. આ કાર્યવાહીમાં તેમના પર આજીવન પ્રતિબંધ મૂકવાનો પ્રસ્તાવ પણ સામેલ છે. જોકે, અત્યાર સુધી આ અંગે કોઈ અંતિમ નિર્ણય લેવામાં આવ્યો નથી. રમતો પૂર્ણ થયા બાદ સમગ્ર ઘટનાની સમીક્ષા કરવામાં આવશે અને ત્યારબાદ ઔપચારિક નિર્ણય લેવામાં આવી શકે છે. જો આજીવન પ્રતિબંધ મૂકવામાં આવશે તો શેખની રમતગમતની કારકિર્દીને મોટો ફટકો પડી શકે છે.

વાત કરીએ તો તેઓ મૂળ બિહારના રહેવાસી

મોહમ્મદ શમ્સ આલમ શેખની વાત કરીએ તો તેઓ મૂળ બિહારના રહેવાસી છે અને ભારતના અનુભવી પેરા-સ્વિમિંગ ખેલાડીઓમાં તેમની ગણતરી થાય છે. તેમણે આંતરરાષ્ટ્રીય સ્તરે અનેક સ્પર્ધાઓમાં ભારતનું પ્રતિનિધિત્વ કર્યું છે. વર્લ્ડ પેરા સ્વિમિંગના રેકોર્ડ મુજબ, તેઓ પુરુષોની 100 મીટર બટરફ્લાય (S5) અને 50 મીટર બ્રેસ્ટસ્ટ્રોક (SB4) કેટેગરીમાં વિશ્વમાં નંબર 1 રેન્કિંગ ધરાવતા હોવાનું જણાવાયું છે. પેરા-સ્વિમિંગ ક્ષેત્રે તેમના પ્રદર્શનને કારણે તેઓ જાણીતા બન્યા છે.

એશિયન પેરા ગેમ્સમાં ભારતનું પ્રતિનિધિત્વ કર્યું

શેખે વર્ષ 2018માં જકાર્તામાં યોજાયેલી એશિયન પેરા ગેમ્સમાં ભારતનું પ્રતિનિધિત્વ કર્યું હતું. આપેલી માહિતી મુજબ, તેમણે 200 મીટર અને 50 મીટર બ્રેસ્ટસ્ટ્રોક ઇવેન્ટમાં ગોલ્ડ મેડલ જીત્યા હતા. આ ઉપરાંત વર્ષ 2025માં યોજાયેલી રેકજાવિક ઇન્ટરનેશનલ ગેમ્સમાં પણ તેમણે શાનદાર પ્રદર્શન કર્યું હતું. આ સ્પર્ધામાં 200 મીટર બ્રેસ્ટસ્ટ્રોકમાં ગોલ્ડ મેડલ જીતવાની સાથે ભારતીય અને એશિયન રેકોર્ડ બનાવ્યા હોવાનું જણાવાયું છે. આમ, આંતરરાષ્ટ્રીય સ્તરે તેમની અનેક સિદ્ધિઓ રહી છે.

આ પણ વાંચો : 23 ઓક્ટોબરે SIR વિરુદ્ધ વિરોધ પ્રદર્શન, નાણામંત્રી નિર્મલા સીતારમણના પતિ પરકલા પ્રભાકર પણ જોડાશે!

મોહમ્મદ શમ્સ આલમ શેખ વર્ષ 2026માં જાપાનના નાગોયામાં યોજાનારી એશિયન પેરા ગેમ્સમાં સતત ત્રીજી વખત ભાગ લેવાના હતા. જોકે, મહિલા હોટલ કર્મચારી દ્વારા કરવામાં આવેલા ગંભીર આરોપોને કારણે તેઓ આ વખતે સ્પર્ધામાં ભાગ લઈ શક્યા નથી. હવે સૌની નજર પેરાલિમ્પિક કમિટી ઓફ ઈન્ડિયાના આગામી નિર્ણય પર છે. કમિટી તપાસ અને સમીક્ષા બાદ શું કાર્યવાહી કરે છે તે જોવાનું રહેશે. મહત્વનું છે કે શેખ સામે હાલ આરોપો મૂકવામાં આવ્યા છે અને આ આરોપો અંગે કોઈ અંતિમ દોષિત ઠરાવતો નિર્ણય સામે આવ્યો હોવાની માહિતી આપવામાં આવી નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ