વિશ્વ / POKમાં પાકિસ્તાન વિરુદ્ધ બળવો, પાક સેનાએ કર્યો ગોળીબાર, 26 લોકોના મોત

પાકિસ્તાનના કબજાવાળા કાશ્મીરમાં ફરી એકવાર બળવાની આગ ભડકી ઉઠી છે. રવિવારે (7 જૂન) સમગ્ર પીઓકેમાં અવામી એક્શન કમિટીના બેનર હેઠળ બંધ અને પ્રદર્શનનું એલાન કરવામાં આવ્યું હતું. સોમવારે (8 જૂન) લંડન સ્થિત પાકિસ્તાની હાઇ કમિશનની બહાર પીઓકેના પ્રવાસીઓએ પાકિસ્તાન સરકાર અને સેના વિરુદ્ધ પ્રદર્શન કર્યું હતું. "પાકિસ્તાની સેના પાછા ફરો" ની માંગણી કરતા નારા પણ લગાવવામાં આવ્યા હતા. જ્યારે બીજી બાજુ પીઓકેના રાવલકોટમાં પાકિસ્તાની સેના અને રેન્જર્સે ફરી એકવાર નાગરિકો પર ગોળીબાર અને પેલેટ ગન ચલાવી હતી.

રવિવાર રાતથી સોમવાર સાંજ સુધી રાવલકોટમાં પાકિસ્તાની સેના અને રેન્જર્સ દ્વારા કરવામાં આવેલા દમનમાં પીઓકેના કુલ 26 લોકોએ જીવ ગુમાવ્યા છે, અને 190 થી વધુ લોકો ઘાયલ થયા છે, જેમાંથી ઘણાના શરીર પર પેલેટ ગનના છરાના નિશાન છે. વધુમાં પીઓકેની રાજધાની મુઝફ્ફરાબાદમાં કર્ફ્યુ લાદવામાં આવ્યો છે અને આખું શહેર હાલમાં બંધ છે. સત્તાવાર આંકડાઓથી વિપરીત પીઓકેના રહેવાસીઓ વીડિયો નિવેદનો જાહેર કરી રહ્યા છે જેમાં આરોપ લગાવવામાં આવી રહ્યો છે કે રાવલકોટમાં પાકિસ્તાની સેનાના દમનમાં 100 થી 150 લોકો માર્યા ગયા છે.

ચાર પોલીસકર્મીઓ પણ માર્યા ગયા

રાવલકોટમાં પાકિસ્તાની સેનાના ગોળીબારના જવાબમાં નાગરિકોએ પાકિસ્તાની રેન્જર્સ અને પીઓકે પોલીસ પર લાકડીઓથી હુમલો કર્યો, જેના પરિણામે ચાર પોલીસકર્મીઓ માર્યા ગયા. તેવી જ રીતે રાવલકોટમાં પાકિસ્તાનના લોકોએ પાકિસ્તાની સેનાને બાંગ્લાદેશ મુક્તિ સંગ્રામની યાદ અપાવતા ત્રણ પાકિસ્તાની રેન્જર્સને પકડી લીધા અને તેમના કપડાં એક ચોકમાં લટકાવી દીધા.

આ પણ વાંચોઃ 8.2 ની તીવ્રતાના ભૂકંપથી ધ્રૂજી ઉઠી આ દેશની ધરા, સાથે સુનામીનું એલર્ટ

પીઓકેમાં ઇન્ટરનેટ બંધ

ગયા શુક્રવારથી પીઓકેમાં ઇન્ટરનેટ બંધ છે, અને અનિશ્ચિત વિરોધ શરૂ થાય તે પહેલાં જ પાકિસ્તાની સૈન્ય અને નાગરિકો વચ્ચે અથડામણો ચાલુ છે. આજે રાવલકોટના નાગરિકોએ પાકિસ્તાની સેનાને "આતંકવાદી" પણ ગણાવી અને ચેતવણી આપી હતી કે જો આવતીકાલે વિરોધ પ્રદર્શન કરતી વખતે પાકિસ્તાની સેના ફરીથી નાગરિકો પર ગોળીબાર કરશે તો પીઓકેના લોકો આરપારની લડાઇ માટે તૈયાર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ