મોટી કાર્યવાહી / યુક્રેન રાષ્ટ્રપતિ ઝેલેન્સ્કી એક્શનમાં: રક્ષામંત્રી ઓલેક્સીને પદ પરથી કર્યા બરખાસ્ત, જાણો શા કારણ

• રશિયા-યુક્રેન યુદ્ધ વચ્ચે મોટા સમાચાર
• યુક્રેનના રાષ્ટ્રપતિ વોલોદિમિર ઝેલેન્સકીનું મોટું પગલું  
• સંરક્ષણ પ્રધાન ઓલેકસી રેઝનિકોવને બરતરફ કર્યા
• ઓલેકસીના સ્થાને ક્રિમીયન સાંસદ રૂસ્તમ ઉમેરોવની નિમણૂક થશે

યુક્રેનથી એક મોટા સમાચાર સામે આવી રહ્યા છે. વાત જાણે એમ છે કે, યુક્રેનના રાષ્ટ્રપતિ વોલોદિમિર ઝેલેન્સકીએ એક મોટું પગલું ભર્યું છે. રવિવારે ઝેલેન્સકીએ સંરક્ષણ પ્રધાન ઓલેકસી રેઝનિકોવને બરતરફ કર્યા. ઓલેકસીના સ્થાને ક્રિમીયન સાંસદ રૂસ્તમ ઉમેરોવની નિમણૂક કરવામાં આવશે.

ઝેલેન્સકીએ તેમના સત્તાવાર ટેલિગ્રામ એકાઉન્ટ પર જાહેરાત કરી કે, 550 દિવસથી વધુના યુદ્ધ માટે ઉમેરોવ જેવા નવા નેતૃત્વની જરૂર છે. ઝેલેન્સકીએ વધુમાં કહ્યું કે, તેઓ માને છે કે સંરક્ષણ મંત્રાલયે નવા અભિગમો અને વિવિધ સ્વરૂપો હેઠળ સૈન્ય અને નાગરિક વસ્તી બંને સાથે ક્રિયાપ્રતિક્રિયા વધારવાની જરૂર છે.

કોણ છે રૂસ્તમ ઉમેરોવ ? 
વિરોધી હોલોસ પાર્ટીના 41 વર્ષીય ઉમેરોવ સપ્ટેમ્બર 2022 થી યુક્રેનના સ્ટેટ પ્રોપર્ટી ફંડના વડા તરીકે સેવા આપી રહ્યા છે. તેઓ યુદ્ધ કેદીઓ, નાગરિકો અને કબજા હેઠળના પ્રદેશોમાંથી બાળકોને સુરક્ષિત બહાર કાઢવામાં પણ સામેલ હતા. યુમેરોવ યુએન સમર્થિત અનાજ સોદા પર રશિયા સાથેની વાટાઘાટોમાં યુક્રેનિયન પ્રતિનિધિમંડળનો પણ ભાગ હતા.

ઓગસ્ટમાં સંરક્ષણ મંત્રાલય દ્વારા લશ્કરી જેકેટની ખરીદીને લઈને કૌભાંડ બહાર આવ્યું હતું, જેના કારણે ઓલેકસીને હટાવવાની વાત થઈ હતી. યુક્રેનિયન તપાસ પત્રકારોએ જાહેર કર્યું કે લશ્કરી સાધનો સામાન્ય કરતાં ત્રણ ગણા વધુ ભાવે ખરીદવામાં આવ્યા હતા અને શિયાળાના જેકેટને બદલે ઉનાળાના જેકેટનો ઓર્ડર આપવામાં આવ્યો હતો.

સપ્લાયરના કસ્ટમ દસ્તાવેજોમાં જેકેટની કિંમત પ્રતિ યુનિટ US$29 હતી, પરંતુ સંરક્ષણ મંત્રાલયે પ્રતિ યુનિટ US$86 ચૂકવ્યા હતા. રેઝનિકોવે ગયા અઠવાડિયે પ્રેસ કોન્ફરન્સ દરમિયાન આરોપોને નકારી કાઢ્યા હતા. દરમિયાન યુએસ પ્રમુખ જો બિડેને રવિવારે ડેલાવેરમાં જણાવ્યું હતું કે તેઓ જાણે છે કે, ઝેલેન્સકીએ તેમના સંરક્ષણ વડાનું સ્થાન લીધું છે. જોકે તેમણે આ અંગે ટિપ્પણી કરવાનો ઇનકાર કર્યો હતો.