વધુ એક આફત / રશિયાને ચારે બાજુથી ઘેરવાનો પ્લાન : વધુ બે દેશોએ ઠોકી દીધા પ્રતિબંધો, આવું જ રહ્યું તો થઈ જશે કંગાળ

• રશિયા પર એક બાદ એક દેશો મૂકી રહ્યાં છે પ્રતિબંધ
• કેનેડાએ રશિયા પાસેથી તેલની આયાત પર  મૂક્યો પ્રતિબંધ
• બ્રિટને પણ તમામ રશિયન બેંકોની સંપત્તિ ફ્રીઝ કરવાની કરી જાહેરાત

માત્ર એટલું જ નહીં રશિયા દ્વારા ન્યુક્લિયર ડિટરન્ટ ફોર્સને હાઈ એલર્ટ પર રાખ્યા બાદ અમેરિકાએ પણ પોતાના ન્યુક્લિયર ફોર્સને એલર્ટ કરી દીધું છે. તો યુક્રેનની સરકારે પણ રશિયા પર નરસંહાર કરવાનો આરોપ લગાવતા આંતરરાષ્ટ્રીય કોર્ટનો સંપર્ક કર્યો હતો. ત્યાર બાદ કોર્ટ તરફથી કહેવામાં આવ્યું કે, 'તેઓ યુક્રેનની સ્થિતિની તપાસ કરશે.'

કેનેડાએ રશિયા પાસેથી તેલની આયાત પર મૂક્યો પ્રતિબંધ

રશિયાને આર્થિક નુકસાન પહોંચાડવાની દિશામાં કેનેડાએ મોટું પગલું ભર્યું છે. કેનેડાના વડાપ્રધાન જસ્ટિન ટ્રુડોએ રશિયા પાસેથી તેલની આયાત પર પ્રતિબંધ મૂકી દીધો છે. માત્ર એટલું જ નહીં, કેનેડાએ યુક્રેનને સૈન્ય મદદની પણ જાહેરાત કરી છે. મહત્વનું છે કે, કેનેડાનો આ નિર્ણય રશિયાને મોટું નુકસાન પહોંચાડી શકે છે.

તુર્કી પણ આવ્યું એક્શનમાં

અત્યાર સુધી આ મામલામાં તટસ્થ ભૂમિકા ભજવી રહેલું તુર્કી પણ હવે એક્શનમાં આવી ગયું છે. તુર્કીના રાષ્ટ્રપતિએ કહ્યું કે, તેમનો દેશ એક આંતરરાષ્ટ્રીય સંમેલનનો અમલ કરશે કે જે તુર્કીને કાળા સમુદ્રમાં પ્રવેશવા માટે જલડમરૂમધ્યને બંધ કરવાની મંજૂરી આપે છે. બે યુદ્ધ કરી રહેલા દેશોના યુદ્ધ જહાજોને કાળા સમુદ્રમાં પ્રવેશતા અટકાવવામાં આવશે. નોંધનીય છે કે, તુર્કીએ થોડાં દિવસો પહેલાં એક રશિયન યુદ્ધ જહાજને કાળા સમુદ્રમાં જતા અટકાવ્યું હતું.

ફિનલેન્ડ પણ યુક્રેનને આપશે હથિયાર

અત્યાર સુધી આ યુદ્ધમાં એકલા પડી ગયેલા યુક્રેનને સૈન્ય મદદ આપવા માટે ઘણાં દેશો આગળ આવી રહ્યાં છે. ત્યારે હવે બ્રિટન અને કેનેડા બાદ ફિનલેન્ડએ પણ રશિયાને સૈન્ય મદદ આપવાનો નિર્ણય કર્યો છે. ફિનલેન્ડના વડાપ્રધાને યુક્રેનને શસ્ત્ર સપ્લાય કરવાના નિર્ણયને ઐતિહાસિક નિર્ણય ગણાવ્યો છે. ફિનિશ સંસદમાં NATO સભ્યપદ સંબંધિત અરજી સાથે સંબંધિત મામલાને કેવી રીતે હેન્ડલ કરવો તે અંગે ચર્ચાઓ થઈ રહી છે.

38 દેશો માટે રશિયાએ બંધ કરી પોતાની એરસ્પેસ

રશિયાના હુમલા બાદ અનેક દેશોએ રશિયન એરક્રાફ્ટ માટે પોતાની એરસ્પેસ બંધ કરી દીધી હતી. ત્યાર બાદ રશિયાએ જવાબી કાર્યવાહી કરીને 36 દેશો માટે પોતાની એરસ્પેસ બંધ કરી દીધી હતી. રશિયાએ જે દેશો માટે એરસ્પેસ બંધ કરી છે તેમાં ફિનલેન્ડ, હંગેરી, ડેનમાર્ક, ગ્રીસ, આયર્લેન્ડ, ઇટાલી, અલ્બેનિયા, બ્રિટન, ફ્રાન્સ, એસ્ટોનિયા સહિત અનેક દેશો સામેલ છે.