ક્રિકેટ / ચેમ્પિયન ટ્રોફી રમવા ટીમ ઈન્ડીયા પાકિસ્તાન જશે? BCCI ઉપાધ્યક્ષે આપ્યું મોટું નિવેદન

2025થી પાકિસ્તાનમાં ચેમ્પિયન ટ્રોફી શરુ થઈ રહી છે. ટીમ ઈન્ડીયા ચેમ્પિયન ટ્રોફી રમવા પાકિસ્તાન નહીં જાય તેવું BCCI સચિવ જય શાહ પહેલેથી કહી ચૂક્યાં છે. હવે ટીમ ઈન્ડીયા પાકિસ્તાનમાં રમવા જશે કે નહીં તેના નિર્ણયની જવાબદારી BCCI ઉપાધ્યક્ષ રાજીવ શુક્લાએ કેન્દ્ર સરકાર પર નાખી છે.

શું બોલ્યાં રાજીવ શુક્લા

બીસીસીઆઇના વાઈસ પ્રેસિડેન્ટ રાજીવ શુક્લાએ જણાવ્યું કે ભારતીય ટીમ પાકિસ્તાન જશે કે નહીં તેનો નિર્ણય ભારત સરકાર જ લેશે. તેના નિર્ણયને આપણે બધાએ સ્વીકારવો પડશે. ચેમ્પિયન્સ ટ્રોફીના કિસ્સામાં, અમે ભારત સરકાર જે કહેશે તે કરીશું. અમે અમારી ટીમ ત્યારે જ મોકલીએ છીએ જ્યારે ભારત સરકાર મંજૂરી આપે. તેવામાં અમે ભારત સરકારના નિર્ણય અનુસાર આગળ વધીશું.

જય શાહ શું બોલ્યાં હતા

ફેબ્રુઆરી 2024માં જય શાહે પણ આ મામલે નિવેદન આપ્યું હતું. ત્યારે રાજકોટના સૌરાષ્ટ્ર ક્રિકેટ એસોસિએશન (એસસીએ) ક્રિકેટ સ્ટેડિયમનું નામ બદલીને પૂર્વ ફર્સ્ટ ક્લાસ પ્લેયર અને સિનિયર એડમિનિસ્ટ્રેટર નિરંજન શાહના નામ પરથી કરવામાં આવ્યું હતું. આ પ્રસંગે જય શાહે કહ્યું હતું, 'હું તે કેવી રીતે નક્કી કરી શકું. આઇસીસી નિર્ણય લેશે. જય શાહે કહ્યું કે, ટુર્નામેન્ટમાં હજુ એક વર્ષ બાકી છે અને આ એક વર્ષમાં મને ખબર નથી કે, પરિસ્થિતિમાં કેટલો ફેરફાર થશે.

વધુ વાંચો : VIDEO : પ્રાઈવેટ પાર્ટ પર એટલા જોરથી બોલ વાગ્યો કે તરત મર્યો છોકરો, મેદાનમાં હાહાકાર

છેલ્લે ક્યારે ટીમ ઈન્ડીયા પાકિસ્તાન ગઈ હતી?

ભારતીય ટીમે છેલ્લે 2008માં પાકિસ્તાન ગઈ હતી ત્યાર બાદ મહેન્દ્રસિંહ ધોનીની કેપ્ટનશિપમાં ભારતીય ટીમ પાકિસ્તાન પ્રવાસ પર એશિયા કપ રમી હતી. ટીમ ફાઇનલમાં પહોંચી હતી, જ્યાં તેને શ્રીલંકાએ 100 રનથી હરાવી હતી.