બેંગલુરુ / પ્લેન ટેક ઓફ થતા જ એર ઈન્ડિયા એક્સપ્રેસના એન્જિનમાં લાગી આગ, તમામ 179 મુસાફરો સુરક્ષિત

Fire on Air India Express flight : બેંગલુરુથી કોચી જઈ રહેલી એર ઈન્ડિયા એક્સપ્રેસ ફ્લાઈટને બેંગલુરુ એરપોર્ટ પર ઈમરજન્સી લેન્ડિંગ કરવામાં આવ્યું છે. વાત જાણે એમ છે કે, બેંગલુરુ ઈન્ટરનેશનલ એરપોર્ટ લિમિટેડે રવિવારે આ જાણકારી આપી. એર ઈન્ડિયા એક્સપ્રેસે એક નિવેદનમાં જણાવ્યું હતું કે, તમામ મુસાફરો અને ક્રૂને બહાર કાઢવામાં આવ્યા છે અને કોઈ જાનહાનિ થઈ નથી. સૂત્રોના જણાવ્યા અનુસાર પ્લેન ટેક ઓફ થયાની થોડી જ મિનિટોમાં આગ લાગી હતી. આ પછી ક્રૂ મેમ્બરોએ એર ટ્રાફિક કંટ્રોલરને સંદેશો આપ્યો અને તાત્કાલિક ઇમરજન્સી જાહેર કરી. આ પછી બેંગલુરુના કેમ્પેગૌડા ઈન્ટરનેશનલ એરપોર્ટ પર ઈમરજન્સી લેન્ડિંગ કરવામાં આવ્યું હતું અને આગને તાત્કાલિક કાબૂમાં લેવામાં આવી હતી.

કોચી જઈ રહી હતી ફ્લાઈટ

KIA નું સંચાલન કરતા BIAL ના પ્રવક્તાએ એક નિવેદનમાં જણાવ્યું હતું કે 18 મે, 2024 ના રોજ IX1132માં બેંગલુરુથી કોચીમાં આગ લાગવાની માહિતી મળતાં લગભગ 11.30 વાગ્યે BLR એરપોર્ટ પર ઇમરજન્સી લેન્ડિંગ કરવામાં આવ્યું હતું લેન્ડિંગ બાદ તરત જ વિમાનને નિયંત્રણમાં લાવવામાં આવ્યું હતું.

વધી વાંચો: PM મોદીએ રશિયા અને યુક્રેન વચ્ચે પરમાણુ યુદ્ધ અટકાવ્યું, એસ જયશંકરે કર્યો ખુલાસો

તમામ મુસાફરોને સુરક્ષિત બહાર કાઢવામાં આવ્યા

BIALના પ્રવક્તાએ જણાવ્યું હતું કે, વિમાનમાંથી તમામ 179 મુસાફરો અને છ ક્રૂ સભ્યોને સફળતાપૂર્વક ફ્લાઇટમાંથી બહાર કાઢવામાં આવ્યા હતા. એર ઈન્ડિયા એક્સપ્રેસના પ્રવક્તાએ જણાવ્યું કે, ટેકઓફ કર્યા બાદ જમણા એન્જિનમાં આગ લાગી હતી. ક્રૂએ કોઈપણ મુસાફરોને ઈજા પહોંચાડ્યા વિના સ્થળાંતર પૂર્ણ કર્યું. અમને થયેલી કોઈપણ અસુવિધા બદલ અમે દિલગીર છીએ અને અમારા મહેમાનોને શક્ય તેટલી ઝડપથી તેમના ગંતવ્ય સ્થાને પહોંચવા માટે વૈકલ્પિક વ્યવસ્થા પૂરી પાડવા માટે કામ કરી રહ્યા છીએ. આ તરફ હવે પ્લેનના એન્જિનમાં આગ લાગવાના કારણની તપાસ કરવામાં આવી રહી છે.