ગંભીર અકસ્માત / ઉપલેટા નજીક કાર ચાલકે બાઈકને અડફેટે લેતાં 2નાં કમાકમાટીભર્યા મોત, એક ઇજાગ્રસ્ત

• ઉપલેટામાં કાર ચાલકે બાઇક સવારને અડફેટે લીધા
• 2 યુવકોના ઘટનાસ્થળે જ કરૂણ મોત
• અન્ય એક ઇજાગ્રસ્ત યુવકને સારવાર અર્થે ખસેડાયો

રાજ્યમાં અવારનવાર અકસ્માતની ઘટનાઓ સામે આવતી રહેતી હોય છે. ત્યારે તાજેતરમાં જ વધુ એક અકસ્માતની ઘટના સામે આવી છે. જેમાં ઉપલેટામાં એક કાર ચાલકે બાઇક સવારને અડફેટે લેતા 2નાં મોત નિપજ્યાં છે અને એક વ્યક્તિ ઇજાગ્રસ્ત થઇ છે.

પાછળથી બાઇકને ટક્કર મારતા બે યુવકોના મોત

વધુ વિગતવાર તમને જણાવી દઇએ કે, રાજકોટ જિલ્લાના ઉપલેટા નજીક આવેલા વાડાસડા ગામની ચોકડી નજીક વેરાવળ પાસિંગ GJ/32/B/2071 નંબરની i20 ના કારચાલકે GJ/10/BA/1939 નંબરની સ્પ્લેન્ડર બાઇકને ટક્કર મારી હતી. જેની પર ત્રણ યુવકો સવાર હતા તેને પાછળથી જોરદાર ટક્કર મારતા અકસ્માતમાં બે યુવકોના મોત નિપજ્યા હતા. જ્યારે અન્ય એક યુવક ઇજાગ્રસ્ત થયો છે.

આ અકસ્માતમાં બાઇક પર સવાર ત્રણ યુવકો પૈકી એક યુવક સામત ઉર્ફે ભોલો ધનજીભાઈ ચૌહાણ કે જેઓનું ઘટનાસ્થળે મોત નિપજ્યું છે. જ્યારે બીજા મહેશ ઉર્ફે મનોજ ધનજીભાઈ ચૌહાણ નામના યુવકનું ઉપલેટા કોટેજ હોસ્પિટલ ખાતે સારવાર દરમિયાન મોત નિપજ્યું હતું. આ બંને મૃતક યુવકો સગા ભાઈઓ હોવાનું જાણવા મળ્યું અને આ બંને મૃતક યુવકો જામજોધપુર તાલુકાના નાની ગોપ ગામના રહેવાસી હતા. જ્યારે અકસ્માતમાં નગીન લાલજીભાઈ ઉર્ફે લાલાભાઈ ઢાકેચા નામનો યુવક ઇજાગ્રસ્ત થતાં તેને સારવાર અર્થે ઉપલેટા કોટેજ હોસ્પિટલ ખાતે ખસેડવામાં આવ્યો હતો.

બંને મૃતક યુવકોને પીએમ અર્થે ખસેડવામાં આવ્યા

જો કે, આ અકસ્માતની જાણ થતા જ સ્થાનિક લોકો દ્વારા ઇજાગ્રસ્ત યુવકોને હોસ્પિટલમાં ખસેડવામાં આવ્યાં હતાં. આ ઘટનાની જાણ થતા પોલીસ પણ તુરંત હોસ્પિટલ ખાતે ઘટનાસ્થળે દોડી આવી હતી અને બંને મૃતક યુવકોને પીએમ અર્થે ખસેડવામાં આવ્યા અને આ મામલે હાલમાં પોલીસ દ્વારા આગળની તપાસ હાથ ધરવામાં આવી રહી છે.

બનાસકાંઠા જિલ્લામાં પણ અકસ્માતમાં એક યુવકનું મોત

બીજી બાજુ બનાસકાંઠા જિલ્લામાં પણ અકસ્માતમાં એક યુવકનું મોત નિપજ્યું છે. મળતી માહિતી મુજબ, બનાસકાંઠાના ધાનેરા નેનાવા હાઇવે પર હિટ એન્ડ રનની ઘટના ઘટી છે. જેમાં ધાખા પાટિયા પાસે બાઈકને ટક્કર મારી એક અજાણ્યો વાહન ચાલક ફરાર થઈ ગયો હતો. જેમાં 32 વર્ષીય યુવકનું ઘટનાસ્થળે જ મોત થયું હતું. આ અકસ્માતના સમાચાર મળતા ધાનેરા પોલીસ ઘટનાસ્થળે દોડી ગઈ હતી. પોલીસે મૃતક યુવકની લાશને પોસ્ટ મોર્ટમ માટે મોકલી હતી.