ક્રાઇમ / જાહેરમાં ફોન પર વાત કરવાની આદત હોય તો ચેતી જજો! અમદાવાદમાં મોબાઇલ ચોરતી ટોળકીએ મચાવ્યો આતંક

• ચાંદખેડા અને અમરાઈવાડીમાં મોબાઇલ સ્નેચિંગની બે ઘટનાઓ બની
• ચાંદખેડા અને એસજી હાઈવે પર મોબાઈલ ફોન ચોરાયા
• મોબાઈલ ફોન ચોરતી ટોળકીના આતંકથી શહેરીજનોમાં ફફડાટ

જાહેરમાં મોબાઇલ ફોન પર વાત કરો છો તો દસ વખત વિચાર કરજો કારણ કે ધૂમ સ્ટાઇલથી બાઇક લઇને ગઠિયા આવશે અને ગણતરીની સેકન્ડમાં મોબાઇલ સ્નેચિંગ કરીને નાસી જશે ત્યારે ભીડભાડવાળી જગ્યા ઉપર પણ ખિસ્સામાં મોબાઇલ ફોન મૂક્યો હોય તો પણ સાચવવાની જરૂર છે કેમ કે ચોર ટોળકી ભીડનો લાભ લઇને મોબાઇલની ચોરી કરીને નાસી જશે. શહેરમાં મોબાઇલ ચોરતી ગેંગનો આતંક દિવસને દિવસે વધુ જોવા મળી રહ્યો છે. જેની સંખ્યાબંધ ફરિયાદ શહેરનાં અલગ અલગ પોલીસ સ્ટેશનમાં નોંધાઇ છે. 

મોબાઇલસ્નેચર વિરુદ્ધ પોલીસ ફરિયાદ
શહેરના ચાંદખેડા અને અમરાઇવાડી પોલીસ સ્ટેશનમાં મોબાઇલસ્નેચર વિરુદ્ધ પોલીસ ફરિયાદ નોંધાઇ છે. એન્જિનિયરિંગ કોલેજમાં સુપરિન્ટેન્ડેન્ટ તરીકે ફરજ બજાવતા અને ચાંદખેડામાં આવેલા શુકન આર્કેડમાં રહેતા દેવેન્દ્ર પ્રકાશ થોડા દિવસ પહેલાં જમીને નાઇટ વોક માટે નીકળ્યા હતા. દરમિયાનમાં બાઇક પર બે શખ્સ આવ્યા હતા અને તેમના હાથમાંથી મોબાઇલ ફોન ઝૂંટવીને લઇ ગયા હતા. અમરાઇવાડી વિસ્તારમાં રહેતો અને જીઆઇડીસીમાં નોકરી કરતો સુરેશ ઠાકોર નામનો યુવક પણ થોડા દિવસ પહેલાં ઇવનિંગ વોક માટે નીકળ્યો હતો ત્યારે તે પોતાના મિત્ર સાથે વાતચીત કરી રહ્યો હતો. તે સમયે બાઇક પર બે શખ્સ આવ્યા હતા અને સુરેશના હાથમાંથી મોબાઇલ ફોન ઝૂંટવીને નાસી ગયા હતા. બંને મોબાઇલ સ્નેચિંગની ઘટનામાં પોલીસે ગુનો દાખલ કરીને આરોપીને પકડી પાડવા માટે ચક્રો ગતિમાન કર્યાં છે. 

મોબાઇલ ચોરી કરતી ગેંગ સક્રિય
મોબાઇલ સ્નેચિંગ તો ઘણી બધી જગ્યા પર થાય છે પરંતુ ભીડનો લાભ લઇને પણ મોબાઇલ ચોરી કરતી ગેંગ સક્રિય થઇ છે. લોકોને ખબર પણ હોતી નથી તેવી રીતે ગઠિયા મોબાઇલ ચોરી કરી લેતા હોય છે. શહેરના ચાંદખેડા, આનંદનગરમાં મોબાઇલ ચોરીની ફરિયાદ નોંધાઇ છે. સાબરમતી વિસ્તારમાં રહેતા ગણેશલાલ પટેલના પિતા લુંબારામજી થોડા દિવસ પહેલાં ચાંદખેડાથી લક્ઝરી બસમાં બેસીને આબુ રોડ જવા માટે નીકળ્યા હતા. લુંબારામજી બસમાં ચઢતા હતા ત્યારે ગઠિયાએ તેમના ખિસ્સામાં હાથ નાખીને મોબાઇલ ફોન ચોરી લીધો હતો. આ સિવાય ઘુમા વિસ્તારમાં રહેતા મોહિત ભલાણીએ પણ આનંદનગર પોલીસ સ્ટેશનમાં મોબાઇલ ફોન ચોરીની ફરિયાદ કરી છે. સોલર પેનલ લગાવવાનું કામ કરતા મોહિત ભલાણી એક્ટિવા લઇને સરખેજ કામ માટે જતા હતા ત્યારે પકવાન સર્કલ પર એક્ટિવા ઊભું રાખ્યું હતું. દરમિયાનમાં અજાણ્યા શખ્સે મોબાઇલ ફોન ખેંચી લીધો હતો. તમામ ઘટનાઓ અલગ અલગ સમય પર બની છે. જેમાં પોલીસે ગઇ કાલે ગુના દાખલ કરીને તપાસ શરૂ કરી છે. 

ગુનેગારો ચોરીના મોબાઈલ ફોનનો ઉપયોગ વધુ કરે છે
ગુનેગારો ગુનો આચરવા માટે ચોરીના મોબાઇલ ફોનનો વધુને વધુ ઉપયોગ કરી રહ્યા હોવાનું અનેક કિસ્સાઓમાં સામે આવી રહ્યું છે. હત્યા, લૂંટ, ધાડ તેમજ દેશ વિરોધી પ્રવૃત્તિમાં ગુનોગારો ચોરીના મોબાઇલ ફોનનો ઉપયોગ કરી રહ્યા છે. જેનો પણ મોબાઇલ ફોન ચોરાયો છે તે પોલીસ ફરિયાદ કરે નહીં તો કદાચ તેમને પણ કાનૂની કાર્યવાહીમાં ફસાવું પડે છે. 

મોબાઈલ ફોન અંતરિયાળ ગામડાંમાં વેચી દેવાય છે
પોલીસ સૂત્રોના જણાવ્યા અનુસાર ચોર અલગ અલગ સમયે મોબાઇલ ફોનની ચોરી કરતા હોય છે. ચોર પાસે ચોરીના મોબાઇલનો સ્ટોક થઇ જાય ત્યારે તે ગુજરાતના અંતરિયાળ ગામડાં કે પછી નેપાળ, રાજસ્થાન, મહારાષ્ટ્ર, ઉત્તરપ્રદેશમાં વેચી દેતા હોય છે. પોલીસ અનેક વખત મોબાઇલ ફોનની ચોરી કરતી ગેંગ ઝડપી પાડે છે અને સંખ્યાબંધ ફોન જપ્ત કરે છે.