મનોરંજન / ફાયરિંગની ઘટના બાદ ટાઇગર શ્રોફે વેચ્યો લક્ઝરી એપાર્ટમેન્ટ, કરોડોની કમાણી કરી!

મુંબઈમાં ફાયરિંગની ઘટનાના થોડા દિવસ બાદ અભિનેતા ટાઇગર શ્રોફે પોતાની એક પ્રોપર્ટી વેચી દીધી છે. ખાર વેસ્ટ વિસ્તારમાં આવેલા આ લક્ઝરી એપાર્ટમેન્ટનો સોદો રૂપિયા 9 કરોડમાં થયો છે. ટાઇગરે વર્ષ 2018માં આ ફ્લેટ ખરીદ્યો હતો અને હવે તેના વેચાણથી ખરીદીની કિંમત કરતાં રૂપિયા 1.39 કરોડ વધુ મળ્યા છે. આ સોદો 22 ઓક્ટોબર 2026ના રોજ રજિસ્ટર કરવામાં આવ્યો હતો. જોકે એપાર્ટમેન્ટ વેચવાના નિર્ણયને ફાયરિંગની ઘટના સાથે કોઈ સંબંધ છે કે નહીં તે અંગે સ્પષ્ટતા થઈ નથી.

રૂપિયા 7.61 કરોડમાં ખરીદ્યો હતો એપાર્ટમેન્ટ

ટાઇગર શ્રોફે વર્ષ 2018માં મુંબઈના ખાર વેસ્ટ વિસ્તારમાં આ એપાર્ટમેન્ટ ખરીદ્યો હતો. પ્રોપર્ટી રજિસ્ટ્રેશનના દસ્તાવેજો અનુસાર તેમણે 17 જુલાઈ 2018ના રોજ ડેવલપર કીસ્ટોન રિયલ્ટર્સ પ્રાઇવેટ લિમિટેડ પાસેથી આ પ્રોપર્ટી રૂપિયા 7.61 કરોડમાં ખરીદી હતી. ત્યારબાદ 30 નવેમ્બર 2019ના રોજ તેમને આ એપાર્ટમેન્ટનો કબજો મળ્યો હતો. હવે તેમણે આ જ પ્રોપર્ટી રૂપિયા 9 કરોડમાં વેચી દીધી છે.

વેચાણમાં કેટલો થયો ફાયદો?

ટાઇગર શ્રોફે આ એપાર્ટમેન્ટ રૂપિયા 9 કરોડમાં વેચ્યો છે. જ્યારે તેને ખરીદવા માટે તેમણે રૂપિયા 7.61 કરોડ ખર્ચ્યા હતા. આ રીતે ખરીદી અને વેચાણની કિંમત વચ્ચે રૂપિયા 1.39 કરોડનો તફાવત છે. જોકે સ્ટેમ્પ ડ્યૂટી, અન્ય ખર્ચ અને લાગુ પડતા કરને ધ્યાનમાં લીધા બાદ વાસ્તવિક નફો અલગ હોઈ શકે છે. આ સોદામાં એપાર્ટમેન્ટનો વેચાણ દર પ્રતિ ચોરસ ફૂટ આશરે રૂપિયા 64,891 રહ્યો હતો.

નવમા માળે આવેલો છે લક્ઝરી એપાર્ટમેન્ટ

આ એપાર્ટમેન્ટ ખાર વેસ્ટમાં આવેલી રૂસ્તમજી પેરામાઉન્ટ ડી કો-ઓપરેટિવ હાઉસિંગ સોસાયટીના નવમા માળે આવેલો છે. તેનું કાર્પેટ એરિયા 1,291.14 ચોરસ ફૂટ છે. તેમાં 95.80 ચોરસ ફૂટનો વિશિષ્ટ વિસ્તાર પણ સામેલ છે. આ પ્રોપર્ટીના વેચાણ પર રૂપિયા 54 લાખની સ્ટેમ્પ ડ્યૂટી ચૂકવવામાં આવી હતી. એપાર્ટમેન્ટની સાથે બે કવર્ડ કાર પાર્કિંગની સુવિધા પણ સામેલ છે.

આ પણ વાંચોઃ કોમલ રાની સાથે અફેરની ચર્ચા પર ગોવિંદાનું બેફિકર નિવેદન, સુનિતાની ડિવોર્સ અરજીને લઈ શું કહ્યું ?

ફાયરિંગની ઘટનામાં બચી ગયો હતો ટાઇગર શ્રોફ

18 ઓક્ટોબર 2026ના રોજ મુંબઈના જુહુ વિસ્તારમાં ફાયરિંગની ઘટના બની હતી. અહેવાલો અનુસાર ટાઇગર શ્રોફ એક ફૂટબોલ ગ્રાઉન્ડમાંથી બહાર નીકળી રહ્યા હતા ત્યારે મોટરસાઇકલ પર આવેલા ત્રણ શખ્સ તેમની કાર પાસે પહોંચ્યા હતા અને પાંચ રાઉન્ડ ફાયરિંગ કર્યું હતું. આ દરમિયાન અનેક ગોળીઓ કાર પર વાગી હતી. આ ઘટનામાં ટાઇગરને ગનપાઉડરના કારણે સામાન્ય દાઝવાના નિશાન થયા હતા. જોકે તેમના ડ્રાઇવર અને એક ચાહક ઉમેશ ચૌહાણ ગંભીર રીતે ઘાયલ થયા હતા.

અન્ય બોલિવૂડ સ્ટારને નિશાન બનાવવાનો હતો ઇરાદો?

અધિકારીઓના જણાવ્યા અનુસાર, શંકાસ્પદોનો શરૂઆતનો ઇરાદો બોલિવૂડના અન્ય એક મોટા સ્ટારને નિશાન બનાવવાનો હતો. જોકે સુરક્ષાને લગતા કારણોસર તેમણે ટાઇગર શ્રોફને નિશાન બનાવ્યા હોવાની માહિતી સામે આવી હતી. આ ઘટનાની ગંભીરતાને ધ્યાનમાં રાખીને મહારાષ્ટ્રના નાયબ મુખ્યમંત્રી એકનાથ શિંદેએ ટાઇગર શ્રોફ સાથે મુલાકાત કરી હતી અને આરોપીઓ સામે કડક કાર્યવાહી કરવાની ખાતરી આપી હતી. દેવેન્દ્ર ફડણવીસે પણ અભિનેતા સાથે ફોન પર વાત કરી હતી.

અનેક ધરપકડ બાદ પણ તપાસ ચાલુ

ફાયરિંગની ઘટના બાદ પોલીસે કાર્યવાહી કરીને અનેક લોકોની ધરપકડ કરી છે. આ મામલે તપાસ હજુ ચાલુ છે. બીજી તરફ, ઘટનાના માત્ર ચાર દિવસ બાદ એટલે કે 22 ઓક્ટોબરે ટાઇગર શ્રોફના એપાર્ટમેન્ટના વેચાણનો સોદો રજિસ્ટર થયો હતો. ફાયરિંગની ઘટના અને પ્રોપર્ટીના વેચાણ વચ્ચે સમયનું આ સામ્ય ચર્ચામાં છે. જોકે એપાર્ટમેન્ટ વેચવાનો નિર્ણય ફાયરિંગની ઘટના સાથે જોડાયેલો હતો કે નહીં તે અંગે કોઈ સ્પષ્ટ માહિતી સામે આવી નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ