આપઘાત / વલસાડમાં બ્રિજ પરથી યુવતીએ નદીમાં ઝંપલાવ્યું, કારણ ધોરણ 12ની બોર્ડ Exam

• પારડીની પારનદી પરથી યુવતીની મોતની છલાંગ
• નાના બ્રિજ પરથી યુવતીએ છલાંગ લગાવી મોતને વહાલું કર્યું
• પારડી તાલુકાના વાઘછીપા ગામની યુવતીએ પાર નદીમાં ઝપલાવ્યું

 વલસાડનાં પારડીની પારનદી પરથી યુવતીની મોતની છલાંગ લગાવતા ચકચાર મચી જવા પામી હતી. નાના બ્રિજ પરથી યુવતીએ છલાંગ લગાવી મોતને વ્હાલું કર્યું છે. પારડી તાલુકાનાં વાઘછીયા ગામની યુવતીએ પાર નદીમાં ઝંપલાવ્યું હતું. સ્થાનિક તરવૈયાઓની મદદથી મૃતદેહને બહાર કઢાયો હતો. 

સ્થાનિક તરવૈયાઓ તેમજ ફાયર બ્રિગ્રેડે યુવતીની લાશને બહાર કાઢી
યુવતી દ્વારા નદીમાં છલાંગ લગાવ્યાની જાણ આસપાસનાં લોકોને થતા તાત્કાલીક લોકો ઘટના સ્થળે દોડી આવ્યા હતા. અને ફાયર બ્રિગ્રેડને આ અંગેની જાણ કરતા ફાયર બ્રિગ્રેડ પણ તાત્કાલીક ઘટના સ્થળે આવી પહોંચ્યું હતુ. અને સ્થાનિક તરવૈયાઓ તેમજ ફાયર બ્રિગ્રેડની ટીમ દ્વારા નદીમાં શોધખોળ હાથ ધરી યુવતીની લાશને બહાર કાઢી હતી. ત્યારે આ અંગેની જાણ ઈમરજન્સી 108 ને કરતા 108 પણ ઘટના સ્થળે આવી પહોંચી હતી. અને યુવતીની તપાસ હાથ ધરતા યુવતિનું મોત નિપજ્યું હતું. ત્યારે યુવતીની લાશને પી.એમ. અર્થે મોકલી આપી પોલીસે ગુનો નોંધી આગળની કાર્યવાહિ હાથ ધરી હતી.

પરીક્ષામાં બીજી વખત નાપાસ થતા નાસીપાસ થઈ આ પગલું ભર્યું હોવાની ચર્ચા
આજે ધો. 12 વિજ્ઞાન પ્રવાહનું પરિણામ બોર્ડ દ્વારા જાહેર કરવામાં આવ્યું છે.  અમુક વિદ્યાર્થીઓ પરીક્ષામાં નાપાસ થતા નાસીપાસ થઈ જતા હોય છે. જેને લઈને વિદ્યાર્થીઓ કંઈ આડું અવળું પગલું ભરતા હોય છે. ગુજરાત માધ્યમિક અને ઉચ્ચતર માધ્યમિક બોર્ડ દ્વારા આજે ધો. 12 સાયન્સનું પરિણામ જાહેર કરતા પરીક્ષામાં બીજી વખત નાપાસ થતા યુવતિ દ્વારા આ પગલું ભર્યું હોવાનું જાણવા મળી રહ્યું છે. આ બાબતે પારડી પોલીસે ગુનો નોંધી તપાસ હાથ ધરી છે.