દુર્ઘટના / અમદાવાદની રાજસ્થાન હોસ્પિટલમાં ભયંકર આગ: ફાયર વિભાગે જાહેર કર્યો બ્રિગેડ કોલ, અમિત શાહે દુર્ઘટનાની મેળવી જાણકારી

 

• અમદાવાદની રાજસ્થાન હોસ્પિટલમાં આગ 
• જયપ્રેમ સોસાયટીનાં 36 ઘર કરાવાયા ખાલી 
• અમિત શાહએ દુર્ઘટનાની જાણકારી મેળવી
• દર્દીઓના પરિજનોનો રાજસ્થાન હોસ્પિટલ પર આક્ષેપ 

અમદાવાદના શાહીબાગની રાજસ્થાન હોસ્પિટલમાં વહેલી સવારથી આગ લાગી છે. હોસ્પિટલમાં દાખલ 100થી વધુ દર્દીઓને ઓસવાલ ભવન લઈ જવાયા છે. માત્ર ICU અને દિવ્યાંગ દર્દીઓને રાજસ્થાન હોસ્પિટલના સેફ ભાગમાં રખાયા છે.  આગ મોટી હોવાથી મેજર કૉલ જાહેર કરવામાં આવ્યો છે. ફાયર વિભાગની 29 જેટલી ગાડીઓ ઘટના સ્થળે હાજર છે, ફાયરની ટીમ ઓગ ઓલવવાની કામગીરી કરી છે. અમદાવાદ પૂર્વના ટ્રાફિક DCP સફિન હસને સહિતના તમામ અધિકારીઓ ઘટનાસ્થળે હાજર છે. જ્યારે ભાજપના ધારાસભ્ય કૌશિક જૈન પણ હોસ્પિટલ ખાતે પહોંચી ગયા છે. તો કેન્દ્રીય ગૃહમંત્રી અમિત શાહે મુખ્યમંત્રી ભૂપેન્દ્ર પટેલ સાથે વાત કરીને દુર્ઘટનાની જાણકારી મેળવી છે. 

કેન્દ્રીય ગૃહમંત્રી અમિત શાહે દુર્ઘટનાની જાણકારી મેળવી
રાજસ્થાન હોસ્પિટલમાં આગ મામલે અમિત શાહે ટ્વિટ પણ કર્યું છે. જેમાં તેઓ લખ્યું છે કે, 'અમદાવાદની એક હોસ્પિટલમાં આગ દુર્ધટનાના સમાચાર મળ્યા. ગુજરાતના મુખ્યમંત્રી ભૂપેન્દ્ર પટેલ જી સાથે વાત કરી અને દુર્ધટનાની જાણકારી લીધી. સ્થાનિક વહીવટીતંત્ર સતત આગ બુઝાવવામાં, દર્દીઓને બચાવવામાં અને રાહત કાર્યમાં તત્પરતા સાથે લાગેલું છે.'

અમદાવાદની એક હોસ્પિટલમાં આગ દુર્ધટનાના સમાચાર મળ્યા. ગુજરાતના મુખ્યમંત્રી શ્રી @Bhupendrapbjp જી સાથે વાત કરી અને દુર્ધટનાની જાણકારી લીધી. સ્થાનિક વહીવટીતંત્ર સતત આગ બુઝાવવામાં, દર્દીઓને બચાવવામાં અને રાહત કાર્યમાં તત્પરતા સાથે લાગેલું છે.

— Amit Shah (@AmitShah) July 30, 2023

MLA કૌશિક જૈને ઘટના સ્થળની લીધી મુલાકાત 
આ મામલે ધારાસભ્ય કૌશિક જૈનનું નિવેદન પણ સામે આવ્યું છે. તેઓએ જણાવ્યું કે, શાહીબાગની રાજસ્થાન હોસ્પિટલના બેઝમેન્ટમાં આગ લાગી છે. દેશના ગૃહમંત્રીએ પણ ટ્વીટ કરીને તંત્રને કામગીરી કરવા કહ્યું છે. આ દુર્ઘટનામાં સદનસીબે કોઈને જાનહાનિ થઈ નથી. દર્દીને કોઈ તકલીફ ન પડે તેની પૂરતી કાળજી રાખવામાં આવી રહી છે. અમે નજીકની હોસ્પિટલોને સૂચનાઓ આપી છે

જયપ્રેમ સોસાયટીનાં 36 ઘર કરાવાયા ખાલી 
રાજસ્થાન હોસ્પિટલના બેઝમેન્ટમાં ભીષણ આગ લાગ્યા બાદ નજીકની સોસાયટી ખાલી કરાવાઈ છે. હોસ્પિટલની નજીકમાં આવેલી જયપ્રેમ સોસાયટીના 36 ઘર ખાલી કરાવાયા છે.  હોસ્પિટલની દિવાલને અડીને આવેલા ફ્લેટ ખાલી કરાવાયા છે. 

બેઝમેન્ટમાં પાર્ક કરેલા વાહનો બળીને ખાખ
હોસ્પિટલના બેઝમેન્ટમાં આગ લાગી હોવાથી બેઝમેન્ટમાં પાર્ક કરેલા વાહનો બળીને ખાખ થઈ ગયા છે. આગને કાબૂમાં લેવા માટે રોબોટની મદદ લેવામાં આવી રહી છે. ઓક્સિજનના સાધન સાથે કર્મચારીઓ આગ ઓલવવા માટે ભારે જહેમત ઉઠાવી રહ્યા છે. આગ મોટી હોવાથી મેજર કૉલ જાહેર કરવામાં આવ્યો છે.