- પાટણમાં વિદ્યાર્થિની પર હુમલાનો મામલો
- રોષે ભરાયેલા ગ્રામજનોએ માર્યો માર
- આરોપીને ઝાડ સાથે ઊંધો લટકાવ્યો
પાટણના સરસ્વતી તાલુકાના વહાણા ગામની વિદ્યાર્થિની કોઇટા ગામે શાળાએ જઈ રહી હતી. તે દરમિયાન વિદ્યાર્થિની પર ગામના જ શખ્સે જબરદસ્તી કરવાનો પ્રયાસ કર્યો હતો. આરોપીએ વિદ્યાર્થીની સાથે બીભત્સ માંગણી કરી હતી જેનો વિદ્યાર્થીનીએ વિરોધ કરતા આરોપીએ ઉશ્કેરાઈ જઈને છરીથી હુમલો કર્યો હતો.
આરોપી યુવકને તાલિબાની સજા અપાઈ
આ જીવલેણ હુમલામાં વિદ્યાર્થિનીને ગંભીર ઈજા પહોંચતા ધારપુર મેડિકલ કોલેજ ખસેડાઈ હતી. આ સમગ્ર ઘટનાને લઈ ગ્રામજનોમાં ભારે આક્રોશ ફાટી નીકળ્યો છે. ત્યારે આરોપીને ગામલોકોએ ઝાડ સાથે ઉંધો લટકાવી ઢોર માર માર્યો હોવાનો વીડિયો ખૂબ વાયરલ થઈ રહ્યો છે. ગ્રામજનોએ આરોપી ઠાકોર જીવણને પકડી ઝાડ સાથે બાંધીને જાહેરમાં તાલીબાની સજા આપી હતી. આરોપીને ઝાડ પર ઊંધો લટકાવીને ઢોર માર માર્યો હતો. તેમજ આરોપીને કાદવ કીચડમાં નીચે પછાડ્યો હતો.
પોલીસે તપાસ શરૂ કરી
તો કાયદો હાથમાં લેતા પાટણ પોલીસ પણ હરકતમાં આવી છે અને કાયદો હાથમાં લેનાર સામે કાયદેસરની કાર્યવાહી આરંભી છે. સમગ્ર ઘટનાને અંજામ કેવી રીતે આપ્યો એ ખુદ ભોગ બનનાર દિકરી પોતાની આપવીતી પણ સામાજીક આગેવાનના મોબાઈલમાં જણાવી રહી છે. એક તરફ વિદ્યાર્થિની સાથે જે થયું તેની લોકો નિદા કરી રહ્યા છે તો બીજી તરફ પોલીસ સમગ્ર કેસની ઊંડે સુધી તપાસ કરવામાં જોતરાઈ છે. આરોપી યુવકને હાલ સારવાર અર્થે હોસ્પિટલ ખસેડવામાં આવ્યો છે. પોલીસે બંનેના નિવેદન લઈ આગળની કાર્યવહાઈ હાથ ધરી છે.
