કોર્ટે નાના છોકરાની જેમ સમજાવ્યાં / 'એક દિવસમાં કામ કરે છે બીજો રાતમાં, લગ્ન ટકાવી લો', છૂટાછેડા લેનાર એન્જિનિયર કપલને સુપ્રીમની સલાહ

• છૂટાછેડા મેળવવા માગતા સોફ્ટવેર એન્જિનિયર કપલને સુપ્રીમનો સવાલ 
• શા માટે લગ્ન જાળવવા પ્રયાસ નથી કરતાં 
• તમારી જેવા લોકોએ સમજવું જોઈએ
• પતિ અને પત્ની બન્ને સોફ્ટવેર એન્જિનિયર

લગ્નજીવન ખતમ કરીને છૂટા પડી જવા અધિરા બની ગયેલા બેંગ્લુરુના સોફ્ટવેર કપલને નાના બાળકની જેમ સમજાવતાં સુપ્રીમ કોર્ટે સાથે રહેવાનો પ્રયાસ કરવાની સલાહ આપી હતી. બેંગ્લુરુનું આ સોફ્ટવર કપલ બન્ને સોફ્ટવેર એન્જિનિયર છે, જેમાં પત્ની દિવસે અને પતિ રાતે કામ પર જાય છે જેને કારણે તેઓ સાથે રહી શકતા નથી અને સંબંધ બાંધી શકતા નથી, આવી સ્થિતિમાં બન્નેએ છૂટા પડવાનું નક્કી કર્યું અને સુપ્રીમમાં કેસ પણ ફાઈલ કરી દીધો હતો. 

શા માટે લગ્ન ટકાવી રાખવાનો પ્રયાસ નથી કરતાં? સુપ્રીમે કપલને પૂછ્યું 
સુપ્રીમ કોર્ટે છૂટાછેડા મેળવવા માંગતા એક સોફ્ટવેર એન્જિનિયર દંપતીને પૂછ્યું છે કે તેઓ શા માટે પોતાને લગ્ન જાળવવાની બીજી તક આપવા માંગતા નથી. કારણ કે બંને પોતાના સંબંધને સમય આપી શક્યા નહોતા. જસ્ટીસ કે એમ જોસેફ અને બી વી નાગરથનાની ખંડપીઠે કહ્યું કે, "વૈવાહિક સગાઈનો સમય (માત્ર) ક્યાં છે?" તમે બંને બેંગલુરુમાં સોફ્ટવેર એન્જિનિયર છો. એક દિવસ દરમિયાન અને બીજો રાત્રે કામ પર જાય છે. તમને છૂટાછેડાનો કોઈ અફસોસ નથી, પરંતુ લગ્ન માટે પસ્તાવો થઈ રહ્યો છે. શા માટે તમે (તમારી જાતને) વૈવાહિક સંબંધ જાળવવાની બીજી તક આપતા નથી. 

પત્નીને આપ્યું 12.51 લાખ રુપિયાનું ભથ્થું 
બેંચને જણાવવામાં આવ્યું હતું કે પતિ-પત્ની બંને એક કરાર માટે સંમત થયા છે જેમાં તેઓએ અમુક નિયમો અને શરતો પર હિન્દુ મેરેજ એક્ટ, 1955 ની કલમ 13 બી હેઠળ પરસ્પર સંમતિથી છૂટાછેડા દ્વારા તેમના લગ્ન સમાપ્ત કરવાનો નિર્ણય લીધો છે. વકીલોએ ખંડપીઠને માહિતી આપી હતી કે આમાંની એક શરત એ છે કે પતિએ કાયમી ભરણપોષણ તરીકે પત્નીના તમામ નાણાકીય દાવાઓના સંપૂર્ણ અને અંતિમ સમાધાન માટે કુલ 12.51 લાખ રૂપિયા ચૂકવવા પડશે.

ઘણું સમજાવ્યું છતાંય ન માનતાં આપી છૂટાછેડાની મંજૂરી 
આવા સંજોગોમાં સુપ્રીમે જણાવ્યું હતું કે, કોર્ટે બંધારણની કલમ 142 હેઠળની સત્તાઓનો ઉપયોગ કરીને કપલને છૂટાછેડાની મંજૂરી આપે છે પરંતુ તે પહેલા કોર્ટે તેમને લગ્ન બચાવી લેવાની મોટી અપીલ કરી હતી.