અમદાવાદમાં ભિક્ષા નહી શિક્ષા પ્રોજેક્ટ અંતર્ગત સિગ્નલ સ્કૂલનો પ્રથમ દિવસ રહ્યો સફળ, બાળકો હોંશે હોંશે ભણવા આવ્યા
Share
અમદાવાદમાં ભિક્ષા નહી શિક્ષા પ્રોજેક્ટની શરુઆત
સિગ્નલ સ્કૂલ અંગે VTVનું રિયાલીટી ચેક
પ્રથમ દિવસે મળ્યો સારો પ્રતિસાદ
અમદાવાદ મ્યુનિસિપલ કોર્પોરેશન દ્વારા રાજ્ય સરકારના સહયોગથી સિગ્ન સ્કૂલનો પ્રારંભ કરવામાં આવ્યો છે. રવિવારે રાજ્યના મુખ્યમંત્રી ભૂપેન્દ્ર પટેલના હસ્તે ભિક્ષા નહી શિક્ષા પ્રોજેક્ટની શરુઆત કરવામાં આવી હતી. જેના પ્રથમ દિવસે આ પ્રોજેક્ટનો કેવો પ્રતિસાદ મળી રહ્યો છે તે જાણવા માટે વીટીવી દ્વારા રિયાલીટી ચેક કરવામાં આવ્યુ હતું.
સિગ્નલ સ્કૂલ અંગે vtvનું રિયાલીટી ચેક
અમદાવાદના વિવિધ ક્રોસ રોડ પર પીળા રંગની એક બસ ઉભેલી દેખાશે. આ બસ એ હાલતી ચાલતી શાળા જ છે. જેને સિગ્નલ સ્કૂલ નામ આપવામાં આવ્યુ છે. જે બાળકો ભિક્ષાવૃત્તિ સાથે જોડાયેલા છે. સિગ્નલ પર ભિક્ષા માગતા દેખાય છે તેવા બાળકોને આ બસમાં શિક્ષણ આપવામાં આવી રહ્યું છે. ભિક્ષા નહી શિક્ષા પ્રોજેક્ટની શરુઆત તો થઇ પરંતુ શું બાળકો ભણે છે ખરા ? શું બસમાં શિક્ષકો હાજર હોય છે ? આ તમામ સવાલોને લઇને વીટીવી દ્વારા રિયાલીટી ચેક કરવામાં આવ્યુ હતું..મહત્વનુ છે કે અમદાવાદના 10 સ્થળો પર સિગ્નલ સ્કૂલની શરુઆત કરવામાં આવી છે.
ભિક્ષા નહી શિક્ષા પ્રોજેક્ટની સફળ શરુઆત
વીટીવી રિયાલીટી ચેકમાં સામે આવ્યુ કે સિગ્નલ સ્કૂલને ખૂબ સારો પ્રતિસાદ મળી રહ્યો છે. સિગ્નલ પર જે બાળકો ભિક્ષા માગતા હતા તેઓને સ્માર્ટ એજ્યુકેશન આપવામાં આવી રહ્યું છે. બસમાં ટીવી, લેપટોપ સહિત જરુરી તમામ સુવિધાઓ છે. બે શિક્ષકો છે જે બાળકોને ભણાવી રહ્યા છે એટલે કે કહી શકાય કે AMC દ્રારા શરુ કરવામાં આવેલો આ પ્રોજેક્ટ સફળ રહ્યો છે.
બસમાં હાઇટેક અને સ્માર્ટ એજ્યુકેશન
સિગ્નલ શાળા શરૂ કરવા માટે રૂ 2.35 કરોડ ફાળવવામાં આવ્યાં છે. જે હેઠળ 10 સિગ્નલ સ્કૂલમાં 139 બાળકોને ભણાવવામાં આવશે. સિગ્નલ સ્કૂલમાં વાઇ-ફાઇ, LED ટીવી અને CCTV કેમેરા સહિતની સુવિધાઓ પણ ઉપલ્બધ છે. શહેરના અલગ-અલગ સિગ્નલ પર સવાર-સાંજના સમયે સિગ્નલ સ્કૂલ મારફતે શિક્ષણ આપવામાં આવશે. સિગ્નલ સ્કૂલમાં તમામ પ્રકારની સુવિધાઓ ઊભી કરવામાં આવી છે. જેમાં બસની અંદર જ બ્લેકબોર્ડ, શિક્ષક માટે ટેબલ-ખુરશી, LED ટીવી, સીસીટીવી, પીવાનું પાણી, મીની પંખા તેમજ વાઇફાઇ સહિતની સુવિધા ઉપલબ્ધ છે. તમને જણાવી દઇએ કે, સિગ્નલ સ્કૂલો માટે એએમટીએસ પાસેથી બસો મેળવીને તેમાં સુધારા વધારા કરીને હરતી ફરતી સ્કૂલો બનાવવામાં આવી છે. આ સિગ્નલ સ્કૂલો જે-તે સિગ્નલ અથવા તો નક્કી કરેલા જંકશન ખાતે ઉભી રાખીને બાળકોને ભણાવવામાં આવશે.
