ન્યાયિક / બાળકોનું યૌન ઉત્પીડન બિન જામીનપાત્ર ગુનો, આરોપીને થશે સજા- હાઈકોર્ટનો મહત્વનો ચુકાદો

• બાળકોના યૌન ઉત્પીડનને લઈને દિલ્હી હાઈકોર્ટનો મોટો ચુકાદો
• યૌન ઉત્પીડનને બિન જામીનપાત્ર ગુનો ગણાવ્યો
• જે કોઈ પણ બાળકનું યૌન ઉત્પીડન કરશે તેને મળશે સજા 

દિલ્હી હાઈકોર્ટે એક ચુકાદામાં જણાવ્યું છે કે બાળક પર જાતીય હુમલો પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સિસ (પોક્સો એક્ટ) એક્ટ, 2012ની કલમ 12 હેઠળ સજાને પાત્ર ગુનો છે અને તેને માટે જામીન પણ ન મળી શકે. ચીફ જસ્ટીસ સતીશચંદ્ર શર્મા અને જસ્ટીસ સુબ્રમણ્યમ પ્રસાદની ડિવિઝન બેંચે જણાવ્યું હતું કે બાળકોના યૌન ઉત્પીડનનો ગુનો  ક્રિમિનલ પ્રસિજર કોડની કલમ હેઠળ આવે છે. તેમાં જણાવાયું છે કે જો કોઈ ગુનો 3 વર્ષની જેલની દંડનીય હોય પરંતુ 78 વર્ષથી વધારે ન હોય તો તે બિન જામીનપાત્ર ગુનો બની જાય છે. 

બાળક પર યૌન હુમલાના આરોપીને થશે 3થી 7 વર્ષની સજા 
ખંડપીઠે કહ્યું કે, પોક્સો એક્ટની કલમ 12 માં જણાવાયું છે કે જે કોઈ પણ બાળક પર જાતીય હુમલો કરશે તેને કેદની સજા કરવામાં આવશે, જે ત્રણ વર્ષથી સાત વર્ષ સુધીની હોઈ શકે. 

સજાને પાત્ર ગુનો જામીનપાત્ર ગુનો- કેરળ હાઈકોર્ટ 
એક અન્ય ઘટનાક્રમમાં કેરળ હાઈકોર્ટે તાજેતરમાં જણાવ્યું હતું કે પોક્સો એક્ટની કલમ 21 હેઠળ સજાને પાત્ર ગુનો જામીનપાત્ર ગુનો છે. પોક્સો એક્ટની કલમ 21 હેઠળ ગુનાની જાણ કરવામાં નિષ્ફળતાથી છ મહિના સુધીની જેલ થઈ શકે છે અથવા જો તે વ્યક્તિ કોઈ સંસ્થા અથવા કંપનીનો હવાલો સંભાળે છે, તો જેલની સજા એક વર્ષ સુધી વધી શકે છે.

ચાઈલ્ડ રેપિસ્ટને સજા કરાવવામાં મોટી ભૂમિકા ભજવશે આ ચુકાદો

દિલ્હી હાઈકોર્ટે યૌન ઉત્પીડનને બિન જામીનપાત્ર ગુનો અને તેને માટે સજાનો ચુકાદો આપ્યો હોવાથી ચાઈલ્ડ રેપિસ્ટને સજા કરાવવામાં આ ચુકાદો મોટી ભૂમિકા ભજવી શકે છે. ઉલ્લેખનીય છે કે દેશમાં બાળકોના યૌન શોષણની ઘટનાઓ વધી રહી છે અને હવે હાઈકોર્ટનો આ ચુકાદો રાહતરુપ બનીને આવ્યો છે.