અમદાવાદ / 'દોઢ જ વર્ષમાં ઔડાનું મકાન તમારા હાથમાં' કહી 45 હજાર લોકો પાસેથી પડાવ્યાં આટલાં રૂપિયા, અંતે લોકોએ હોબાળો મચાવતા સામે આવ્યું કૌભાંડ

• ઔડાના મકાન અપાવવાના નામે કૌભાંડ 
• રૂ.100નું ફોર્મ ભરાવી આચર્યું કૌભાંડ
• સ્લમ વિસ્તારમાં ફોર્મ છપાવી કરી હતી જાહેરાત 

અમદાવાદમાં રૂપિયા 100નું ફોર્મ ભરીને ઔડાના મકાન આપવાના કૌભાંડનો પર્દાફાશ થયો છે. આ કૌભાંડ મામલે ભોગ બનેલા લોકોએ નવરંગપુરા પોલીસ સ્ટેશનમાં ફરિયાદ નોંધઆવી છે. હાલ પોલીસે ફરિયાદના આધારે આરોપીને ઝડપી પાડવા માટે તજવીજ હાથ ધરી છે.

નવનિર્માણ ટ્રસ્ટના નામે કૌભાંડ
મળતી માહિતી અનુસારા, નવરંગપુરા પોલીસે આરોપી આકાશ પરમાર નામના શખ્સ વિરુદ્ધ ફરિયાદ નોંધી છે. આકાશે નવરંગપુરામાં ઔડાના મકાન અપાવવાના નામે ફોર્મ ભરાવીને કૌભાંડ આચર્યું છે. આરોપી આકાશ પરમાર નવનિર્માણ ટ્રસ્ટના નામે કૌભાંડ આચરતો હતો. તે 4 માસથી ઓફિસ શરૂ કરીને કૌભાંડ આચરતો હતો. નવનિર્માણ ટ્રસ્ટે દોઢ વર્ષમાં મકાન મળી જશે તેવી લાલચ આપી લોકો સાથે ઠગાઈ કરી હતી. 

45 હજાર લોકો પાસેથી રૂપિયા 100-100 ઉઘરાવ્યાં 
આ શખ્સે એક ફોર્મના અંદાજે 100-100 રૂપિયા ઉઘરાવ્યાં હતા. ટ્રસ્ટના સંચાલકોએ મહિનાઓ પહેલાં સ્લમ વિસ્તારમાં ફોર્મ છપાવી જાહેરાત કરી હતી. જેમાં તેઓએ સરકારી મકાન અપાવવાની લાલચ આપી હતી. જેથી ઔડાના મકાન લેવા માટે આશરે 45 હજાર જેટલા લોકોએ ફોર્મ ભર્યા હતા. મકાન ન મળતા ઓફિસમાં જઈ લોકોએ હોબાળો કર્યો હતો.

રૂપિયા 100નું એક ફોર્મ ભરાવી છેતરપિંડી આચરી
આ મામલે બી ડિવિઝન પોલીસ સ્ટેશનના એસીપી એચ.એમ કંસાગરાએ કહ્યું કે, ફરિયાદીએ નવરંગપુરા પોલીસ સ્ટેશનમાં ફરિયાદ નોંધાવી હતી. ફરિયાદીએ જણાવ્યું હતું કે નવનિર્માણ ચેરીટેબલ ટ્રેસ્ટના સંચાલક આકાશ પરમાર સામાન્ય નાગરિકોને સસ્તા ભાવે ઔડાના મકાન અપાવવા નામે રૂપિયા 100નું એક ફોર્મ ભરાવી છેતરપિંડી કરી આચરી રહ્યા છે. ફરિયાદીએ ભરેલા રૂપિયાની કાચી રસીદ પણ પોલીસને આપી હતી. 

આ મામલે ઊંડાણપૂર્વક તપાસ કરવામાં આવશેઃ ACP એચ.એમ કંસાગરા
ACP એચ.એમ કંસાગરાએ કહ્યું કે, ફરિયાદીની ફરિયાદના આધારે પોલીસે હાલ તપાસ હાથ ધરી છે. આ નવનિર્માણ ચેરીટેબલ ટ્રસ્ટ ચેરીટી કમિશનરની ઓફિસમાં નોંધાયેલ છે કે નહીં, આ ટ્રસ્ને ઔડાની ઓફિસમાંથી પૈસા ઉઘરાવવા માટે કોઈપણ પ્રકારની પાવરનામું આપવામાં આવેલ છે કે નહીં વગેરે બાબતે ઊંડાણપૂર્વક તપાસ કરવામાં આવશે. જો આરોપીએ કોઈ ગેરરીતિ કરી હોવાનું જણાઈ આવશે તો કાયદાકીય રીતે કાર્યવાહી કરવામાં આવશે.