અમદાવાદ / આગ લાગી ત્યારે કૂવો ખોદ્યો, ઘોડાસરમાં માત્ર દોઢ વર્ષમાં ટાંકીને પડી તિરાડો, સમારકામ ગોકલગતિએ, ઉનાળો નીકળી જશે?

• અમદાવાદમાં ભર ઉનાળે ટાંકીનું સમારકામ
• ઘર સુધી નથી પહોંચતું પાણી
• માત્ર દોઢ વર્ષમાં ટાંકીને પડી તિરાડો

ઉનાળો શરૂ છે પરિણામે લોકોને પાણીની જરૂરિયાત વધી છે. પરંતુ તેવા સમયે જ અમદાવાદમાં ટાંકીનું રિપેરિંગ કામ ચાલું છે, આથી સ્થાનિક લોકોના ઘરમાં પૂરતા પ્રેશરથી પાણી નહીં પહોચતું હોવાની ફરિયાદ ઊઠી છે. ઓવરહેડ ટાંકીનું રિપેરિંગ કામ જે ગતિએ ચાલી રહ્યું છે તે જોતાં હજુ આખો ઉનાળો પસાર થઈ જાય છતાં લોકોને પૂરતું પાણી નહીં મળે તેવું લાગે છે, જેનાથી સ્થાનિક લોકો પરેશાન છે. 

 
પાણીના અભાવે સ્થાનિકો મુશ્કેલીમાં
મહત્વનું છે કે અમદાવાદ મહાનગર પાલિકાએ દોઢ વર્ષ પહેલા આ ઓવરહેડ ટાંકીનું નિર્માણ કર્યું હતું. જે માટે 11 કરોડનો ખર્ચ કર્યો હતો. આ ટાંકીમાંથી ઘોડાસરના એક હજાર છસો ઘરોમાં પાણી પહોંચતું હતું. પરંતુ 11 કરોડના ખર્ચે અને મહિનાઓની મહેનત બાદ તૈયાર થયેલા આ ટાંકી માત્ર દોઢવર્ષમાં જ લીકેજ થઈ ગઈ છે. જેના કારણે સ્થાનિક લોકો છેલ્લાં ઘણા મહિનાઓથી પૂરતા પાણીના અભાવે મુશ્કેલી વેઠી રહ્યા છે. 

મજબૂતાઈમાં કાચું ક્યાં કપાઈ ગયું?

પાણીની ટાંકી દોઢ વર્ષમાં જ લીકેજ થતાં લોકો આ ઓવરહેડ ટાંકીની ક્ષમતા પર સવાલ ઊઠાવી રહ્યા છે એટલું જ નહી કેટલાક નાગરિકો તો આ ટાંકીના રિપેરિંગનો ખર્ચ કોન્ટ્રાક્ટર પાસેથી વસૂલવાની માગણી કરી રહ્યા છે. હાલ તો મનપાએ આ ઓવરહેડ ટાંકીનું સમારકામ શરૂ કર્યું છે, પરંતુ સવાલ એ ઊભો થઈ રહ્યો છે કે લાખો લોકો માટેની આ સુવિધાની મજબૂતાઈમાં કાચું ક્યાં કપાઈ ગયું?