રોષ / અમદાવાદમાં રિ-ડેવલપમેન્ટની માથાકૂટઃ 25-75નો કાયદો આવ્યો પણ અમલ ન થતા સોસાયટીના રહીશો હેરાન-પરેશાન

• અમદાવાદમાં રિ-ડેવલપમેન્ટ મામલે લોકો હેરાન
• અનેક સોસાયટીના રહીશોએ સરકાર સામે ચઢાવી છે બાંયો
• ચૂંટણીના બહિષ્કારની ચીમકી ઉચ્ચારી

અમદાવાદમાં હાઉસિંગ સોસાયટીના મકાનો રી- ડેવોલપમેન્ટની માથાકૂટ વધી છે. આ મામલે મેમનગર ખાતે આવેલા આમ્ર કુંજ અને આસપાસની સોસાયટીના રહીશોએ સરકાર સામે બાયો ચડાવી છે. રી-ડેવલોપમેન્ટમાં સરકાર દ્વારા 25-75નો કાયદો લાવ્યા પરંતુ તેનો અમલ ન થતો હોવાના કારણે લોકોમાં વિરોધનો મધપુડો છંછેડાયો છે.જેના કારણે અહીંના સ્થાનિક રહીશોએ જર્જરિત મકાનોમાં રેહવું પડી રહ્યું છે. અનેક રજુઆત કરવામાં આવી છતાં કોઈ નિરાકરણ આવતુ નથી. જેના માટે હવે આગામી સમયમાં સ્થાનિક રહીશો ચૂંટણીનો બહિષ્કાર કરવાની ચીમકી આપતા તંત્ર દોડતું થયું છે.

ભયના ઓથાર હેઠળ જીવતા લોકો
અમદાવાદમાં હાઉસિંગ બોર્ડની જુદી-જુદી 241 કેટેગરીના મકાનો આવેલા છે. જે મકાનો 20 થી 25 વર્ષ જૂના છે આ મકાનોમાં આશરે દોઢ લાખ ઉપરાંત લોકો રહે છે. જે મકાનો જૂના હોવાથી જર્જરીત બન્યા છે.આથી રી- ડેવોલપમેન્ટ અંગે રજૂઆત કરવા છતા આ દિશામાં કાર્યવાહી કરવામાં ન આવતા લોકોએ પોસ્ટર વિરોધ, ચૂંટણીનો બહિષ્કાર સહીતની ચીમકી આપી છે.. મહત્વનું છે કે,રી-ડેવલોપમેન્ટમાં સુધારા અંગેની જાહેરાત કરાયા બાદ સ્થાનિક તંત્ર આ જાહેરાતના અમલમાં ધાંધિયા કરતું હોવાથી અનેક લોકો ભયના ઓથાર હેઠળ જીવી રહ્યા છે.

વર્ષ 2019માં ગુજરાત ઓનરશીપ ફ્લેટ એક્ટ 1973માં કરાયો હતો સુધારો 
અત્રે ઉલ્લેખનીય છે કે, વર્ષ 2019માં ગુજરાત સરકારે વર્ષો જૂની ઇમારતોના રિ-ડેવલપમેન્ટ માટે પ્રક્રિયા સરળ બનાવવાની નીતિ જાહેર કરી હતી. ગુજરાત ઓનરશીપ ફ્લેટ એક્ટ 1973માં સુધારો કરવામાં આવ્યો હતો. જે સુધારા અંતર્ગત પઝેશનની તારીખથી 25 વર્ષ જૂની ઇમારતોને રી-ડેવલોપ કરાશે. જોકે રી-ડેવલપમેન્ટ સ્કીમ હેઠળ જમીન માલિકોના કુલ 75 ટકા માલિકોની સંમતિ ફરજિયાત રહેશે. તેમજ હાઉસિંગ કોલોની રી-ડેવલપમેન્ટ કરવા માટે સંબંધિત સત્તાવાળાઓ પાસેથી ઈમારત જર્જરીત અને જોખમી હોવાનું પ્રમાણપત્ર મેળવવું પડશે. તે અંગેનો સુધારો કરાયો હતો.જેમાં રહેલી અમુક ત્રુટિયો સુધારી અમલવારી કરવા અંગે પણ સ્થનીકોમાં માંગ ઉઠી છે.