- MP, દિલ્હી બાદ હવે રાજસ્થાનના અલવરમાં બુલડોઝર ચલાવાયું
- અહીં 300 વર્ષ જૂના મંદિરો પર બુલડોઝર ચલાવ્યાના દાવો
- VIDEO સોશિયલ મીડિયા પર લોકોએ શેર કર્યો
તાજેતરમાં જ UP, MP અને દિલ્હીમાં તંત્રએ ચલાવેલા બુલડોઝર બાદ સમગ્ર દેશમાં બુલડોઝરે ભારે ચર્ચા જગાવી છે. દિલ્હીની જહાંગીરપુરી હિંસામાં કરાયેલી બુલડોઝરની કાર્યવાહીનો મામલો સુપ્રીમ કોર્ટ પહોંચ્યો છે. ત્યારે હવે રાજસ્થાનના અલવરમાં નગરપાલિકા દ્વારા બુલડોઝર દ્વારા કાર્યવાહી કર્યાનો મામલો સામે આવ્યો છે. સરકારે અહીં 300 વર્ષ જૂના મંદિરો પર બુલડોઝર ચલાવી દીધું છે.
માસ્ટર પ્લાનના નામ પર ચલાવ્યું બુલડોઝર
મળતી માહિતી અનુસાર, અલવર જિલ્લાના રાજગઢમાં માસ્ટર પ્લાનના નામે પ્રાચીન ઈમારતો અને દુકાનો પર બુલડોઝર ચલાવવામાં આવ્યું. કાર્યવાહી કરનારા અધિકારીઓએ વિકાસના નામે મંદિરોને પણ તોડી પાડ્યા હતા. બુલડોઝરની કાર્યવાહીથી રાજગઢ નગરનો મુખ્ય માર્ગ ખંડેર બની ગયો હતો. ઇમારતો અને દુકાનોને કોઈ પણ વળતર વિના તોડી પાડવામાં આવી છે.
300 વર્ષ જૂનું શિવલિંગ તોડી પડાયું
વહીવટીતંત્રની કાર્યવાહીના કારણે મંદિરની મૂર્તિઓ ખંડેર થઈ ગઈ છે. આ દરમિયાન ડ્રીલ સાથે તોડવામાં આવેલ 300 વર્ષ જૂનું શિવલિંગ પણ તૂટી ગયું હતું. લોકોનો એવો આરોપ છે કે વિકાસના નામે ષડયંત્ર હેઠળ મંદિરો તોડવામાં આવી રહ્યાં છે.
ભાજપે કર્યો હતો ઉગ્ર વિરોધ
અલવરમાં થયેલી કાર્યવાહી બાદ બીજેપી સાંસદ અને કેન્દ્રીય મંત્રી કૈલાશ ચૌધરીએ મુખ્યમંત્રી અશોક ગેહલોત પર નિશાન સાધ્યું છે. તેઓએ ટ્વિટ કર્યું છે કે, 'અલવરમાં 300 વર્ષ જૂના શિવ મંદિરને તોડી પાડવું એ રાજસ્થાનની કોંગ્રેસ સરકારની ધર્મ વિરોધી માનસિકતા દર્શાવે છે. મુખ્યમંત્રી, તમે આ બુલડોઝરનો ઉપયોગ તોફાનીઓ અને ગુનેગારો સામે પગલાં લેવા માટે કર્યો હોત તો સારું થાત.'
ભાજપે મંદિર તોડાવ્યું: કોંગ્રેસ સરકારના મંત્રી પ્રતાપ સિંહ
રાજસ્થાનના મંત્રી પ્રતાપ સિંહ ખાચરિયાવાસનું કહેવું છે કે, ભાજપ ખોટું બોલી રહી છે. રાજગઢ અર્બન બોડીઝ બોર્ડના ચેરમેન ભાજપના છે. તેમણે બોર્ડમાં દરખાસ્ત લાવીને મંદિરો અને મકાનોને રસ્તા પહોળા કરવા માટે તોડી પાડ્યા છે. તેમના કહેવાથી મંદિર તોડી પાડવામાં આવ્યું છે. જ્યારે અમારા કોંગ્રેસના ધારાસભ્ય વિરોધ કરતા રહ્યાં. ગેહલોત સરકારના મંત્રીએ વચન આપ્યું છે કે, જો કોઈ કાયદાકીય અવરોધ નહીં આવે તો મંદિરનું પુનઃનિર્માણ કરવામાં આવશે.
સરકારનો ઈરાદો સ્પષ્ટ નથીઃ સતીશ પુનિયા
બીજી તરફ રાજસ્થાન ભાજપના પ્રદેશ અધ્યક્ષ સતીશ પુનિયાએ કહ્યું કે, સરકારે તેનો રસ્તો કાઢીને મંદિરને બચાવવું જોઈતું હતું. કરૌલીની આ ઘટના બાદ સરકારનો ઈરાદો સ્પષ્ટ દેખાઈ રહ્યો છે. કોંગ્રેસ સરકાર તુષ્ટિકરણની રાજનીતિ કરીને પોતાની વોટ બેંકને ખુશ કરવા માંગે છે, આથી જ 300 વર્ષ જૂના મંદિરને તોડી પાડવામાં આવ્યું.
જાણો શું છે સમગ્ર મામલો?
જણાવી દઇએ કે, અલવરના રાજગઢમાં ત્રણ હિન્દુ મંદિરો તોડી પાડવાનો મામલો સામે આવ્યો છે. માસ્ટર પ્લાનમાં અતિક્રમણની આડમાં રાજગઢ પ્રશાસને 300 વર્ષ જૂના ત્રણ મંદિરો તોડી પાડ્યા હતા. આ મંદિરોમાં સ્થાપિત ભગવાન શિવ, હનુમાનજી સહિત અન્ય દેવી-દેવતાઓની મૂર્તિઓ ખંડેર થઈ હતી. જ્યારે સ્થાનિક લોકોએ તેનો વિરોધ કર્યો તો પોલીસે બળજબરીથી તેઓને હટાવી દીધાં. આ સમગ્ર ઘટના સમગ્ર વિસ્તારમાં ભારે ચર્ચાનો વિષય બન્યો છે. 17 એપ્રિલથી સતત રાજગઢમાં આવાં કિસ્સાઓ સામે આવી રહ્યાં છે.
