કાર્યવાહી / અત્યાર સુધી ગેરકાયદે રહેતા 501 બાંગ્લાદેશીની અટકાયત, તમામને ગુજરાતમાંથી ડિપોર્ટ કરાશે

રાજ્યભરમાં ગેરકાયદે રીતે રહેતા બાંગ્લાદેશી નાગરિકો સામે ગુજરાત પોલીસે વિશેષ ડ્રાઈવ હાથ ધરી છે. 'ઓપરેશન ડેલ્ટા હન્ટ' અંતર્ગત રાજ્યના વિવિધ વિસ્તારોમાં કોમ્બિંગ ઓપરેશન ચલાવી અત્યાર સુધીમાં 501 બાંગ્લાદેશી નાગરિકોની અટકાયત કરવામાં આવી છે.

બે દિવસ પહેલા ઓપરેશન ડેલ્ટા હન્ટ શરૂ કરાયુંઃJCP

ક્રાઈમ બ્રાન્ચના સંયુક્ત પોલીસ કમિશનર (JCP) શરદ સિંઘલે જણાવ્યું હતું કે બે દિવસ અગાઉ શરૂ કરાયેલા આ ઓપરેશન માટે રાજ્યભરમાં 30થી વધુ વિશેષ ટીમો બનાવવામાં આવી હતી. ટીમોએ સંવેદનશીલ વિસ્તારોમાં સઘન તપાસ હાથ ધરી ગેરકાયદે રીતે રહેતા ઘૂસણખોરોને શોધી કાઢ્યા છે.

એજન્ટોના માધ્યમથી બાંગ્લાદેશથી ભારતમાં પ્રવેશ્યા

પોલીસ તપાસમાં સામે આવ્યું છે કે કેટલાક બાંગ્લાદેશી નાગરિકો એજન્ટોના માધ્યમથી બાંગ્લાદેશથી ભારતમાં પ્રવેશ્યા હતા. પ્રાથમિક તપાસ મુજબ, તેઓ પશ્ચિમ બંગાળના સરનામાઓના આધારે ખોટા આધાર કાર્ડ સહિતના દસ્તાવેજો તૈયાર કરાવતા હતા.

તમામ લોકોના દસ્તાવેજોની ચકાસણી ચાલુ

JCP શરદ સિંઘલે વધુમાં જણાવ્યું કે અટકાયત કરાયેલા તમામ લોકોના દસ્તાવેજોની ચકાસણી ચાલી રહી છે. તપાસ પૂર્ણ થયા બાદ કાયદાકીય પ્રક્રિયા અનુસાર તમામ ગેરકાયદે બાંગ્લાદેશી નાગરિકોને ગુજરાતમાંથી ડિપોર્ટ કરવાની કાર્યવાહી હાથ ધરવામાં આવશે.

શરદ સિંઘલ JCP, ક્રાઇમ બ્રાન્ચ

બાંગ્લાદેશી મહિલાઓ સ્પા સેન્ટરોમાં કામ કરતી હોવાની માહિતી પણ સામે આવી

તપાસ દરમિયાન કેટલીક બાંગ્લાદેશી મહિલાઓ સ્પા સેન્ટરોમાં કામ કરતી હોવાની માહિતી પણ સામે આવી છે. ખોટા દસ્તાવેજો તૈયાર કરવામાં સંડોવાયેલા એજન્ટો અને અન્ય લોકોની ભૂમિકા અંગે પણ પોલીસ દ્વારા ઊંડાણપૂર્વક તપાસ કરવામાં આવી રહી છે. રાજ્ય પોલીસનું કહેવું છે કે રાષ્ટ્રીય સુરક્ષા અને કાયદો-વ્યવસ્થાને ધ્યાનમાં રાખીને આવા ગેરકાયદે નેટવર્ક સામે આગળ પણ કડક કાર્યવાહી ચાલુ રહેશે.

આ પણ વાંચોઃ મહેસાણાના શોભાસણમાં કરુણ અકસ્માત, માલગાડીની અડફેટે ત્રણ કિશોરોના મોત, ગામમાં શોકની લાગણી

બાંગ્લાદેશીઓ તેમના દેશ સાથે કોન્ટેક્ટમાંઃ JCP

ભારતીય સિમ કાર્ડ બંગાળના એડ્રેસ પર બનાવતાં હતા. તમામ બાંગ્લાદેશીઓ તેમના દેશ સાથે કોન્ટેક્ટમાં હતા. ચંડોળા ઓપરેશન વખતે બે મોટા નામ હતા લલ્લુ બિહારી ને પણ પકડ્યાં હતા. એજન્ટ કોણ છે જેમને ડોક્યુમેન્ટ બનાવ્યા , કોણ અહીં રાખતું હતું તે તમામ બાબતે તપાસ ચાલુ છે. એજન્ટ અને માણસો સામે કાર્યવાહી કરવામાં આવશે. બાંગ્લાદેશીઓની પોર્ટલ પર એન્ટ્રી કરીશું , ભૂતકાળ માં પકડાયા છે કે નહીં તે અંગે તપાસ થશે. સૌથી વધુ નારોલ વિસ્તાર માંથી બાંગ્લાદેશીઓ પકડાયા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ