પ્રતિક્રિયા / એક દેશ, એક ચૂંટણી અંગે ગુજરાત ભાજપ-કોંગ્રેસમાં વાર પલટવાર, સી આર પાટીલ, શક્તિસિંહના નિવેદનથી રાજકારણ ઉકળ્યું

• એક દેશ, એક ચૂંટણીને લઈ કેન્દ્ર સરકારે કરી કમિટીની રચનાં
• એક દેશ એક ચૂંટણી થકી મતદારોના સમયની બચત થશેઃ સી.આર.પાટીલ
• અન્ય મુદ્દા પરથી ધ્યાન ભટકાવવા ભાજપે એક દેશ એક ચૂંટણીની ચર્ચા શરૂ કરીઃ શક્તિસિંહ ગોહિલ

2024 ની લોકસભાની ચૂંટણી પહેલા મોદી સરકાર દ્વારા મહત્વનો નિર્ણય લેવાની તૈયારીમાં છે. ત્યારે એક દેશ, એક ચૂંટણીને લઈ કેન્દ્ર સરકારે કમિટી બનાવતા સમગ્ર ભારતનાં રાજકારણમાં ચર્ચાઓ શરૂ થઈ છે. કમિટી આ અંગે પોતાનો રિપોર્ટ આપશે. તેમજ પૂર્વ રાષ્ટ્રપતિ રામનાથ કોવિંદ આ કમિટીનું નેતૃત્વ કરશે. ભારત સરકાર ટૂંક સમયમાં આ અંગે સત્તાવાર સૂચના પણ બહાર પાડશે.

એક દેશ એક ચૂંટણી થકી મતદારોના સમયની બચત થશેઃ સી.આર.પાટીલ
આ બાબતે ભાજપ પ્રદેશ પ્રમુખ સી.આર.પાટીલે જણાવ્યું હતું કે, કોઈને કોઈ જગ્યાએ ચૂંટણી થતી જ હોય છે.  જે ન ચાલવી જોઈએ. એક જ સમયે બધી ચૂંટણીઓ થઈ જાય. તેમજ મતદાર એક સાથે જ ચૂંટણી માટે પોતાનો મત આપી શકે છે. ત્યારે વારંવાર મતદારને જે મત આપવા જવું પડે છે. તે પણ જવું પડશે નહી. ચૂંટણીની તૈયારી માટે અધિકારીઓ તેની તૈયારીમાં લાગેલા હોય છે. જેમાં તેઓનાં ઘણા મહિનાં બગડે છે. તેમજ લોકોનાં કામ પણ થતા નથી. જેથી લોકોને તે કામ માટે રાહ જોવી પડે છે.

અન્ય મુદ્દા પરથી ધ્યાન ભટકાવવા ભાજપે એક દેશ એક ચૂંટણીની ચર્ચા શરૂ કરીઃ શક્તિસિંહ ગોહિલ
આ બાબતે પ્રદેશ કોંગ્રેસના પ્રમુખ શક્તિસિંહ ગોહીલે સરકારની આ કવાયતને હાસ્યાસ્પદ ગણાવી છે. ભારતીય જનતા પાર્ટીની સરકારે આ વાત કરવી હોય તો સાડા નવ વર્ષ હતા. તો વાત કેમ ન કરી શક્યા અત્યાર સુધી. ત્યારે ખરા અર્થમાં કરવું નથી. કોઈ પ્રપોઝલ નથી. માત્ર એક કાંકરો ફેંકવાનો જેથી જે સાચા ઈશ્યું છે એની ચર્ચા ન થાય.