PHOTOS / 'તુમ મેરે દિલ કે પાસ હો…', ઓડિશા ટ્રેન દુર્ઘટનાસ્થળેથી વેર વિખેર હાલતમાં મળી આવી રોમેન્ટિક કવિતાઓ, જુઓ વાયરલ તસવીર

• ઓડિશા અકસ્માતમાં 275 લોકોના મોત
• પાટા પરથી મળી આવ્યા કવિતા લખેલા કાગળો
• બંગાળી ભાષામાં કવિતાઓ લખેલી જોવા મળી 

શુક્રવારે (2 જૂન)  સાંજે લગભગ 7 વાગે બાલાસોરના બહંગા બજાર રેલવે સ્ટેશન પાસે કોરોમંડલ એક્સપ્રેસ મેઈન લાઈનની જગ્યાએ લૂપ લાઈનમાં ગઈ હતી, જેના કારણે તે ત્યાં ઉભી રહેલી માલગાડી સાથે અથડાઈ હતી. તે જ સમયે બેંગ્લોર-હાવડા સુપરફાસ્ટ એક્સપ્રેસ પણ આ અકસ્માતની ઝપેટમાં આવી હતી. આ અકસ્માતમાં એક હજારથી વધુ લોકો ઘાયલ થયા છે. તો અકસ્માતમાં 275 લોકોએ જીવ ગુમાવ્યા છે. આ અકસ્માતે આખા દેશમાં ચકચાર મચાવી દીધી છે. 

પાટા પરથી મળી આવ્યા કવિતા લખેલા કાગળો
ઓડિશાના બાલાસોરમાં સર્જાયેલી દુર્ઘટના બાદ રેલવેના પાટા પરથી કેટલાક કાગળો વેરવિખેર હાલતમાં મળી આવ્યા. જ્યારે આ કાગળોને ધ્યાનથી વાંચવામાં આવ્યા ત્યારે તેમાં બંગાળી ભાષામાં પ્રેમની કવિતાઓ લખેલી જોવા મળી. 

પ્રેમના નામે લખી હતી કવિતા 
વાસ્તવમાં આ કોઈ ડાયરીના પાના હતા. તેમાં કોઈ વ્યક્તિએ માછલી, સૂર્ય. અને હાથીઓની તસવીર બનાવીને પોતાના પ્રેમનો ઈઝહાર કર્યો હતો. એવું માનવામાં આવી રહ્યું છે કે કોઈ મુસાફરે પોતાની રજાઓના દિવસોમાં આ કવિતાને તેના પ્રેમના નામે લખી હતી. જોકે, હજુ સુધી આ મુસાફર સંબંધિત કોઈ જાણકારી સામે આવી નથી.

'હું તને દરેક સમયે પ્રેમ કરવા માંગુ છું'
આ કાગળો પર બંગાળી ભાષામાં લખેલી પંક્તિઓ આ પ્રમાણે છે... "અલ્પો અલ્પો મેઘ થેકે હલ્કા બ્રિસ્ટી હોય, છોટો ચોટો ગોલ્પો ઠેકે ભાલોબાસા સૃષ્ટિ હોય." બંગાળી ભાષામાં લખાયેલી આ કવિતાના અર્થ છે- "હું તને દરેક સમયે પ્રેમ કરવા માંગુ છું, તું મારા દિલની નજીક છે.'' આ કવિતા લખેલા પેજ હવે સોશિયલ મીડિયા પર ઝડપથી વાયરલ થઈ રહ્યા છે.

કાગળોને સાચવીને રાખવામાં આવ્યા
રેસ્ક્યૂ ઓપરેશનમાં સામેલ ટીમ અને સ્થાનિક પોલીસ અધિકારીએ જણાવ્યું કે, કવિતા લખેલા કાગળોને સાચવીને રાખવામાં આવ્યા છે. અત્યાર સુધી કોઈએ આ કવિતા પોતે લખી હોવાનું અથવા જેણે આ કવિતા લખી છે, તે તેમના સંબંધી હોવાનો દાવો કર્યા નથી. અધિકારીએ કહ્યું કે, આ કવિતા કોણે લખી તે અંગે કોઈ માહિતી નથી.