સત્ય શું? / પોરબંદર IRBના જવાનના ફાયરિંગ મામલે માનસિક તણાવ જવાબદાર? ગંભીર ઈજાગ્રસ્ત જવાનને જામનગર ખસેડાયો

• પોરબંદરમાં ચૂંટણીકાળ લોહિયાળ 
• આરોપી જવાન ઈનાઉયાસિંઘની ધરપકડ
• ઇજાગ્રસ્ત જવાનને વધુ સારવારની જરૂર જણાતા ખસેડાયો જામનગર

રાજ્યભરમાં વિધાનસભાની ચૂંટણીનો માહોલ બરાબર જામ્યો છે અને હવે પ્રથમ તબક્કામાં 89 બેઠકો પર મતદાનને આડે ફક્ત ચાર દિવસ જ બાકી રહ્યા છે, ત્યારે પોરબંદરમાં ચૂંટણીકાળ લોહિયાળ બન્યો છે. 26 તારીખે ઈન્ડિયન રિઝર્વ બટાલિયનના એક જવાને અચાનક જ પોતાના સાથી જવાનો પર પોતાની એકે – 47 રાઈફલમાંથી ગોળીબાર કરતાં બે જવાનોના મોત નિપજ્યા હતા. પોરબંદર જિલ્લામાં ચૂંટણી બંદોબસ્ત માટે CISF, પેરા મિલિટ્રી ફોર્સ અને રિઝર્વ બટાલિયનના જવાનોને બોલાવવામાં આવ્યા છે. તે પૈકી ઈન્ડિયન રિઝર્વ ફોર્સની બે બટાલિયનને પોરબંદરમાં નવી રહેવાની વ્યવસ્થા કરવામાં આવી છે. અહીં મણીપુરની બે બટાલિયનના 160 જવાનો તૈનાત કરવામાં આવ્યા છે. 

જવાનને વિશેષ સારવાર જામનગર ખસેડાયો 
પોરબંદરની ભાગોળે આવેલા ગોસા (ટુકડા) ખાતેના સાઈક્લોન સેન્ટરમાં ગઈકાલે સાંજે ઈન્ડિયન રિઝર્વ બટાલિયનના એક જવાને અચાનક જ પોતાના સાથી જવાનો પર પોતાની એકે – 47 રાઈફલમાંથી ધાણીફૂટ ગોળીબાર કરતાં બે જવાનોના મોત નિપજ્યા હતા, જ્યારે અન્ય બે જવાનોને ઈજાઓ થતાં સારવાર માટે પોરબંદરની સરકારી હોસ્પિટલમાં ખસેડાયા હતા. જવાને માનસિક તણાવમાં આવી જઈને આવું હિંસક કૃત્ય આચર્યું હોવાનું પોલીસની પ્રાથમિક તપાસમાં ખૂલ્યું છે. આ ઘટનામાં ઘવાયેલા એક જવાનની હાલત વધુ ગંભીર થતાં તેને વિશેષ સારવાર માટે ગઈકાલે મોડી રાત્રે જામનગર ખસેડવામાં આવ્યો હતો.

મજાકમાં ઉશ્કેરાઈ જઇ કર્યું ફાયરિંગ
મણીપુરની બે બટાલિયનના 160 જવાનો ગઈકાલે સવારે જ આવ્યા હતા અને હજુ સુધી તેમને કોઈ ડ્યૂટી પણ સોંપવામાં આવી ન હતી. દરમિયાનમાં ગઈકાલે સાંજે સાડા પાંચ-છ વાગ્યાના અરસામાં આઈઆરબીની થર્ડ અને ફોર્થ બટાલિયનના જવાનો પોતાના કામકાજમાં મશગૂલ હતા અને મજાક-મસ્તીનો દોર ચાલી રહ્યો હતો. આ મજાક-મસ્તીનો દોર ક્યારે ગંભીર બની ગયો તેની કોઈને ખબર જ ન રહી. જવાનો વચ્ચેની આ મજાકથી થર્ડ બટાલિયનનો જવાન એસ. ઈનાઉયાસિંઘ ઉશ્કેરાઈ ગયો હતો અને તેણે પોતાની પાસે રહેલી એકે-૪૭ રાઈફલમાંથી પોતાના સાથી જવાનો પર ગોળીબાર શરુ કરી દીધો હતો. આ ગોળીબારમાં થર્ડ બટાલિયનના જવાન થોઈબાસિંઘ (ઉં.વ.38) અને જીતેન્દ્રસિંઘ ખુમાન થેમ (ઉં.વ.50)ના મોત નિપજ્યા હતા, જ્યારે રોહિકાના એક કોન્સ્ટેબલ(ફોઆઈઆરબી) તથા ચોરાજીત (રાયફલમેન, થર્ડ આઈઆરબી)ને ગંભીર ઈજાઓ થતાં પોરબંદર ખાતે પ્રાથમિક સારવાર આપી વધુ સારવાર માટે જામનગરના દવાખાને ખસેડવામાં આવ્યા છે.

જવાન ઈનાઉયાસિંઘની ધરપકડ
બનાવની તપાસ નવી બંદર પોલીસ ચલાવી રહી છે. પોરબંદર એસપી ડો. સેનીના જણાવ્યા મુજબ આરોપી ઈનાઉયાસિંઘે પોતાની એકે –૪૭ રાઈફલમાંથી 10 રાઉન્ડ ગોળીબાર કર્યો હતો.  પોરબંદર જિલ્લા પોલીસ વડા ડો. રવિ મોહન સૈની, ડીવાયએસપી ગ્રામ્ય, એલસીબી પીઆઈ શ્રીમાળી, નવી બંદર પોલીસના પીએસઆઈ જાડેજા સહિતના અધિકારીઓ ઘટનાસ્થળે દોડી ગયા હતા. પોલીસે આ હત્યાકાંડ સર્જનાર આઈઆરબીના જવાન ઈનાઉયાસિંઘની ધરપકડ કરી તેની સામે હત્યા સહિતની કલમો હેઠળ ગુનો નોંધ્યો છે.