દુર્ઘટના / ગમખ્વાર રવિવાર: જયપુરમાં વહેલી સવારે 3 માળની ઈમારતમાં લાગી ભીષણ આગ, લોકો જીવ બચાવવા દોડ્યા

• જયપુરના પ્રતાપનગરમાં એપાર્ટમેન્ટમાં લાગી હતી ભીષણ આગ
• ત્રીજા માળે ફસાયેલા લોકો બૂમાબૂમ કરતા રહ્યાં
• વેપારીના લાખો રૂપિયાના કપડા બળીને ખાખ થઈ ગયા

જયપુરમાં આજ સવારે લાગેલી આગે એવો તાંડવ મચાવ્યો હતો કે સમગ્ર વિસ્તારમાં હોબાળો મચી ગયો હતો. જયપુરના પ્રતાપનગર પોલીસ સ્ટેશન વિસ્તારમાં આવેલ જગતપુરા વિસ્તારમાં 3 માળના એપાર્ટમેન્ટમાં સવારના 4:00 વાગ્યે આ ભીષણ આગ લાગી હતી. આ ભીષણ આગ ફેલાતાની સાથે જ ત્યાં રહેતા લોકોને તેની જાણ થઈ જતા તેઓ તુરંત જાગી ગયા અને તેઓએ જ્યારે પોતાને આગથી ઘેરાયેલા જોયા ત્યારે તેઓએ ચીસાચીસ કરી મૂકી હતી. તમને જણાવી દઇએ કે, આ આગના કારણે લાખોનો માલસામાન બળીને રાખ થઈ ગયો હતો.

(પ્રતિકાત્મક તસવીર)

ત્રીજા માળે ફસાયેલા લોકો ચીસો પાડતા રહ્યાં

આગમાં ફસાયેલા લોકોએ તેમના સંબંધીઓને મદદ માટે બોલાવ્યા હતા અને બાદમાં તેઓએ પોલીસને જાણ કરી. બાદમાં પ્રતાપ નગર પોલીસ ઘટનાસ્થળે પહોંચી અને સિવિલ ડિફેન્સની ટીમને ઘટનાસ્થળે બોલાવી લીધી. સિવિલ ડિફેન્સ ટીમના 12 કર્મચારીઓ જરૂરી સાધનો સાથે ઘટનાસ્થળે પહોંચી ગયા હતા અને આ આગ પર કાબુ મેળવીને ત્રીજા માળે ફસાયેલા લોકોને બહાર નીકાળવામાં આવ્યા હતા. તેઓને બહાર કાઢવા માટે સીડીનો ઉપયોગ કરવામાં આવ્યો હતો. પોલીસે જણાવ્યું કે, જગતપુરામાં અક્ષય પત્ર નજીક મધર ટેરેસા સ્કૂલ પાસેના એપાર્ટમેન્ટમાં આગ લાગી હતી. આ આગ લાગવાનું પ્રાથમિક કારણ હાલમાં શોર્ટ સર્કિટ જણાવવામાં આવી રહ્યું છે. આ આગના કારણે બિલ્ડીંગને પણ નુકસાન થયું હતું.

સદ્દનસીબે લોકોને સમયસર બહાર કાઢી દેવામાં આવ્યા

જણાવી દઈએ કે, આ ભીષણ આગમાં કપડાના વેપારીના લાખો રૂપિયાના કપડા બળીને ખાખ થઈ ગયા. એવું કહેવાય છે કે લગ્નની સિઝનના કારણે વેપારીએ થોડા દિવસો પહેલા વર-કન્યા સિવાયના કપડા ખરીદ્યા હતા. તેણે પોતાના ઘરના એક રૂમને ગોડાઉનમાં ફેરવી નાખ્યો હતો. પરંતુ રૂમમાં રાખેલ સામાન બળીને ખાખ થઈ ગયો હતો. જો કે ફાયરની ટીમ અને પોલીસે ઘટનાસ્થળે પહોંચીને સમયસર આગને કાબુમાં લઇ લીધી હતી. જેના કારણે સદ્દનસીબે લોકોને સમયસર બહાર કાઢી દેવામાં આવ્યા નહીં તો આ આગના કારણે કોઇ જાનહાની થઈ હોત. આ રીતે મોટી દુર્ઘટના થતા-થતા ટળી ગઇ.