- રાજ્યમાં વધુ એક પરીક્ષામાં ગેરરીતિ
- ગુજરાતની વીજ કંપનીની પરીક્ષામાં ગેરરીતિ
- ક્રાઈમબ્રાંચે બે આરોપીની કરી ધરપકડ
ગુજરાતમાં વધુ એક પરીક્ષામાં ગેરરીતિનો પર્દાફાશ થયો છે. ગુજરાતની વીજ કંપનીની ઓનલાઇન પરીક્ષામાં ગેરરીતિ થઈ હોવાનું સામે આવતા સુરત ક્રાઈમ બ્રાન્ચે તપાસનો ધમધમાટ શરૂ કર્યો હતો. પરીક્ષામાં થયેલી ગેરરીતિનો ક્રાઇમ બ્રાન્ચે પર્દાફાશ કર્યો છે.
DCP રૂપલ સોલંકીએ મીડિયાને આપી માહિતી
સુરત ક્રાઇમ બ્રાન્ચ દ્વારા આ મામલે બે આરોપીઓની ધરપકડ કરવામાં આવી છે. વીજ કંપનીની ઓનલાઈન પરીક્ષાઓમાં ગેરરીતિ કરનારા બે ઝડપાયા છે. આ મામલે ક્રાઈમ બ્રાન્ચના DCP રૂપલ સોલંકી પ્રેસ કોન્ફરન્સ યોજીને માહિતી આપી છે.
11 લોકો સામે નોંધાઈ છે ફરિયાદ
આ મામલે DCP રૂપલ સોલંકીએ માહિતી આપતા જણાવ્યું છે કે, સુરત ક્રાઈમ બ્રાન્ચના PI ફરિયાદી બન્યા છે. ઈન્દ્રવદન પરમાર, ઓવેશ કાપડિયાની ધરપકડ કરવામાં આવી છે. વીજ કંપનીની ઓનલાઈન પરીક્ષામાં ગેરરીતિમાં કુલ 11 લોકો સામે ફરિયાદ નોંધાઈ છે. આ પરીક્ષા વર્ષ 2022-2021માં યોજાઈ હતી. પરીક્ષા રાજ્યના વિવિધ સેન્ટરોમાં લેવાઈ હતી. માત્ર સુરત જ નહીં અમદાવાદ, વડોદરામાં પણ ગેરરીતિ આચરવામાં આવી હતી. બે પરીક્ષા કેન્દ્રોમાં ગેરરીતી આચરવામાં આવી હતી.
ઉમેદવારોનો અગાઉથી જ કરી લેતા હતા સંપર્ક
તેમણે જણાવ્યું કે, આ કેસમાં અનિકેત ભટ્ટ અને ભાસ્કર ચૌધરી હજુ વોન્ટેડ છે. તેઓ ઉમેદવારોનો અગાઉથી જ સંપર્ક કરી લેતા હતા. આ ટોળકીએ કયા કયા લાભાર્થીઓનો સંપર્ક કર્યો તેની તપાસ ચાલુ છે. ઈન્દ્રવદન પરમાર, ઓવેશ કાપડિયાની પૂછપરછમાં ચોંકાવનારા ખુલાસા થઈ શકે છે.
