બાળ સંસદ / નાનકડા ભૂલકાઓ બન્યા નેતા! મુવાડા ગામની શાળામાં વિદ્યાર્થીઓ લડ્યા ચૂંટણી, થયું ભારે મતદાન

• દહેગામમાં અનોખો પ્રયાસ
• શાળામાં યોજાઈ બાળ સંસદ
• ચૂંટણી યોજીને સોંપાયું પદ

તમે અત્યાર સુધી સંસદમાં નેતાઓને ચૂંટાઈને જતા જોયા હશે. આ નેતાઓને ચૂંટવા માટે મતદાન યોજવામાં આવે છે. દહેગામમાં જીવરાજના મુવાડા ગામની પ્રાથમિક શાળામાં એક બાળ સંસદ યોજવામાં આવી. જેમાં ચૂંટણી પણ યોજાઈ. એટલું જ નહીં વિદ્યાર્થીઓને લોકશાહી ઢબે થતી ચૂંટણી પ્રક્રિયાથી વાકેફ કરવામાં આવ્યા હતા.

ચૂંટણીમાં જીતેલા વિદ્યાર્થીઓની શપથવિધિ યોજાઈ
જે રીતે ચૂંટણી પહેલા બધી પ્રક્રિયા હાથ ધરાય છે તે પ્રક્રીયા અહીં પણ થઈ. મતદાર યાદી જાહેર થઈ, ઉમેદવારી પત્ર ભરાયું, ઉમેદવારી પાછી ખેંચવી, ચૂંટણી પ્રચાર, મતદાન અને બાદમાં પરિણામ જાહેર કરવામાં આવ્યું. ચૂંટણીમાં જીતેલા વિદ્યાર્થીઓની શપથવિધિ પણ યોજવામાં આવી. મતદાન પ્રક્રિયા માટે પણ વિદ્યાર્થીઓમાંથી જ પ્રિસાઈડિંગ અધિકારી, મતદાન અધિકારી, પોલીંગ અધિકારી, પોલીસ જવાન સહિતનો સ્ટાફ ઉભો કરાયો. મતદાનની ગુપ્તતા અને ગંભીરતા જળવાય તેનું ધ્યાન રખાયું. અહીં મોબાઈલ EVMથી મતદાન કરવામાં આવ્યું હતું. મતદાન બાદ મત ગણતરી કરીને વિજેતાના નામ જાહેર કરવામાં આવ્યા હતા.

ચૂંટણીમાં ઉમેદવારી કરવા અને મતદાન કરવાની બાળકોને મળી તક
ઉમેદવારની હાજરીમાં મતગણતરી કરીને ચૂંટાયેલા ઉમેદવારમાંથી મહામંત્રી, પ્રાર્થના સમિતિ, સફાઈ સમિતિ, બગીચા સમિતિ અને બાલ સભા સમિતિનું સુકાન સોંપવામાં આવ્યું. શાળા કક્ષાએથી જ ચૂંટણીમાં ઉમેદવારી કરવા અને મતદાન કરવાની બાળકોને તક મળી હતી. જેથી ભવિષ્યમાં સમાજને સારા નાગરિક અને સારા નેતા મળે તે હેતુથી શાળા દ્વારા આ સુંદર આયોજન કરાયું હતું.

નાની ઉંમરે જ મતદાન કરવાની તક મળતાં વિદ્યાર્થીઓમાં અનેરો ઉત્સાહ જોવા મળ્યો હતો. શાળા દ્વારા વિદ્યાર્થીઓને મતદાન મુદ્દે વાકેફ કરવા આ આયોજન કરાયું હતું. હવે શાળાનું સંચાલન પણ બાળ સંસદ દ્વારા જ કરવામાં આવશે.