ક્રાઈમ / જામનગરમાં બે વયોવૃદ્ધ શખ્સોએ 12 વર્ષની સગીરા પર દુષ્કર્મ આચર્યું, ગર્ભ રહી જતાં ફૂટ્યો ભાંડો

સંસ્કારી નગરી ગણાતા જામનગરમાંથી માનવતાને લજવતો અને કાળજું કંપાવતો એક અત્યંત શરમજનક કિસ્સો સામે આવ્યો છે. શહેરના સિટી બી ડિવિઝન પોલીસ સ્ટેશન વિસ્તારમાં સાડા બાર વર્ષની નાની વયની સગીરા પર બે વયોવૃદ્ધ શખ્સો દ્વારા દુષ્કર્મ આચરવામાં આવ્યાની ગંભીર ઘટના પ્રકાશમાં આવી છે. આ ઘૃણાસ્પદ કૃત્યથી સમગ્ર પંથકમાં રોષની લાગણી ફેલાઈ છે અને ચોતરફથી ફિટકાર વરસી રહ્યો છે.

કેવી રીતે ફૂટ્યો ભાંડો?

ઘટનાની વિગતો મુજબ, ગત ઓગસ્ટ મહિનાની શરૂઆતમાં (આશરે ૨ ઓગસ્ટે) પીડિત સગીરાની તબિયત લથડતા તેને હોસ્પિટલમાં ખસેડવામાં આવી હતી. જ્યાં તબીબી તપાસ દરમિયાન ચોંકાવનારો ખુલાસો થયો હતો કે સગીરા આશરે ૬ માસનો ગર્ભ ધરાવતી હતી અને હોસ્પિટલમાં તેણે અધૂરા માસે મૃત શિશુને જન્મ આપ્યો હતો. આ ભયાનક સત્ય બહાર આવતા જ સગીરાના વાલીના પગ નીચેથી જમીન સરકી ગઈ હતી અને તાત્કાલિક પોલીસ મથકે ફરિયાદ નોંધાવવામાં આવી હતી.

નરાધમોની ઉંમર જોઈને લોકો દંગ રહી ગયા

આ કેસમાં પોલીસે માનસિક વિકૃતિની હદ વટાવી ચૂકેલા બે વયોવૃદ્ધ આરોપીઓની ઓળખ કરી સકંજામાં લીધા છે. જૂનસભાઈ ઉર્ફે ભાઈ ચામડિયા (ઉંમર આશરે ૬૫ વર્ષ)અને બશીરભાઈ નૂરમહંમદ જોખિયા (ઉંમર આશરે ૬૬ વર્ષ) સમાજમાં વડીલ ગણાવવાની વયે આ પ્રકારનું કૃત્ય આચરનાર આ બંને નરાધમોની અટકાયત કરી પોલીસે તેમને જેલના સળિયા પાછળ મોકલી આપ્યા છે.

આ પણ વાંચો : 'જ્યારે સાજા થઈ જાવ, ત્યારે મારી પાસે એક આઈડિયા છે', ભારતીય પાઇલટ સ્મિત મછારને મળ્યા UAEના રાષ્ટ્રપતિ

સગીર સામે પણ કાર્યવાહી

આ અગાઉ આ જ ગુનાના સંદર્ભમાં કાયદાના સંઘર્ષમાં આવેલા એક સગીર (કિશોર) સામે પણ કાનૂની કાર્યવાહી કરી અહેવાલ રજૂ કરાયો હતો. હાલ બંને આરોપીઓની ધરપકડ કરીને તેમને જ્યુડિશિયલ કસ્ટડીમાં મોકલવાની તજવીજ પૂર્ણ કરવામાં આવી છે, જ્યારે આ ગુનામાં અન્ય કોઈની સંડોવણી છે કે કેમ તે દિશામાં સિટી બી ડિવિઝન પોલીસ દ્વારા સઘન તપાસ જારી છે. નાની બાળકીઓની સુરક્ષા અને સલામતી સામે સવાલો ઊભા કરતી આ ઘટનાએ જામનગરના નાગરિકોને હચમચાવી દીધા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ