KKR vs RR IPL 2024: રાજસ્થાન રોયલ્સનું અત્યાર સુધી આ IPLમાં શાનદાર પ્રદર્શન જોવા મળ્યું છે. ટીમે લીગમાં અત્યાર સુધી એક મેચ સિવાય તમામ જીત મેળવી છે. મંગળવારે રાજસ્થાને પણ રોમાંચક મેચમાં કોલકાતા સામે બે વિકેટે જીત મેળવી હતી. હવે KKRની હાર બાદ શ્રેયસ અય્યરે મોટું નિવેદન આપ્યું છે.
આઈપીએલ 2024ની 31મી લીગ મેચમાં જ્યારે કોલકાતા નાઈટ રાઈડર્સે પ્રથમ બેટિંગ કરીને પોતાના હોમ ગ્રાઉન્ડ પર 223 રન બનાવ્યા ત્યારે તેઓએ વિચાર્યું પણ નહીં હોય કે ટીમને હારનો સામનો કરવો પડશે. કેપ્ટન શ્રેયસ અય્યરે પણ આ વાત સ્વીકારતા કહ્યું હતું કે તેણે વિચાર્યું ન હતું કે અમે આ પરિસ્થિતિમાં આવીશું.
રાજસ્થાન રોયલ્સના ઓપનર જોસ બટલરે સદી ફટકારીને ટીમને ઐતિહાસિક જીત અપાવી હતી. એક સમયે કેકેઆરની ટીમ જીતી રહી હોય તેવું લાગતું હતું, પરંતુ બટલર રાજસ્થાનની ટીમ માટે એકલો ઊભો રહ્યો અને જીતીને જ પરત ફર્યો. મેચ બાદ કેપ્ટન શ્રેયસ અય્યરે હાર વિશે વાત કરતાં કહ્યું, "ખરેખર આજે લાગણીઓ એક રોલર કોસ્ટર હતી, ચોક્કસપણે વિચાર્યું ન હતું કે અમે આ સ્થાન પર પહોંચીશું. શું થયું તે સમજાવવું મુશ્કેલ છે પણ અમારે તેનો સામનો કરવો પડશે અને આગળ વધવું પડશે. ખુશી છે કે તે અહીં થયું અને ટૂર્નામેન્ટના અંતે નહીં. મહત્વની વાત એ છે કે અમે અમારી ભૂલોમાંથી શીખીએ છીએ અને મજબૂત રીતે પાછા આવીએ છીએ.'
નાઈટ રાઈડર્સે છેલ્લી ઓવરમાં 9 રન બચાવવાની જવાબદારી સ્પિનર વરુણ ચક્રવર્તીને સોંપી હતી, પરંતુ તે આમ કરવામાં નિષ્ફળ ગયો હતો. અય્યરે તેને છેલ્લી ઓવર નાખવાના નિર્ણયનો બચાવ કર્યો. તેણે કહ્યું, 'બટલર આસાનીથી શોટ ફટકારી રહ્યો હતો, તેથી મેં વિચાર્યું કે બોલની સ્પીડ ઓછી કરીને વરુણ ચક્રવર્તીને આપીએ, પરંતુ તેણે સફળતાપૂર્વક મોટો શોટ રમ્યો હતો.'
કોલકાતાના ઈડન ગાર્ડન્સ સ્ટેડિયમમાં રાજસ્થાને 2 વિકેટે જીત મેળવી હતી. સુનીલ નારાયણની સદીના આધારે KKRએ 224 રનનો ટાર્ગેટ આપ્યો હતો, જેને રાજસ્થાને છેલ્લા બોલે હાંસલ કરી લીધો હતો. આરઆરની આઠ વિકેટ પડી હતી. નરેનની સદી પર રાજસ્થાનના ઓપનર જોસ બટલરની સદીથી ભારે પડી હતી. બટલરે 60 બોલમાં 9 ચોગ્ગા અને 6 છગ્ગાની મદદથી 107 રનની અણનમ ઇનિંગ રમી હતી.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
