લોકસભા ચૂંટણી 2024માં બનાસકાંઠા લોકસભા બેઠક રાજ્યમાં સૌથી વધુ ચર્ચાસ્પદ, આ બેઠક પર મહિલા ઉમેદવારો વચ્ચે જંગ
Share
Banaskantha Lok Sabha Seat: લોકસભા ચૂંટણી 2024માં બનાસકાંઠા લોકસભા બેઠક રાજ્યમાં સૌથી વધુ ચર્ચાસ્પદ બની છે. આ બેઠક પર બંને મુખ્યપક્ષો દ્વારા મહિલા ઉમેદવારોને મેદાનમાં ઉતારવામાં આવી છે. કોંગ્રેસ દ્વારા ગેનીબેન ઠાકોરને ઉતારવામાં આવ્યા છે જ્યારે ભાજપે શિક્ષણ ક્ષેત્ર સાથે સંકળાયેલા રેખાબેન ચૌધરીને ટિકિટ આપી છે. ગુજરાતની આ એકમાત્ર બેઠક છે જ્યાં મહિલાઓ વચ્ચે લડાઈ છે. ગુજરાતની 26 લોકસભા બેઠકો માટે ત્રીજા તબક્કામાં ચૂંટણી યોજાશે. અને 7 મેના રોજ મતદાન થશે. પરંતુ બનાસકાંઠા લોકસભા બેઠક પર મહિલા ઉમેદવારો વચ્ચે જંગ છે ત્યારે કોંગ્રેસે મજબુત ઉમેદવારને ઉતારીને ભાજપને પડકાર ફેક્યો છે.
લોકસભાનો માહોલ જામી રહ્યો છે.તેવામાં ભાજપને પહેલી વખત રાજ્યમાં ઉમેદવારોને લઇ અસમંજસનો સામનો કરવો પડી રહ્યો છે. ઘણી બેઠકો એવી છે જ્યા ભાજપે ઉતારેલા ઉમેદવારોનો પક્ષના કાર્યકરો વિરોધ કરી રહ્યા છે. બનાસકાંઠા લોકસભા બેઠક પર બે મહિલા ઉમેદવારો વચ્ચે જંગ છે. ભાજપે આ બેઠક પરથી ડો.રેખાબેન ચૌધરીને ટિકિટ આપી છે, જ્યારે કોંગ્રેસ પાર્ટીએ જાણીતા ચહેરો અને મહિલા ધારાસભ્ય ગેનીબેન ઠાકોરને ટિકિટ આપી છે. અત્યાર સુધી બનાસકાંઠા એકમાત્ર એવી બેઠક છે જ્યાં કોંગ્રેસ અને ભાજપ બંનેએ મહિલા ઉમેદવારો પર દાવ લગાવ્યો છે. રેખા ચૌધરી પોતાને બનાસકાંઠાની દીકરી ગણાવીને લોકો પાસે વોટ માંગી રહ્યા છે. જ્યારે કોંગ્રેસના વર્તમાન ધારાસભ્ય ઈમોશનલ કાર્ડ રમીને પોતાને બનાસકાંઠાની બહેન સાથે જોડીને વોટ માંગી રહ્યા છે. તે કહે છે કે મને એટલું મામેરુ આપો કે હું જીતી શકું. સાથે ગરીબની દીકરી કહીને લોકોની વચ્ચે જઇ રહ્યા છે.
કોણ જીતશે?
ભાજપના ઉમેદવાર ડો.રેખા ચૌધરી શિક્ષણ ક્ષેત્રે સક્રિય છે જે નોકરી છોડીને ચૂંટણી મેદાનમાં ઉતર્યા છે. રેખાબેન લોકોની વચ્ચે જઇ કહે છે કે હું તમારી બધી સમસ્યાઓ દિલ્હીમાં ઉઠાવીશ. હું હિન્દી અને અંગ્રેજી સારી રીતે બોલી શકું છું. ત્યારે બનાસકાંઠામાં દીકરી અને બહેન વચ્ચે કોણ જીતશે? મતદારો કોને પસંદ કરે છે તે તો 4 જૂને જ ખબર પડશે, પરંતુ ગુજરાતની બનાસકાંઠા બેઠક મહિલા વચ્ચેના જંગને લઇ ચર્ચામાં આવી છે. રેખા ચૌધરી પહેલીવાર ચૂંટણી લડી રહ્યા છે જ્યારે ગેનીબેન ઠાકોર લાંબા સમયથી રાજકારણમાં છે. તેઓ બીજી વખત ધારાસભ્ય તરીકે ચૂંટાયા છે.
રેખા ચૌધરી ગણિતના પ્રોફેસર છે
ભાજપના ઉમેદવાર ડો.રેખાબેન ચૌધરી ગલબાભાઈ ચૌધરીના પૌત્રી છે. ગલબાભાઈએ બનાસ ડેરીની સ્થાપના કરી હતી. રેખા ચૌધરીએ M.Sc., M.Phil અને પીએચ.ડી. (ગણિત) થયેલા છે. અને તેઓ 44 વર્ષથી પાલનપુરમાં રહે છે. 20 વર્ષથી એન્જિનિયરિંગ કોલેજમાં પ્રોફેસર હતા. રેખા ચૌધરી ભાજપના મોરબી જિલ્લા પ્રભારી ડો. હિતેશ ચૌધરીના પત્ની છે. ડો. હિતેશભાઈ અગાઉ પક્ષ માટે કચ્છ જિલ્લાના પ્રભારી, બનાસકાંઠા જિલ્લાના ભાજપ મહાસચિવ અને રાજ્ય કક્ષાએ ગુજરાતમાં બીજેવાયએમના ત્રણ વખત પદાધિકારી રહી ચૂક્યા છે.
શું ગનીબેનને ફરી આશ્ચર્ય થશે?
ગેનીબેન ઠાકોર કોંગ્રેસના નેતા છે. 2017માં તેઓ વાવમાંથી ભાજપના દિગ્ગજ નેતા શંકર ચૌધરીને હરાવીને પ્રથમ વખત ધારાસભ્ય બન્યા હતા. ગેનીબેન 2012માં વાવમાંથી ગુજરાત વિધાનસભાની ચૂંટણી લડ્યા હતા પરંતુ હારી ગયા હતા. ત્યારબાદ તેઓ વાવ મતવિસ્તારમાંથી 2017ની ગુજરાત વિધાનસભાની ચૂંટણી લડ્યા અને 6655 મતોના માર્જિનથી જીત્યા. ગેનીબેન 2022 માં ફરીથી ચૂંટાઈ ધારાસભ્ય બન્યા છે. 2019 માં ગેનીબેન ઠાકોરે સમાજની અપરિણીત છોકરીઓ માટે મોબાઇલ ફોન પ્રતિબંધ મૂકવાના સમાજના નિર્ણયને ટેકો આપ્યો હતો. ત્યારે તે લાઇમલાઇટમાં આવ્યા હતા.
શું છે બનાસકાંઠાનું ગણિત?
બનાસકાંઠા લોકસભા મતવિસ્તારમાં 7 વિધાનસભા બેઠકનો સમાવેશ થાય છે. 7 પૈકી 4 બેઠકો ભાજપ પાસે છે જ્યારે 2 બેઠકો કોંગ્રેસ પાસે છે. એક બેઠક અપક્ષ માવજી દેસાઈ ભાજપને સમર્થન આપી ચૂક્યા છે. સાત બેઠકો પૈકી દાંતા સીટ સિવાય અન્ય તમામ સીટ સામાન્ય છે. દાંતા બેઠક અનુસૂચિત જનજાતિ માટે અનામત છે. કોંગ્રેસના લોકસભા બેઠકના ઉમેદવાર ગેનીબેન ઠાકર વાવ બેઠક પરથી ધારાસભ્ય છે. ધાનેરા બેઠક અપક્ષ પાસે છે, દાંતા બેઠક પણ કોંગ્રેસ પાસે છે. બાકીની ચાર બેઠકો ભાજપના કબજામાં છે.
સરહદી જિલ્લા બનાસકાંઠામાં 1951થી લઈને 2019 સુધીમાં કુલ 19 વખત લોકસભાની ચૂંટણી યોજાઈ છે. 2013ની પેટાચૂંટણીમાં ભાજપે બનાસકાંઠા બેઠક પર ચોથી વખત જીત મેળવી હતી. ત્યારથી આ સીટ ભાજપના કબજામાં છે. આ બેઠક પર ભાજપે છ વખત જીત મેળવી છે જ્યારે કોંગ્રેસે 10 વખત જીત મેળવી છે. આ સીટ સ્વતંત્ર પાર્ટી, જનતા પાર્ટી અને પછી જનતા દળ એકએક વાર જીતી ચુક્યુ છે. 2019ની લોકસભા ચૂંટણીમાં ભાજપે આ સીટ 3,68,296 વોટથી જીતી હતી. ભાજપના ઉમેદવાર પરબતભાઈ પટેલે કોંગ્રેસને હરાવ્યા હતા, આ વખતે ભાજપે ફેરફાર કરીને રેખા ચૌધરીને અહીંથી મેદાનમાં ઉતાર્યા છે.
