Petrol Diesel / પેટ્રોલ ડીઝલના વધેલા ભાવથી સરકારને કેટલી કમાણી? નાણામંત્રીનો જવાબ સાંભળીને ચક્કર આવી જશે

• પેટ્રોલ ડીઝલ પાછળ સરકારની આવક 
• સંસદમાં સીતારમણનો જવાબ 
• ફરી એ ભાવ થશે કે નહીં?

મોંઘવારીના જમાનામાં પેટ્રોલ-ડીઝલના વધતા ભાવોએ સામાન્ય માણસનું 'તેલ' કાઢી નાખ્યું છે. જો કે, ભૂતકાળમાં કેન્દ્ર અને કેટલીક રાજ્ય સરકારોએ ટેક્સમાં ઘટાડો કરીને જનતાને રાહત આપવાનો પ્રયાસ કર્યો છે, પરંતુ આ રાહત છતાં તેલના ભાવ હવે એટલા ઊંચા સ્તરે પહોંચી ગયા છે, જ્યાંથી નીચે આવવું મુશ્કેલ છે. આવી સ્થિતિમાં દરેક વ્યક્તિ એ જાણવા માંગે છે કે સામાન્ય માણસના ખિસ્સા કાપ્યા પછી સરકારે પોતાની તિજોરી કેટલી ભરી? તો આ સવાલનો જવાબ હવે મળી ગયો છે. સરકારે સંસદમાં ઈંધણથી થતી કમાણી અંગે માહિતી આપી છે.

સાંસદોએ ઉઠાવ્યો હતો મુદ્દો 
સંસદમાં કેટલાક સાંસદોએ પેટ્રોલ અને ડીઝલની કિંમતો પર સવાલ ઉઠાવ્યા અને સરકારને પૂછ્યું કે તેને ઘટાડવા માટે શું પગલાં લેવામાં આવી રહ્યા છે. સાંસદોએ એવો પણ સવાલ કર્યો હતો કે ઈંધણ વેચીને સરકારને કેટલો ટેક્સ મળ્યો છે. તેના પર કેન્દ્રીય નાણામંત્રીએ કહ્યું કે, છેલ્લા ત્રણ નાણાકીય વર્ષમાં સરકારને ટેક્સમાંથી 8.02 લાખ કરોડ રૂપિયાની આવક થઈ છે, જ્યારે આ નાણાકીય વર્ષમાં જ 3.71 લાખ કરોડ રૂપિયાથી વધુની આવક થઈ છે.

સંસદમાં સીતારમણનું નિવેદન
કેન્દ્રીય નાણામંત્રી નિર્મલા સીતારમણે મંગળવારે સંસદમાં જણાવ્યું કે સરકારને પેટ્રોલ અને ડીઝલમાંથી કેટલી કમાણી થઈ છે. નાણામંત્રીના જણાવ્યા અનુસાર, છેલ્લા ત્રણ નાણાકીય વર્ષમાં સરકારે પેટ્રોલ અને ડીઝલ પરના ટેક્સમાંથી 8.02 લાખ કરોડ રૂપિયાની કમાણી કરી છે. સીતારમણે કહ્યું કે નાણાકીય વર્ષ 2021માં જ સરકારને ટેક્સમાંથી 3.71 લાખ કરોડ રૂપિયાની આવક થઈ છે.

ક્રૂડ ઓઈલના ભાવ
આ વર્ષે 4 નવેમ્બરે, દિવાળી પહેલા, સરકારે પેટ્રોલ અને ડીઝલ પરની એક્સાઈઝ ડ્યુટી અનુક્રમે 5 રૂપિયા અને 10 રૂપિયા પ્રતિ લિટર ઘટાડી હતી. આ પછી ઘણા રાજ્યોએ વેલ્યુ એડેડ ટેક્સ (વેટ)માં ઘટાડો કરવાની જાહેરાત કરી. આ પછી, પેટ્રોલ અને ડીઝલની વધતી કિંમતોમાં થોડો ઘટાડો થયો હતો, જો કે, હવે તે પહેલા કરતા ઘણા વધારે છે અને તેના ઓછા આવવાની કોઈ શક્યતા નથી દેખાતી. સરકાર આ માટે વૈશ્વિક બજારોમાં ક્રૂડ ઓઈલના ભાવને ટાંકી રહી છે. સરકારે સંસદમાં જણાવ્યું હતું કે તેલની નિકાસ કરતા દેશો માંગ કરતાં ઓછો સપ્લાય કરી રહ્યા છે, જેના કારણે તેલની કૃત્રિમ અછત સર્જાઈ છે. માંગ અને પુરવઠાના કારણે તેલની કિંમતમાં વધારો જોવા મળી રહ્યો છે.