ગીર સોમનાથ / ડૉ. અતુલ ચગ આપઘાત કેસ: સામે આવ્યાં સ્યુસાઇડ નોટને લઇને સૌથી મોટા સમાચાર, વધશે ભાજપ સાંસદ અને તેના પિતાની મુશ્કેલી

 

• ડો.અતુલ ચગ આપઘાત મામલે મહત્વના સમાચાર
• સુસાઇડ નોટ રાજકોટ FSLમાં મોકલવામાં આવી
• ગુજરાતીમાં લખેલી સુસાઇડ નોટનું થશે વેરીફીકેશન

વેરાવળના નામાંકિત તબીબ ડોક્ટર અતુલ ચગ આપઘાત મામલે મહત્વના સમાચાર સામે આવ્યા છે. અતુલ ચગની સુસાઇડ નોટ રાજકોટ FSLમાં મોકલવામાં આવી છે. જ્યાં ગુજરાતીમાં લખેલી સુસાઇડ નોટનું વેરીફીકેશન થશે. રાજકોટ ખાતે ડો.અતુલ ચગના રાઇટિંગની ચકાસણી કરવામાં આવશે. સુસાઇડ નોટમાં ભાજપના સાંસદ અને તેમના પિતાના નામનો ઉલ્લેખ કરાયો છે.  ડો.અતુલ ચગના દીકરાએ પણ ભાજપના સાંસદ સામે પોલીસ અરજી કરી છે. મહત્વનું છે કે, વેરાવળમાં ડોક્ટર અતુલ ચગના આપઘાત મામલે રઘુવંશી સમાજમાં પણ આક્રોશ જોવા મળી રહ્યો છે. લોહાણા સમાજ દ્વારા ઠેર-ઠેર આવેદનપત્ર પાઠવીને ડો.અતુલ ચગના કેસમાં ન્યાયિક તપાસની માંગ કરવામાં આવી રહી છે.

રાજકોટ શહેર લોહાણા સમાજે આપ્યું હતું આવેદન
વેરાવળના પ્રતિષ્ઠિત તબીબ ડૉ અતુલ ચગના આત્મહત્યા કેસમાં પરિવારજનોએ ફરિયાદ આપ્યા બાદ પણ હજુ સુધી પોલીસ ફરિયાદ રજીસ્ટ્રર થઇ નથી. આ ઘટનાના રાજ્યભરમાં ધેરા પ્રત્યાધાતો પડ્યા છે. ગઈકાલે રાજકોટ શહેર લોહાણા સમાજ દ્વારા જિલ્લા કલેક્ટરને આવેદન પત્ર આપવામાં આવ્યું હતું. લોહાણા સમાજના પ્રમુખ રાજુ પોબારૂની અધ્યક્ષતામાં સમાજના આગેવાનો સહિત જિલ્લા કલેક્ટરને આવેદનપત્ર પાઠવ્યું હતું. 

AAPએ પણ આપ્યું હતું આવેદન પત્ર
ગીર સોમનાથ જિલ્લાના આમ આદમી પાર્ટીના કાર્યકરો દ્વારા જિલ્લા કાર્યલય ખાતેથી મૌન રેલી યોજવામાં આવી હતી. AAP દ્વારા રેલી  યોજી ડો.અતુલ ચગના પરિવારને ન્યાય મળે અને પોલીસ તેમની ફરિયાદ લઈ આરોપીઓ વિરૂદ્ધ કડક કાર્યવાહી કરે તેવી માંગ સાથે પ્રાંત અધિકારીને આવેદન અપાયું હતું.

શું છે સમગ્ર મામલો?
ગત તારીખ 12 ફેબ્રુઆરીના રોજ વેરાવળના નામાંકિત તબીબ ડોક્ટર અતુલ ચગે હોસ્પિટલના ઉપરના માળે ગળેફાંસો ખાઈ જીવન ટૂંકાવી લીધું હતું. જે મામલે સ્ટાફે પોલીસને જાણ કરતા પોલીસ ઘટનાસ્થળે દોડી આવી હતી. પોલીસે મૃતકની સ્યુસાઈડ નોટ સંદર્ભે ઊંડાણ પૂર્વકની તપાસ હાથ ધરી હતી. આ મામલે અનેક ચોંકાવનારા આરોપ લાગી રહ્યા છે.

મળી હતી સુસાઇડ નોટ
આત્મહત્યા બાદ તબીબ અતુલ ચગની સુસાઇડ નોટ પણ મળી હતી. જેમાં નારણ નામના વ્યક્તિ અને રાજેશ ચુડાસમાનું નામ હતું. જેથી રઘુવંશી ક્રાંતિ મંચના ઉપપ્રમુખે રાજકીય વગ ધરાવતા લોકોને આપઘાત માટે જવાબદાર ગણાવ્યા હતા. સાથે જ તેમણે સુસાઇડ નોટમાં રાજકીય વગ ધરાવતા લોકોના નામ હોવાનું નિવેદન આપ્યું હતું. જવાબદાર લોકો સામે નક્કર કાર્યવાહી કરવા અને મૃતક તબીબના પરિવારને ન્યાય આપવાની માગ કરી હતી

પરિવારજનોએ લગાવ્યો આક્ષેપ 
પરિવારજનોએ કહ્યું હતું કે, અતુલ ચગે રાજેશ ચુડાસમાના પિતાનો જીવ બચાવ્યો હતો. આમ છતાં તેમણે અતુલ ચગનો જીવ લીધો છે. વધુમાં પરિવારના સભ્યોએ કહ્યું હતું કે, ડૉ.અતુલ ચગ આર્થિક કારણથી આવું પગલું ક્યારેય ભરે નહીં. તે મજબૂત મનોબળના માનવી હતા. અતુલ ચગે પોતાના જીવનમાં અનેક ચડાવ-ઉતાર જોયા છે. જેથી તે આર્થિક કારણોસર આત્મહત્યા જેવું પગલું ભરી શકે નહીં. આ આત્મહત્યા આર્થિક કારણોને લઇ કરી હોવાની આશંકા વ્યક્ત કરવામાં આવી હતી. 

પોલીસે હજુ પણ નોંધી નથી ફરિયાદ
મૃતકના પરિવારજનોએ પુરાવા સાથે સાંસદ રાજેશ ચુડાસમા અને નારણ ચુડાસમા સામે પોલીસમાં લેખિત અરજી આપી હતી. પરંતુ હજુ સુધી ફરિયાદ ન નોંધાતા અનેક તર્ક વિતર્ક શરૂ થયાં છે. અરજી આપ્યાના આટલા દિવસ બાદ પણ ફરિયાદ ન નોંધવામાં આવતા પરિજનો અને લોહાણા સમાજમાં રોષ જોવા મળી રહ્યો છે. ભાજપના સાંસદ રાજેશ ચુડાસમા અને નારણ ચુડાસમા સામે ફરિયાદ નોંધવા પરિવારની માગ છે. પોલીસ સુસાઈડ નોટના FSL રિપોર્ટની રાહ જોતી હોવાની ચર્ચા શરૂ થઈ છે. અતુલ ચગના આપઘાત મામલે સાંસદ રાજેશ ચુડાસમાએ હજુ સુધી કોઈ પ્રતિક્રિયા આપી નથી.