ન્યાયિક / સુધરી ન થઈ શકે તેટલી હદે લગ્ન બગડ્યાં હોય તો ક્રૂરતાને આધારે છૂટાછેડા લઈ શકાય- સુપ્રીમનો મોટો ચુકાદો

• લગ્ન ભંગાણ પર સુપ્રીમની જોરદાર ટીપ્પણી 
• સુધરી ન થઈ શકે તેટલી હદે લગ્ન ખરાબ થયાં હોય તો છૂટાછેડા લઈ શકાય
• 25 વર્ષની અલગ રહેનાર કપલના કિસ્સામાં સુપ્રીમે આપ્યો ચુકાદો 

એક સીમાચિહ્નરૂપ ચુકાદામાં, સુપ્રીમ કોર્ટે તાજેતરમાં જણાવ્યું હતું કે હિન્દુ મેરેજ એક્ટની કલમ 13 (1) (આઇએ) હેઠળ સુધરી ન શકે તે હદે બગડી ગયા હોય તો લગ્નને ક્રૂરતાને આધારે ભંગ કરી શકાય છે. 

25 વર્ષની અલગ રહેનાર કપલના કિસ્સામાં સુપ્રીમનું અવલોકન 
જસ્ટિસ સુધાંશુ ધુલિયા અને જે બી પારડીવાલાની ખંડપીઠે એક કેસનો નિકાલ કરતી વખતે આ અવલોકન કર્યું હતું જેમાં એક દંપતી 25 વર્ષથી અલગ રહેતા હતા. આ દંપતી માંડ ચાર વર્ષ સુધી પતિ-પત્ની તરીકે સાથે રહ્યાં હતા અને ત્યાર બાદ છૂટાં પડી ગયાં હતાં અને આજ દિન સુધી અલગ જ રહે છે. તેઓએ એકબીજા સામે અનેક કેસ દાખલ કર્યા હતા.2009માં ફેમિલી કોર્ટે ક્રૂરતાના આધાર પર પતિ દ્વારા લગ્ન ભંગ કરવા માટે દાખલ કરવામાં આવેલી અરજીને સ્વીકારી લીધી હતી, જોકે દિલ્હી હાઈકોર્ટે 2011માં છૂટાછેડાના નિર્ણયને બદલી નાખ્યો હતો. સુપ્રીમ કોર્ટે પતિની અપીલ પર વિચાર કરતા કહ્યું કે, છેલ્લા કેટલાક વર્ષોમાં બંને પક્ષો વચ્ચેના સંબંધો કડવા થઈ ગયા છે. કોર્ટે એમ પણ નોંધ્યું હતું કે લગ્નમાં કોઈ બાળકનો જન્મ થતો નથી.

25 વર્ષથી બગડેલો સંબંધ સુધરી ન શકે 
કોર્ટે કહ્યું કે, અમારા મતે, વૈવાહિક સંબંધ, જે વર્ષોથી ફક્ત વધુને વધુ કડવો બની ગયો છે, તે બંને બાજુની ક્રૂરતા સિવાય બીજું કશું જ નથી. આ તૂટેલા લગ્નને જીવંત રાખવું એ બંને પક્ષો માટે અન્યાયી રહેશે. જે લગ્ન અપૂરણીય રીતે તૂટી ગયા હોય તે અમારા મતે બંને પક્ષો માટે ક્રૂર હોય છે, કારણ કે આવા સંબંધમાં દરેક પક્ષ એકબીજા સાથે ક્રૂર વ્યવહાર કરી રહ્યો છે. તેથી, તે કાયદાની કલમ 13 (1) (આઇએ) હેઠળ લગ્નવિચ્છેદના આધાર છે. 

પત્નીને 30 લાખનું ભરણપોષણ આપીને પતિને આપ્યાં છૂટાછેડા 
જોકે, સુપ્રીમ કોર્ટે માત્ર જીવનસાથી સામે કેસ દાખલ કરવો એ ક્રૂરતા ગણાશે નહીં એવા હાઈકોર્ટના અભિપ્રાય સાથે અસહમત ન હોવાનું જણાવતાં કહ્યું હતું કે આ કેસની હકીકતો જોતાં એ જોવું રહ્યું કે લગ્ન સુધરી ન શકે તેટલી હદે બગડી ગયાં છે. કોર્ટે સ્પષ્ટપણે કહ્યું હતું કે હાલના લગ્નનો અંત લાવવો જોઈએ કારણ કે તેની ચાલુ રાખવા એ એકબીજા પ્રત્યેની ક્રૂરતા સમાન છે. કોર્ટે પતિની અપીલને માન્ય રાખી હતી અને પત્નીને 30 લાખ રૂપિયા કાયમી ભરણપોષણ પેટે ચૂકવવાનો આદેશ આપ્યો હતો.