મહિલાની મનપંસદ પર મહોર / પત્ની અલગ ઘર માગે કે કહ્યાં વગર પિયર જતી રહે તો પતિ છૂટાછેડા ન માગી શકે-હાઈકોર્ટનો મોટો ચુકાદો

• પત્નીઓને મોટી મદદે આવી કર્ણાટક હાઈકોર્ટ
• કહ્યું-કહ્યાં વગર પત્ની પિયર જતી રહે તો પતિ છૂટાછેડા ન માગી શકે 
• પત્નીની અલગ ઘરની માગ પણ ક્રૂરતા નથી
• ધારવાડના એક ઘરેલુ વિવાદમાં હાઈકોર્ટનો મોટો ચુકાદો 

કર્ણાટક હાઈકોર્ટે પત્નીઓના ખાસ મનગમતા કામની તરફેણમાં ચુકાદો આપીને તેમની મદદ કરી છે. એક પારિવારિક કેસનો ચુકાદો આપતા કર્ણાટક હાઈકોર્ટે એવી ટીપ્પણી કરી કે પતિ કે ઘરના બીજા કોઈ સભ્યને કહ્યાં વગર પત્ની પીયર જતી રહે અથવા તો અલગ ઘરની માગ કરે તો તે ક્રૂરતા નથી અને પતિ આ આધારે છૂટાછેડા ન માગી શકે. કહ્યાં વગર ઘણા લાંબા સમયથી પિયર જતી રહેલા પત્ની પાસેથી છૂટછેડા માગનાર એક પતિની અરજી ફગાવી દેતા કર્ણાટક હાઈકોર્ટે આ ચુકાદો જાહેર કર્યો હતો. 

પત્ની અલગ ઘરની માગ કરે કે પિયરે જાય તે ક્રૂરતા નથી-હાઈકોર્ટ 

કોર્ટે કહ્યું કે, અલગ ઘર માંગવુ કે માતા-બહેનના ઘરે મળવા જવું એ ક્રૂરતા નથી. જસ્ટિસ આલોક આરાધે અને એસ વિશ્વનાથ શેટ્ટીની બેન્ચે આ ચુકાદો આપ્યો હતો. અરજદારે કૌટુંબિક ઝઘડા અંગે ફેમિલી કોર્ટમાં અરજી કરી હતી. અરજીકર્તાના પતિના જણાવ્યા અનુસાર 2002માં તેના લગ્ન એક યુવતી સાથે થયા હતા. લગ્નના થોડા સમય બાદ જ તેની પત્નીએ અલગ ઘરની માંગણી શરૂ કરી દીધી હતી. પતિના કહેવા પ્રમાણે તેણે પોતાની વિધવા માતા અને નાના ભાઈ સાથે રહેવાનું છે અને બંનેની જવાબદારી તેના ખભા પર છે.

વિધવા માતાનો સાથ ન છોડી શકું-પતિ 
પતિએ હાઈકોર્ટમાં એવું પણ કહ્યું હતું કે માતા અને ભાઈની જવાબદારીને કારણે તે અલગ ઘરની પત્નીની માગ પૂરી કરી શકતો નથી. તેણે એવું પણ કહ્યું કે પત્ની તેની માતા કે ભાઈને કહ્યાં વગર પીયર જતી રહે છે. પત્નીને આ આદતને કારણે તેની જિંદગી બર્બાદ થઈ છે. પતિનો દાવો છે કે 2017માં પત્ની બાળકોને લઈને પિયર જતી રહી હતી ત્યારથી આજ દિન સુધી પરત આવી નથી. 

પત્ની કરી ચૂકી છે દહેજનો ખોટો કેસ
પિયર જતા રહ્યાં બાદ પત્નીએ તેના પતિ પર દહેજનો ખોટો કેસ કર્યો હતો. જોકે પાછળથી થયેલી પોલીસ તપાસમાં પતિ અને તેનો પરિવાર નિર્દોષ સાબિત થયો હતો.