IPL 2023 / MS Dhoni vs Hardik Pandya કોને મળશે ફાઇનલની ટિકિટ! ગુરુ અને ચેલા વચ્ચેની જંગમાં જામશે રસાકસી, હાર્દિક પંડ્યાનું કેમ વધ્યું ટેન્શન?

• ગુજરાતે બેંગલોરને હરાવીને પ્લેઓફની આશા પર પાણી રેડી દીધું
• ગુજરાત ટાઇટનની સામે પ્લેઓફમાં ચેન્નઇ સુપર કિંગ્સ ટકરાશે
• ફાયનલમાં પહોંચવા હાર્દિકે પોતાના ગુરુ ધોનીની ચેન્નઇને મ્હાત આપવી પડશે 

IPL જે રોમાંચ માટે જાણીતું છે એ રોમાંચ ફેન્સને આ વખત ખુબ જ જોવા મળ્યો છે. એવું પણ કહી શકાય કે આ વખતે પૈસા વસૂલ સીઝન રહી છે. કોહલીની બેંગલુરુને ગુજરાત ટાઇટને ધોબી પછાડ આપ્યા બાદ પ્લેઓફનું ચિત્ર એકદમ સ્પષ્ટ થઇ ગયું છે. આ વખતે છેલ્લી મેચ સુધી પ્લેઓફમાં પહોંચવા માટેની રેસ લાગી હતી, જેમાં ગત સીઝનનું ચેમ્પિયન ગુજરાત સૌથી પહેલા ક્વોલીફાઇ થઇને ટોચ પર જઇને બેસી ગયુ છે. એટલું જ નહીં છેલ્લી મેચમાં બેંગલોરને હરાવીને તેની પ્લેઓફની આશા પર દરિયા જેટલું પાણી રેડી દીધું છે. બીજી બાજુ ગુજરાત ટાઇટનની સામે પ્લેઓફમાં ચેન્નઇ સુપર કિંગ્સ ટકરાશે. હાર્દિક અને મહેન્દ્રસિંઘ ધોની એક બીજાના ગુરુ-ચેલા હોવાનું માનવામાં આવે છે. હાર્દિક પહેલાથી જ ધોનીને પોતાનો ગુરુ માને છે. પ્લેઓફમાં સીધું જ ફાયનલમાં પહોંચવું હોય તો હાર્દિકે પોતાના ગુરુ ધોનીની ચેન્નઇને મ્હાત આપવી પડશે જે જરાય સહેલું નથી. 

 આશા છું કે આગળ પણ ટીમનું પર્ફોમન્સ એવું જ રહેશે...
બેંગલુરુને ધોબી પછાડ આપીને ગુજરાતે કોહલીના લાખો ફેન્સને નારાજ જરૂર કર્યા છે, પરંતુ હવે ફાયનલ સુધી પહોંચવાની તેની સફર સરળ નહીં હોય, બેંગલોરને હરાવ્યા બાદ હાર્દિક પાંડ્યાએ કહ્યું હતું કે ગત સીઝન કરતાં આ વર્ષે તેની ટીમને જોરદાર ટક્કર મળવાની છે. ગત વર્ષે જ્યારે તે ચેમ્પિયન બન્યા ત્યારે બધુ તેના હિસાબ પ્રમાણે બન્યું હતું. પરંતુ આ વખતે સરળતાથી ચેમ્પિયન નહીં બનીએ. જો કે ટીમનું ઓવરઓલ પર્ફોમન્સ સારું છે, જે આશા છું કે આગળ પણ એવું જ રહેશે. 

પ્લેઓફની મેચમાં પણ રોમાંચકતા જોવા મળશે
હાર્દિકે વધુમાં જણાવ્યું કે અમારા ખેલાડી પોતાનું સારુ પર્ફોમન્સ આગળ પણ જાળવી રાખશે, પરંતુ હવે પછી જે ટીમ સામે ટક્કર છે તેની પાસે નોકઆઉટ મેચ રમવાનો અને જીતવાનો સારો અનુભવ છે. 12મી વખત બન્યું છે કે ધોનીની પીળી જર્સીએ પ્લેઓફમાં સ્થાન મેળવ્યું છે, જેમાંથી ચાર વખત તેઓ ટ્રોફિ જીત્યા છે. જો કે હાર્દિકની ગુજરાત ટાઇટન પાસે ગત સીઝનમાં ચેમ્પિયન બનવાનો અનુભવ અને કોન્ફિડન્સ બંને છે. ત્યારે ફેન્સને પ્લેઓફની મેચમાં પણ રોમાંચકતા જોવા તો મળશે જ.