ભરતી આવે છે / મયુર ચૌહાણ સ્ટારર ફિલ્મ સમંદરનું ધમાકેદાર ટ્રેલર થયું રિલીઝ, જોવા મળ્યો ખૂંખાર અંદાજ

લાંબા સમયથી દર્શકો જેની રાહ જોઈ રહ્યા હતા અને જેના ગીતોએ ગુજરાતીઓમાં ઓલરેડી ચર્ચા જગાવી છે, તેવી અપકમિંગ ફિલ્મ સમંદરનું ટ્રેલર રિલીઝ થઈ ચૂક્યુ છે. સવા ત્રણ મિનિટના આ ટ્રેલરમાં ગુજરાતી સિનેમામાં અત્યાર સુધી ભાગ્યે જ જોવા મળ્યો હોય તેવો અંદાજ દેખાઈ રહ્યો છે. ફિલ્મના ટ્રેલરના વ્યુઝ સટાસટ વધી રહ્યા છે. 

મયુર ચૌહાણ અને જગજીતસિંહ સ્ટારર આ ગુજરાતી ફિલ્મ સમંદરમાં સમુદ્ર કિનારાના એક ગામની વાત છે. ટ્રેલર પરથી દેખાઈ રહ્યું છે કે આ વાર્તા ક્રાઈમ કરતા બે મિત્રોની વધારે છે. જેઓ બાળપણથી ખરા અર્થમાં પાર્ટનર ઈન ક્રાઈમ છે, આગળ જતા બંને સમંદર કિનારે પોતાનું સામ્રાજ્યા ઉભુ કરે છે. પરંતુ જ્યારે તેમાં પોલિટિક્સની એન્ટ્રી થાય છે, ત્યારે બંને મિત્રોના કિનારા જુદા જુદા થાય છે. 

અહીં જુઓ ફિલ્મનું ટ્રેલર

ગુજરાતી ફિલ્મ છેલ્લો દિવસમાં નરેશનું પાત્ર ભજવીને લોકપ્રિય થનાર મયુર ચૌહાણ ફિલ્મ સમંદરમાં એક નવા જ અંદાજમાં દેખાઈ રહ્યા છે, તો વિઠ્ઠલ તીડી, રઘુ સીએનજી જેવા પ્રોજેક્ટમાં પોતાની છાપ છોડનાર જગજીતસિંહ વાઢેરનો સ્ક્રીન અપીરીયન્સ પણ ખતરનાક છે. આ ફિલ્મનું ટ્રેલર તમને 70-80ના દાયકામાં લઈ જાય છે, જ્યારે સ્મગલિંગ થતું હતું. 

ઉલ્લેખનીય છે કે આ પહેલા ફિલ્મ સમંદરનું માર હલેસા અને હાવજના ઠેકાણા એમ બે ગીતો રિલીઝ થઈ ચૂક્યા છે, જે બંને દર્શકોને ખૂબ પસંદ આવ્યા છે. સૈયર મોરી રે ફેમ વિશાલ વડાવાલા ડિરેક્ટેડ આ ફિલ્મમાં મયુર ચૌહાણ અને જગજિતસિંહની સાથે સાથે ગુજરાતી ફિલ્મોના ખમતીધર કલાકારો ધર્મેન્દ્રસિંહ ગોહિલ, ચેતન ધાનાણી, દીક્ષા જોશી, મમતા સોની, કલ્પના ગાગડેકર, મયુર સોનેજી જોવા મળશે. જ્યારે આ ફિલ્મી વાર્તા અને સ્ક્રીન પ્લે સ્વપ્નિલ મહેતાએ લખ્યો છે. વટ, વચન અને વેરની સાથે સાથે ઉદય અને સલમાનની વાત કરતી આ ફિલ્મ સમંદરની ભરતી થિયેટરમાં 17મી મેના રોજ આવવાની છે.