મોટી અપડેટ / દૂધ ખરીદીને લઇ સાબર ડેરીનો મોટો નિર્ણય, કિલો ફેટે કર્યો આટલાનો ભાવ વધારો

Sabar Dairy : સાબરકાંઠા અને અરવલ્લી જિલ્લાના લાખો પશુપાલકો માટે ખુશીના સમાચાર સામે આવ્યા છે. વાસ્તવમાં આ વિસ્તારની જીવાદોરી સમાન સાબર ડેરીએ દૂધના ભાવમાં વધારો જાહેર કરતા પશુપાલકોમાં આનંદનો માહોલ જોવા મળી રહ્યો છે. સાબર ડેરીના નિયામક મંડળ દ્વારા લેવામાં આવેલા નિર્ણય મુજબ હવે પ્રતિ કિલો ફેટે રૂપિયા 15 નો વધારો કરવામાં આવ્યો છે, જેનો અમલ આગામી 1 જૂનથી થશે.

જાણો હવે કેટલો વધારો ?

નવી જાહેરાત અનુસાર અત્યાર સુધી પશુપાલકોને પ્રતિ કિલો ફેટે રૂપિયા 850 ચૂકવવામાં આવતા હતા, જ્યારે હવે વધારાના રૂપિયા 15 સાથે કુલ રૂપિયા 865 ચૂકવવામાં આવશે. આ નિર્ણયનો સીધો લાભ સાબરકાંઠા અને અરવલ્લી જિલ્લાના અંદાજે સાડા ત્રણ લાખથી વધુ પશુપાલકોને મળશે. દર મહિને અંદાજિત 10 કરોડ રૂપિયાથી વધુની વધારાની રકમ પશુપાલકો સુધી પહોંચશે, જેના કારણે ગ્રામ્ય અર્થતંત્રને પણ મજબૂતી મળશે.

શું કહ્યું સાબર ડેરીના સત્તાધીશોએ ?

સાબર ડેરીના સત્તાધીશોએ જણાવ્યું હતું કે,. પશુઓના ઘાસચારા અને અન્ય ખર્ચમાં સતત વધારો થવાને કારણે પશુપાલકો પર આર્થિક ભાર વધી રહ્યો હતો. આ પરિસ્થિતિને ધ્યાનમાં રાખીને દૂધના ખરીદી ભાવમાં વધારો કરવાનો નિર્ણય લેવામાં આવ્યો છે. સાથે જ સાબર ડેરી દ્વારા વાર્ષિક દૂધના ભાવફેર અંગે પણ મહત્વપૂર્ણ સંકેત આપવામાં આવ્યા છે.

આ પણ વાંચો : ગરમીના કહેર વચ્ચે ડ્રાઇવિંગ ટેસ્ટના સમયમાં ફેરફાર, અમદાવાદીઓ નોંધી લે

ડેરી સંચાલકોએ જણાવ્યું કે 30 જૂન પહેલા પશુપાલકોને દૂધના ભાવફેરની ચુકવણી કરવામાં આવશે અને ગત વર્ષની તુલનાએ આ વર્ષે વધુ ભાવફેર આપવામાં આવશે. ઉલ્લેખનીય છે કે, ગયા વર્ષે ઓછો ભાવફેર જાહેર થતા સાબર ડેરી ખાતે પશુપાલકોમાં ભારે રોષ ફાટી નીકળ્યો હતો અને હંગામો પણ સર્જાયો હતો. જોકે, આ વર્ષે વહેલી તકે અને વધુ રકમ સાથે ભાવફેર ચૂકવવાની ખાતરી અપાતા પશુપાલકોમાં ફરી ખુશીની લાગણી જોવા મળી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ