રાજનીતિ / રાજકોટમાં 'નગરપતિ'નું નામ જાહેર, નેહલ શુક્લને મેયરનો તાજ, દક્ષા વસાણી બન્યાં ડે.મેયર

Rajkot Meyor : રાજકોટ મહાનગરપાલિકામાં નવા પદાધિકારીઓના નામોની સત્તાવાર જાહેરાત થઈ ગઈ છે. ભાજપ દ્વારા આગામી અઢી વર્ષ માટે મેયર તરીકે નેહલ શુક્લની પસંદગી કરવામાં આવી છે. જ્યારે સ્ટેન્ડિંગ કમિટીના ચેરમેન તરીકે પરેશ પીપળીયા અને ડેપ્યુટી મેયર તરીકે દક્ષાબેન વસાણીને જવાબદારી સોંપવામાં આવી છે.

મહત્વનું છે કે, પદાધિકારીઓની પસંદગી પહેલાં રાજકોટમાં રાજકીય મથામણનો માહોલ જોવા મળ્યો હતો. શહેર સંગઠન અને ધારાસભ્યો વચ્ચે અનેક તબક્કાની બેઠકો યોજાઈ હતી. બંધ બારણે ચાલેલી ચર્ચાઓમાં વિવિધ નામો પર વિચારણા કરવામાં આવી હતી. આ સમગ્ર પ્રક્રિયા દરમિયાન લાંબા સમયથી રાજકીય રીતે નિષ્ક્રિય ગણાતા નીતિન ભારદ્વાજની હાજરીએ રાજકીય વર્તુળોમાં ખાસ ચર્ચા જગાવી હતી.

આ પણ વાંચો : ગીતા મકવાણા બન્યા વડોદરાના મેયર, આદિત્ય પટેલ ડે.મેયર અને વર્ષાબહેન વ્યાસ સ્ટેન્ડિગ ચેરમેન

પક્ષના નેતાઓ વચ્ચે ઉમેદવારોને લઈને સમીકરણો ગોઠવવાના પ્રયાસો થયા હોવાનું સામે આવ્યું છે. ખાસ કરીને શહેરના અલગ-અલગ વિસ્તારો અને સમાજને પ્રતિનિધિત્વ મળે તે માટે પક્ષ દ્વારા સંતુલન જાળવવાનો પ્રયાસ કરવામાં આવ્યો હોવાનું માનવામાં આવે છે. આ દરમિયાન રાજકોટ મહાનગરપાલિકાના પ્રથમ જનરલ બોર્ડમાં કેટલાક કોર્પોરેટરો સાયકલ લઈને પહોંચ્યા હતા, જે ઘટનાએ લોકોનું ધ્યાન ખેંચ્યું હતું. પર્યાવરણ પ્રત્યે જાગૃતિ અને સામાન્ય નાગરિક સાથે જોડાણ દર્શાવવા માટે આ અનોખી પહેલ કરવામાં આવી હોવાનું જણાવાયું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ