તમારા કામનું / અમદાવાદ એરપોર્ટ 6 દિવસ હાઈ એલર્ટ પર, ફ્લાઇટ પહેલાં વહેલા પહોંચવા મુસાફરોને સલાહ

Ahmedabad Airport High Alert: ભારતભરમાં 26 જાન્યુઆરીના રોજ પ્રજાસત્તાક દિવસની ઉજવણીના ભાગરૂપે વિશેષ તકેદારીના પગલાં લેવાઈ રહ્યા છે અને સુરક્ષા જવાનોને પણ તૈનાત કરી દેવાયા છે ત્યારે આ પ્રજાસત્તાક દિવસની ઉજવણીને ધ્યાનમાં રાખીને અમદાવાદ એરપોર્ટ પર સુરક્ષા વ્યવસ્થાને વધુ કડક બનાવવામાં આવી છે. અમદાવાદના એરપોર્ટને 26 જાન્યુઆરીથી 31 જાન્યુઆરી સુધી હાઈ એલર્ટ પર રાખવામાં આવ્યું છે. વધારાની સુરક્ષા તપાસના કારણે મુસાફરોને એરપોર્ટ પર સામાન્ય કરતા વધુ સમય લાગી શકે છે.

એરપોર્ટ અધિકારીઓ અને એરલાઈન્સે મુસાફરો માટે ખાસ એડવાઈઝરી જાહેર કરી છે. તેમાં જણાવાયું છે કે સુરક્ષા ચકાસણી દરમિયાન બેગેજની બે વખત તપાસ કરવામાં આવશે. તેથી મુસાફરોને પોતાની ફ્લાઇટના સમયથી ઓછામાં ઓછા ત્રણ કલાક અગાઉ એરપોર્ટ પર પહોંચવાની સલાહ આપવામાં આવી છે. અન્યથા તમારે તમારી ફ્લાઇટ મિસ કરવાનો વારો આવી શકે છે.

એરલાઈન્સે સ્પષ્ટ કર્યું છે કે ચેક-ઇન કાઉન્ટર ફ્લાઇટના 60 મિનિટ પહેલા બંધ કરી દેવામાં આવશે. જ્યારે બોર્ડિંગ ગેટ ફ્લાઇટના 25 મિનિટ પહેલા બંધ થશે. મુસાફરોને સૂચના આપવામાં આવી છે કે તેઓ ચેક-ઇન બેગ ઉપરાંત ફક્ત એક હેન્ડબેગ રાખે. જેનું વજન મહત્તમ 7 કિલો સુધી જ હોવું જોઈએ.

આ પણ વાંચો: અમદાવાદની સ્કૂલોમાં ફરી બોમ્બ વિસ્ફોટની ધમકીઓ, સેંટ ઝેવિયર્સ-સંત કબીર સ્કૂલને મળી ધમકી

વિશેષ રૂપે 26 જાન્યુઆરીના રોજ દિલ્હીમાં ગણતંત્ર દિવસની રિહર્સલને કારણે ફ્લાઇટ ઓપરેશન્સ પર અસર પડી શકે છે. આથી મુસાફરોને વધારાનો સમય રાખીને મુસાફરીનું આયોજન કરવા અને એરપોર્ટ પર વહેલા પહોંચવા અપીલ કરવામાં આવી છે. સુરક્ષા પ્રક્રિયા દરમિયાન કોઈ મુશ્કેલી ન થાય તે માટે મુસાફરોને એરપોર્ટ સ્ટાફ સાથે સહયોગ આપવા પણ વિનંતી કરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ