BIG NEWS / ગુજરાતના ખેડૂતો માટે માઠા સમાચાર, પોટાશ ખાતરમાં ભાવ વધારો ઝીંકાયો, દિલીપ સંઘાણીએ કહ્યું આ કારણ જવાબદાર

• પોટાશ ખાતરમાં ગુણ દીઠ 660 રૂપિયાનો વધારો
• પોટાશ ખાતર સંપૂર્ણપણે આયાત કરવામાં આવે છે- સંઘાણી
• 280 ડોલર પ્રતિ ટનથી વધીને 700 ડોલર થયો-સંઘાણી

નવા વર્ષની શરૂઆતમાં જ ખેડૂતોની મુશ્કેલીઓમાં વધારો થઇ ગયો છે. ખાતરના ભાવમાં વધારો કરાતા ખેડૂતોની મુશ્કેલીઓ વધી છે. પોટાશ ખાતરમાં ગુણ દીઠ 660 રૂપિયાનો વધારો કરી દેવાયો છે. જેના કારણે દક્ષિણ ગુજરાતના ખેડૂતોને 40 કરોડનો આર્થિક બોજો પડશે. ત્યારે 5 હજાર કરોડની સબસિડીની કેન્દ્ર સરકાર સમક્ષ માગ કરાઇ રહી છે. પોટાશ ખાતરનો ભાવ છેલ્લા 10 મહિનામાં બે ગણો થયો છે. એપ્રિલ 2021માં પોટાશ ખાતરનો ભાવ 850 રૂપિયા હતો. જ્યારે હવે જાન્યુઆરી 2022માં પોટાશ ખાતરનો ભાવ 1700 થયો છે. જેને લઇ રોકડીયા પાક અને શેરડીની ખેતી કરતા ખેડૂતોને મુશ્કેલી પડી રહી છે.

ઈન્ટરનેશનલ માર્કેટમાં પોટાશનો ભાવમાં વધારો થયો છે-સંઘાણી
ખાતરના ભાવ વધારા મુદ્દે IFFCOના ચેરમેન દિલીપ સંઘાણીએ કહ્યું કે, પોટાશ ખાતર સંપૂર્ણપણે આયાત કરવામાં આવે છે.ઈન્ટરનેશનલ માર્કેટમાં પોટાશનો ભાવમાં વધારો થયો છે.280 ડોલર પ્રતિ ટનથી વધીને 700 ડોલર થયો છે...ખાતરના ભાવમાં વધારા માટે ઈન્ટરનેશનલ માર્કેટ કારણભૂત છે.પોટાશ ખાતરનો ભાવ ઈન્ટરનેશનલ ભાવ પ્રમાણે વધે છે.

પોટાશ ખાતરની કિંમતમાં વધેલા દર

ખેડૂતોને પડ્યા પર પાટુ
સતત વધતા જતા પોટાશના ભાવ વધારાને લઈને ખેડૂતોમાં રોષ જોવા મળી રહ્યો છે. ઇન્ડિયન પોટાશ કંપનીએ નવા વર્ષથી નવા ભાવનો અમલ કરવા પરિપત્ર જાહેર કર્યો છે. ફેડરેશન, જિલ્લા, તાલુકા અને ખેડૂત કેન્દ્રને લેખિતમાં આ માટેની જાણ કરાઈ હતી, પરંતુ જાણે કે ખેડૂતોને પડતા પર પાટુ જેવો ઘાટ સરકાર એ ઘડયો છે. હાલમાં જ કમોસમી વરસાદના બાદ આ રીતે પોટાશના ભાવમાં વધારો થવાથી જગતના તાતની મુશ્કેલીમાં મોટો વધારો જોવા મળ્યો છે.આવનારા દિવસોમાં ખેડૂતો સાથે બેઠક યોજીને આગળની રણનીતિ નક્કી કરશે,સાથે સાથે દક્ષિણ ગુજરાત ખેડુત સમાજે સરકાર ને ચીમકી ઉચ્ચારી છે,કે જો સરકાર ભાવ વધારો પાછો નહિ ખેંચે તો ઉગ્ર આંદોલન કરવામાં આવશે.