ક્રાઈમ / ત્રણ વર્ષમાં ₹3,708 કરોડની બેન્ક છેતરપિંડી સાથે ગુજરાત દેશમાં છઠ્ઠા ક્રમે, ફ્રોડની રકમમાં 45.6%નો વધારો

છેલ્લા ત્રણ નાણાકીય વર્ષ દરમિયાન ગુજરાતમાં રૂ. ૩,૭૦૭.૭ કરોડની બેન્કિંગ છેતરપિંડી નોંધાઈ છે. આ સાથે દેશના તમામ રાજ્યો અને કેન્દ્રશાસિત પ્રદેશોમાં ગુજરાત છઠ્ઠા ક્રમે રહ્યું છે. આ માહિતી ભારતીય રિઝર્વ બેન્ક (આરબીઆઈ)ના તાજેતરના આંકડાઓમાં સામે આવી છે.

સત્તાવાર રિપોર્ટ મુજબ, રાજ્યમાં નોંધાયેલી બેન્ક છેતરપિંડીનો આંકડો દર વર્ષે વધતો ગયો છે. વર્ષ ૨૦૨૩-૨૪માં રૂ. ૯૮૬.૨ કરોડના ફ્રોડ નોંધાયા હતા, જે ૨૦૨૪-૨૫માં ૩૦.૪ ટકા વધીને રૂ. ૧,૨૮૫.૯ કરોડ થયા હતા. ત્યાર બાદ ૨૦૨૫-૨૬માં વધુ ૧૧.૬ ટકા વધીને રૂ. ૧,૪૩૫.૬ કરોડ સુધી પહોંચ્યા. આમ, ત્રણ વર્ષમાં બેન્ક ફ્રોડની કુલ રકમમાં ૪૫.૬ ટકાનો વધારો નોંધાયો છે.

મહારાષ્ટ્ર (રૂ. ૩૨,૨૯૭.૯ કરોડ) આ યાદીમાં પ્રથમ સ્થાને રહ્યું છે. ત્યાર બાદ દિલ્હી (રૂ. ૧૬,૩૯૬.૬ કરોડ), પશ્ચિમ બંગાળ (રૂ. ૧૦,૩૦૯.૬ કરોડ), તેલંગાણા (રૂ. ૫,૨૭૫.૬ કરોડ) અને તામિલનાડુ (રૂ. ૪,૧૮૬.૨ કરોડ)નો ક્રમ આવે છે.

બેન્કિંગ ક્ષેત્રનાં સૂત્રોનાં જણાવ્યા મુજબ, ગ્રાહકોમાં જાગૃતિ વધતાં અને બેન્કોની મોનિટરિંગ વ્યવસ્થા વધુ મજબૂત બનતાં છેતરપિંડીના વધુ કેસો નોંધાઈ રહ્યા છે. જોકે છેલ્લાં કેટલાંક વર્ષોથી છેતરપિંડીની પદ્ધતિમાં ખાસ ફેરફાર આવ્યો નથી. નકલી કેવાયસી અપડેટ, એપીકે લિંક, બેન્ક અધિકારી બની ફોન કરવો, ક્રેડિટ કાર્ડ ઓફર અથવા બિલ પેમેન્ટના નામે વિગતો મેળવવા જેવા કૌભાંડો હજુ પણ સૌથી વધુ જોવા મળે છે. ખાસ કરીને ટેક્નોલોજીથી ઓછા પરિચિત વરિષ્ઠ નાગરિકો વધુ નિશાન બને છે.

સાયબર ક્રાઇમના તપાસ અધિકારીઓના જણાવ્યા મુજબ, છેતરપિંડીની ફરિયાદ પ્રથમ કલાકમાં સાયબર હેલ્પલાઇન અથવા પોલીસને કરવામાં આવે તો રકમ ફ્રીઝ અથવા પરત મળવાની શક્યતા નોંધપાત્ર રીતે વધી જાય છે. મોડી ફરિયાદને કારણે રિકવરીની સંભાવના ઘટી જાય છે.

ત્રણ વર્ષ દરમિયાન ગુજરાતમાં રૂ. ૩૭૦૭.૭ કરોડમાંથી માત્ર રૂ. ૯૬.૫૮ કરોડ (૨.૬ ટકા)ની જ વસૂલાત થઈ છે. મહારાષ્ટ્રમાં રિકવરી દર ૩ ટકા, કર્ણાટકમાં ૨.૩ ટકા રહ્યો છે, જ્યારે પશ્ચિમ બંગાળે ૧૬.૧ ટકાની રિકવરી સાથે સૌથી સારું પ્રદર્શન કર્યું.

આ પણ વાંચોઃ રાજકોટના લોથડા ગામે પાણી ભરેલા ખાડામાં ડૂબી 2 બાળકોના મોત

આરબીઆઈના આંકડા દર્શાવે છે કે મોટા ભાગની બેન્કિંગ છેતરપિંડી દેશના મુખ્ય વેપારી અને નાણાકીય રાજ્યોમાં કેન્દ્રિત છે. તેમ છતાં ગુજરાતે કર્ણાટક, ઉત્તરપ્રદેશ અને પંજાબ જેવા અનેક મોટા રાજ્યો કરતાં વધુ બેન્ક ફ્રોડ નોંધાવ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ