ગુજરાત / અમદાવાદના પ્રખ્યાત મોકા કાફેમાં ફૂડમાંથી નીકળી જીવાત, ગ્રાહકે નોંધાવી AMCમાં ફરિયાદ

અમદાવાદ શહેરના જાણીતા અને પોશ ગણાતા બોડકદેવ વિસ્તારમાં આવેલ દેવર્ષિ કોમ્પલેક્ષના 'મોકા કાફે' (Mocha Cafe) માં એક ચોંકાવનારો કિસ્સો સામે આવ્યો છે. અહીં હસતા-રમતા મિત્રો કે પરિવાર સાથે ક્વોલિટી ટાઈમ વિતાવવા ગયેલા એક ગ્રાહકને ખૂબ જ કડવો અનુભવ થયો હતો. કાફેમાં ઓર્ડર કરવામાં આવેલી કોફી અને ભોજનમાંથી જીવાત નીકળતા ગ્રાહક સ્તબ્ધ થઈ ગયા હતા. ખાણીપીણીની આવી પ્રતિષ્ઠિત જગ્યાએ હાઈજીનના ધજાગરા ઉડતા ગ્રાહકે તાત્કાલિક આ બાબતે કાફેના મેનેજમેન્ટ અને સંચાલકોને ફરિયાદ કરી હતી. જોકે, ગ્રાહકની સુરક્ષા અને સ્વાસ્થ્ય સાથે જોડાયેલા આ ગંભીર મુદ્દે કાફે સત્તાવાળાઓનો વ્યવહાર અત્યંત બેજવાબદાર રહ્યો હતો.

સંચાલક તરફથી કોઈ યોગ્ય કે સંતોષકારક જવાબ

ગ્રાહકના આક્ષેપ અનુસાર, જ્યારે તેમણે કોફી અને ફૂડમાં જીવાત હોવા અંગે કાફે સંચાલકનું ધ્યાન દોર્યું, ત્યારે સંચાલક તરફથી કોઈ યોગ્ય કે સંતોષકારક જવાબ આપવામાં આવ્યો ન હતો. ઉલટાનું, કાફે સંચાલકોએ આ ગંભીર બેદરકારી પર પડદો પાડવા માટે અત્યંત ઉડાવ જવાબ આપ્યો હતો. સંચાલકોએ એવો બચાવ કર્યો કે આ જીવાત ભોજન બનાવતી વખતે અંદર નથી પડી, પરંતુ કાફેની છત ઉપરથી અચાનક નીચે પડી છે. આ પ્રકારનો અતાર્કિક જવાબ સાંભળીને ગ્રાહક આશ્ચર્યચકિત થઈ ગયા હતા. એટલું જ નહીં, ગ્રાહકે જ્યારે કાફેના સીટિંગ એરિયા (બેસવાની જગ્યા) માં બારીકાઈથી જોયું, તો ત્યાં અન્ય જગ્યાઓ પર પણ જીવાતો ફરતી જોવા મળી હતી, જે કાફેની ખરાબ સફાઈ વ્યવસ્થાની ચાડી ખાતી હતી.

ગ્રાહકનો ગંભીર આરોપ

ગ્રાહકનું કહેવું છે કે, "અમને કાફેના કિચન (રસોડા) માં જતા પણ રોકવામાં આવ્યા હતા. જો ત્યાં બધું જ સાફ અને નિયમોનુસાર હોત, તો તેઓ અમને અંદર તપાસ કરતા કેમ રોકત? કાફે સંચાલકો તરફથી આ આખી સમસ્યા અંગે કોઈ યોગ્ય જવાબ આપવામાં આવ્યો નથી અને ગ્રાહકના સ્વાસ્થ્યની મજાક ઉડાવવામાં આવી છે."

આ પણ વાંચો : મોરબીના નવા મેયરનો VIDEO વાયરલ, “ટિકિટથી મેયર પદ સુધી હેમરાજભાઈનો જ હાથ”

કાફેના આવા અસહકારભર્યા અને નકારાત્મક વલણને કારણે આખરે ગ્રાહકે કાયદાકીય અને વહીવટી માર્ગ અપનાવ્યો છે. ગ્રાહકે આ સમગ્ર ઘટનાની વિગતો સાથે અમદાવાદ મ્યુનિસિપલ કોર્પોરેશન (AMC) ના હેલ્થ અને ફૂડ વિભાગમાં ઓનલાઈન ફરિયાદ નોંધાવી દીધી છે. અમદાવાદના યુવાનો અને ફૂડ લવર્સમાં લોકપ્રિય એવા આ કાફેની આવી ઘોર બેદરકારી હવે ચર્ચાનો વિષય બની છે. ગ્રાહકો મોંઘા ભાવ ચૂકવીને જ્યાં શુદ્ધતાની અપેક્ષા રાખે છે, ત્યાં આવી જીવાતવાળું ભોજન પીરસાવું તે સ્વાસ્થ્ય સામે મોટું જોખમ ઊભું કરે છે. હવે જોવાનું એ રહેશે કે AMCના ફૂડ વિભાગ દ્વારા આ બોડકદેવના મોકા કાફે સામે કેવા કડક પગલાં લેવામાં આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ