એક્શન / રાજસ્થાનના અલવરમાં મંદિર પર બુલડોઝર ચલાવનારા વિરૂદ્ધ કાર્યવાહી, ગેહલોત સરકારે લીધો મોટો નિર્ણય

• અલવરમાં મંદિર પર બુલડોઝર ચલાવનારા વિરૂદ્ધ કાર્યવાહી
• અલવરમાં અતિક્રમણ દરમ્યાન મંદિર પર ચલાવાયું હતું બુલડોઝર
• ગેહલોત સરકારે ત્રણ લોકોને સસ્પેન્ડ કર્યા છે

રાજસ્થાનના અલવરમાં અતિક્રમણ હટાવવા દરમિયાન મંદિર પર બુલડોઝર ચલાવવા મામલે ગેહલોત સરકાર દ્વારા મોટી કાર્યવાહી કરવામાં આવી છે. ગેહલોત સરકારે રાજગઢ નગરપાલિકાના અધ્યક્ષ સહિત ત્રણ લોકોને આ મામલે સસ્પેન્ડ કર્યા છે. અલવરના રાજગઢમાં મંદિર પર બુલડોઝર ચલાવવા મામલે ત્રણ મોટા લોકો પર આરોપ લાગ્યો છે.

રાજસ્થાનની અશોક ગેહલોત સરકારે આ મામલે કાર્યવાહી કરીને રાજગઢ નગરપાલિકા પ્રમુખ સતીશ દુહરિયાને સસ્પેન્ડ કરી દીધા છે. રાજગઢ નગરપાલિકાના કાર્યકારી અધિકારી બનવારીલાલ મીણાને પણ સસ્પેન્ડ કરવામાં આવ્યા છે તો એ સિવાય SDM કેશવ કુમાર મીણાને પણ સસ્પેન્ડ કરવામાં આવ્યા છે.

Rajasthan government has suspended Rajgarh Sub-Divisional Magistrate (SDM) Keshav Kumar Meena, Rajgarh Municipality Board's chairman Satish Duharia and Executive Officer (EO) of the nagar panchayat, Banwari Lal Meena with immediate effect over temple demolition in Alwar

— ANI MP/CG/Rajasthan (@ANI_MP_CG_RJ) April 25, 2022

રાજસ્થાન હાઈકોર્ટના એક વકીલે નોંધાવી હતી FIR

જણાવી દઈએ કે, રાજસ્થાન હાઈકોર્ટના એક વકીલે રાજગઢમાં પ્રાચીન શિવ મંદિર તોડનારા વિરુદ્ધ એફઆઈઆર નોંધાવી છે, પરંતુ રાજગઢમાં નગર પરિષદના નિર્ણય બાદ અતિક્રમણ વિરુદ્ધની કાર્યવાહીમાં માત્ર એક મંદિર તોડવામાં નથી આવ્યું, પરંતુ 140થી વધારે દુકાનો પણ તેની ઝપેટમાં આવી ગઈ છે.

જિલ્લા વહીવટીતંત્રના અધિકારીઓ સામે વિરોધ પ્રદર્શન

બાદમાં આ કાર્યવાહીથી પ્રભાવિત લોકોએ સોમવારે જિલ્લા પ્રશાસનના અધિકારીઓ વિરૂદ્ધ વિરોધ પ્રદર્શન કર્યું હતું. આ વિરોધને ઉગ્ર બનતો જોઈ પોલીસ કેટલાંક લોકોને ગાડીમાં બેસાડવાનું શરૂ કરી દેતા બાકીના લોકો ગુસ્સે થઈ ગયા. જેથી થોડી જ વારમાં તેઓને ફરીથી કારમાંથી બહાર કાઢવામાં આવ્યાં. ત્યાર બાદ મામલો થાળે પડ્યો હતો. સરકારે અસરગ્રસ્ત લોકોના પુનર્વાસના કાર્યની દેખરેખ રાખવાની જવાબદારી કમિશનરને સોંપી છે.

અલવરમાં તંત્રએ 300 વર્ષ જૂના મંદિરો પર બુલડોઝર ચલાવી દીધું હતું

અત્રે ઉલ્લેખનીય છે કે, રાજસ્થાનના અલવરમાં નગરપાલિકા દ્વારા બુલડોઝર દ્વારા કાર્યવાહી કર્યાનો મામલો સામે આવ્યો હતો. જેમાં તંત્રએ 300 વર્ષ જૂના મંદિરો પર બુલડોઝર ચલાવી દીધું હતું. જેના વીડિયો પણ સોશિયલ મીડિયામાં ખૂબ વાયરલ થયા હતાં.

ભાજપે કર્યો હતો ઉગ્ર વિરોધ

અલવરમાં થયેલી કાર્યવાહી બાદ બીજેપી સાંસદ અને કેન્દ્રીય મંત્રી કૈલાશ ચૌધરીએ મુખ્યમંત્રી અશોક ગેહલોત પર નિશાન સાધ્યું હતું. તેઓએ ટ્વિટ કર્યું હતું કે, 'અલવરમાં 300 વર્ષ જૂના શિવ મંદિરને તોડી પાડવું એ રાજસ્થાનની કોંગ્રેસ સરકારની ધર્મ વિરોધી માનસિકતા દર્શાવે છે. મુખ્યમંત્રી, તમે આ બુલડોઝરનો ઉપયોગ તોફાનીઓ અને ગુનેગારો સામે પગલાં લેવા માટે કર્યો હોત તો સારું થાત.'